147
1 Pǝrwǝrdigarƣa ⱨǝmdusanalar bolsun! Pǝrwǝrdigarni mǝdⱨiyilǝnglar.
Mǝdⱨiyǝ nahxilirini eytix yahxi wǝ sɵyümlüktur.
Bundaⱪ mǝdⱨiyilǝx insanƣa yarixar.
2 Pǝrwǝrdigar Yerusalemni ⱪuridu,
Isra’ilning ⱨǝydǝp qiⱪirilƣanlirini yiƣidu.
3 U kɵngli sunuⱪlarni dawalaydu,
ularning yarilirini tangidu. ◼
4 U yultuzlarning sanini bǝlgilǝydu,
ularning ⱨǝmmisini ɵz nami bilǝn ataydu.
5 Rǝbbimiz uluƣdur,
Uning küq-ⱪudritimu uluƣdur,
Uning danaliⱪi qǝksizdur.
6 Pǝrwǝrdigar kǝmtǝr-mulayimlarni yɵlǝp kɵtürǝr,
lekin yamanlarni yǝrgǝ yiⱪitar.
7 Pǝrwǝrdigarƣa nahxa bilǝn xükür eytinglar,
Hudayimizƣa lira qelip mǝdⱨiyǝ nahxilirini eytinglar.
8 U asmanni bulut bilǝn ⱪaplap,
yǝrgǝ yamƣur yaƣdurup,
taƣlarda ot-qɵplǝrni ündürǝr.
9 U ⱨaywanlarƣa rizⱪini berǝr,
ingrap turƣan ⱪuzƣunning baliliriƣa ozuⱪ berǝr.
10 U atning küqini tǝlǝp ⱪilmas,
adǝmning putlirining qǝbdǝslikidin sɵyünmǝs.
11 Bǝlki Pǝrwǝrdigar Ɵzidin ⱪorⱪidiƣan,
Uning meⱨir-xǝpⱪitigǝ ümid baƣliƣanlardin sɵyünǝr.
12 Əy Yerusalem, Pǝrwǝrdigarni uluƣliƣin.
Əy Si’on, Hudayingni mǝdⱨiyiligin.
13 Qünki U dǝrwaziliringning taⱪaⱪlirini mǝⱨkǝm ⱪilar,
iqingdiki baliliringƣa bǝrikǝt ata ⱪilar.
14 U zeminingni tinq-aman ⱪilar
wǝ esil buƣday bilǝn seni toydurar.
15 U Ɵz buyruⱪini yǝr yüzigǝ ǝwǝtǝr,
Uning sɵzi qapardǝk tez yürǝr.
16 U ⱪarni aⱪ yung kǝbi yaƣdurar,
ⱪirowni kül kǝbi qaqar,
17 U mɵldürni nan uwaⱪliridǝk taxliwetǝr.
Uning soƣuⱪiƣa kimmu bǝrdaxliⱪ berǝlisun?
18 U sɵzini ǝwitip, ⱨǝmmini eritǝr,
xamilini qiⱪirip, sularni aⱪⱪuzar.
19 U sɵzini Yaⱪubⱪa bildürdi,
ⱪanun-bǝlgilimiliri wǝ ǝⱨkamlirini Isra’ilƣa bayan ⱪildi.
20 U baxⱪa ⱨeqbir hǝlⱪⱪǝ bundaⱪ ⱪilmiƣan.
Ular Uning ǝⱨkamlirini bilmǝydu.
Pǝrwǝrdigarƣa ⱨǝmdusanalar bolsun!