1 Uz degǝn yurtta Əyyub isimlik bir adǝm yaxaytti. U kamil wǝ durus adǝm idi, Hudadin ⱪorⱪup, yamanliⱪtin ⱪaqatti. 2 Uning yǝttǝ oƣul, üq ⱪizi bar idi. 3 Uning yǝttǝ ming ⱪoyi, üq ming tɵgisi, bǝx yüz jüp ɵküzi wǝ bǝx yüz mada exiki wǝ nurƣun hizmǝtkarliri bar bolup, xǝrⱪtikilǝr iqidǝ ǝng kattisi u idi.

4 Uning oƣulliri bekitilgǝn künlǝrdǝ ɵyliridǝ nɵwǝt bilǝn ziyapǝt berip, üq singlisinimu billǝ yǝp-iqip ƣizalinixⱪa qaⱪirixatti. 5 Bu ziyapǝt künliri ayaƣlixixi bilǝn Əyyub adǝm ǝwǝtip ularni paklinixⱪa buyruytti. U sǝⱨǝr turup ⱨǝrbirigǝ atap kɵydürmǝ ⱪurbanliⱪ ⱪilatti. Qünki u: «Balilirim gunaⱨ ɵtküzüp, kɵngülliridǝ Hudaƣa biⱨɵrmǝtliⱪ ⱪilƣan boluxi mumkin» dǝp oylaytti. Əyyub ⱨǝr da’im xundaⱪ ⱪilip turatti.

6 Bir küni ‹Hudaning oƣulliri› Pǝrwǝrdigarning ⱨuzurida ⱨazir bolƣinida, Xaytanmu ularning arisida idi. ^◼   7 Pǝrwǝrdigar xǝytandin: «Ⱪǝyǝrdin kǝlding?» dǝp soridi. Xǝytan: «Uyaⱪ-buyaⱪlarni kezip yǝr yüzini aylinip kǝldim» dedi jawabǝn. 8 Pǝrwǝrdigar xǝytanƣa: «Hizmǝtkarim Əyyubⱪa diⱪⱪǝt ⱪilƣansǝn? Yǝr yüzidǝ uningdǝk Hudadin ⱪorⱪup, yamanliⱪtin ⱪaqidiƣan kamil wǝ durus kixi yoⱪtur» dedi. 9 Xǝytan Pǝrwǝrdigarƣa jawab berip dediki: «Əyyub Hudadin bikardin-bikar ⱪorⱪmiƣandu? 10 Sǝn Ɵzüng uning ⱨǝm a’ilisining wǝ erixkǝn ⱨǝmmǝ nǝrsisining ǝtrapini tosuⱪlar bilǝn ⱪorxap ⱪoƣdimidingmu? Uning ⱪolliriƣa bǝrikǝt ata ⱪilding, xuning bilǝn uning tǝ’ǝlluⱪati awup ronaⱪ tapti. 11 Əgǝr ⱪolungni uzitip uning erixkǝn ⱨǝmmǝ nǝrsisini yoⱪitiwǝtsǝng, u qoⱪum Sǝndin yüz ɵrüp sanga lǝnǝt oⱪuydu». 12 Pǝrwǝrdigar xǝytanƣa: «Maⱪul, uning barining ⱨǝmmisi sening ⱪolungƣa tapxurup berildi. Lekin uning ɵzigǝ ⱪol tǝgküzküqi bolma» dedi. Xuning bilǝn xǝytan Pǝrwǝrdigarning ⱨuzuridin qiⱪip kǝtti.

13 Bir küni Əyyubning oƣul-ⱪizliri qong akisining ɵyidǝ ƣizalinip xarab iqip olturƣanda, 14 bir hǝwǝrqi kelip Əyyubⱪa mundaⱪ dedi: «Ɵküzlǝr yǝr ⱨǝydǝwatatti wǝ exǝklǝr ǝtrapta otlawatatti, 15 Xebaliⱪlar besip kelip ularni bulap kǝtti, ixlǝwatⱪan yigitlǝrni ⱪiliqlap ɵltürüwǝtti. Yalƣuz mǝnla ⱪutulup ⱪelip, sanga hǝwǝr yǝtküzgili kǝldim».

16 Uning gepi tehi tügimǝy turupla baxⱪa bir hǝwǝrqi kelip: «Asmandin Hudaning oti qüxüp, ⱪoylar wǝ yigitlǝrni kɵydürüp kül ⱪiliwǝtti. Yalƣuz mǝnla ⱪutulup ⱪelip, sanga hǝwǝr yǝtküzgili kǝldim» dedi.

17 U tehi gǝp ⱪiliwatⱪanda yǝnǝ bir kixi kelip hǝwǝr berip: «Kaldaniylar üq ⱪolƣa bɵlünüp tɵgilǝrgǝ ⱨujum ⱪilip ⱨǝmmisini bulap kǝtti, ixlǝwatⱪan yigitlǝrni qepip ɵltürüwǝtti. Yalƣuz mǝnla ⱪutulup ⱪelip, sanga hǝwǝr yǝtküzgili kǝldim» dedi.

18 U tehi gǝp ⱪiliwatⱪanda yǝnǝ bir kixi kelip hǝwǝr berip: «Oƣul-ⱪizliring qong akilirining ɵyidǝ tamaⱪ yǝp, xarab iqip olturƣinida, 19 tuyuⱪsiz, qɵldin xiddǝtlik bir boran kelip, ɵyning tɵt tǝripigǝ xundaⱪ urdiki, ɵy balilarning üstigǝ ƣulap qüxti wǝ ⱨǝmmisi ɵldi. Yalƣuz mǝnla ⱪutulup ⱪelip, sanga hǝwǝr yǝtküzgili kǝldim» dedi.

20 Əyyub buni anglap, ornidin dǝs turdi wǝ tonini yirtip, qeqini qüxürüp, yǝrgǝ yiⱪilip sǝjdǝ ⱪildi. 21 U: «Anamning ⱪorsiⱪidin yalingaq qiⱪtim, yǝnǝ yalingaq ⱪaytimǝn. Pǝrwǝrdigar bǝrdi, Pǝrwǝrdigar aldi, Pǝrwǝrdigarning nami mubarǝk bolsun» dedi. 22 Bularning ⱨǝmmisidǝ Əyyub gunaⱨ ⱪilmidi wǝ Hudani ⱨeqⱪandaⱪ nalayiⱪliⱪ bilǝn ǝyiblimidi.