1 Ⱨakimlar ⱨɵkümranliⱪ ⱪiliwatⱪan künlǝrdǝ zeminda aqarqiliⱪ yüz bǝrdi. Bu qaƣda bir adǝm ɵz ayali wǝ ikki oƣli bilǝn Yǝⱨuda zeminidiki Bǝytlǝⱨǝmdin qiⱪip, waⱪtinqǝ turux üqün Mo’abning zeminiƣa bardi. 2 U adǝmning ismi Elimelǝk, ayalining ismi Na’omi, ikki oƣlining isimliri bolsa Mahlon wǝ Kilyon idi. Ular Bǝytlǝⱨǝmdǝ olturuxluⱪ Əfratiylardin idi. Ular Mo’abning zeminiƣa kelip, u yǝrdǝ olturaⱪlaxti. 3 Na’omi, eri Elimelǝk wapat bolƣandin keyin, ikki oƣli bilǝn yalƣuz ⱪaldi. 4 Ular Mo’abiylardin ɵzlirigǝ hotun elixti. Birining ismi Orpa wǝ yǝnǝ birining ismi bolsa Rut idi. 5 Ular u yǝrdǝ tǝhminǝn on yil turƣandin keyin, Mahlon wǝ Kilyon ⱨǝr ikkisi wapat boldi. Xundaⱪ ⱪilip Na’omi eridin wǝ baliliridin ayrilip yalƣuz ⱪaldi.

6 Bu qaƣda u ɵzining ikki kelini bilǝn tǝyyarlinip, Mo’ab zeminidin ⱪaytmaⱪqi boldi. Qünki u Pǝrwǝrdigarning ⱪandaⱪ Ɵz hǝlⱪini yoⱪlap, ularƣa nan bǝrgǝnlikini Mo’ab zeminida turup angliƣanidi. 7 Xuning bilǝn u ikki kelini bilǝn turƣan yeridin ⱪozƣilip qiⱪti. Yǝⱨuda zeminiƣa ⱪaytix üqün yolda ketip barƣanda 8 Na’omi ikki kelinigǝ sɵzlǝp: «Ⱨǝr ikkinglar ɵz ananglarning ɵyigǝ ⱪaytip ketinglar. Silǝr mǝrⱨumlarƣa wǝ manga meⱨirbanliⱪ kɵrsǝtkininglardǝk, Pǝrwǝrdigarmu silǝrgǝ meⱨirbanliⱪ kɵrsǝtkǝy. 9 Pǝrwǝrdigar ⱨǝrbiringlarni ɵz eringlarning ɵyidǝ aram tapⱪuzsun» dǝp ularni sɵydi. Əmma ular ün selip yiƣlap, 10 uningƣa: «Biz sǝn bilǝn sening hǝlⱪingning yeniƣa ⱪaytimiz» deyixti. 11 Lekin Na’omi: «Ⱪaytip ketinglar, ǝy ⱪizlirim. Nemixⱪa mǝn bilǝn barisilǝr? Silǝrgǝ ǝr bolƣudǝk oƣullar yǝnǝ tuƣulamdimǝn? 12 Ⱪaytip ketinglar, ǝy ⱪizlirim. Qünki mǝn ⱪerip kǝttim, yǝnǝ ǝrgǝ tegixkǝ yarimaymǝn. Əgǝr ümidim tehi bar degǝn tǝⱪdirdǝ, bu keqǝ bir ǝrgǝ tegip oƣullar tuƣsammu, 13 ular balaƣǝtkǝ yǝtküqǝ sǝwr ⱪilip, baxⱪa ǝrgǝ tǝgmǝy, ular üqün saⱪlap turattinglarmu? Undaⱪ bolmisun, ǝy ⱪizlirim! Mǝn tartidiƣan azab silǝrningkidin tehimu eƣirdur, qünki Pǝrwǝrdigarning ⱪoli manga ⱪarxi kɵtürüldi» dedi. 14 Ular yǝnǝ ün selip yiƣlaxti. Ahirida Orpa ɵz ⱪeynanisi bilǝn hoxlixip uni sɵydi, lekin Rut uningƣa qing yepixip turdi.

15 Na’omi uningƣa: «Mana, kelin aqang ɵz hǝlⱪi bilǝn ilaⱨliriƣa ⱪaytip kǝtti! Sǝnmu ɵz kelin aqangning kǝynidin ⱪaytip kǝtkin» dedi. 16 Lekin Rut uningƣa: «Meni kǝtküzüp, seni taxlap ⱪaytixⱪa meni zorlimiƣin. Sǝn baridiƣan yǝrgǝ mǝnmu berip, sǝn ⱪonidiƣan jayda mǝnmu ⱪonay. Sening hǝlⱪing mening hǝlⱪim bolup, sening Hudaying mening Hudayim bolsun. 17 Sǝn ɵlidiƣan yǝrdǝ mǝnmu ɵlüp dǝpnǝ ⱪilinay. Əgǝr ɵlümdin baxⱪa sǝwǝbtin sǝndin ayrilsam, Pǝrwǝrdigar meni jazalisun, ⱨǝtta uningdinmu ziyadisini ⱪilsun» dedi. ^◼   18 Na’omi uning billǝ berixⱪa ⱪǝt’iy niyǝt ⱪilƣinini kɵrüp, uningƣa bu ix toƣruluⱪ ⱪayta sɵz ⱪilmidi.

19 Ikkisi mengip, Bǝytlǝⱨǝmgǝ yetip kǝldi. Ular Bǝytlǝⱨǝmgǝ kǝlginidǝ, ⱨǝmmǝ xǝⱨǝr ular sǝwǝblik ⱪozƣilip kǝtti. Ayallar bolsa: «Bu Na’omi ǝmǝsmu?» deyixti. 20 U ularƣa: «Meni Na’omi demǝy, bǝlki Mara dǝp atanglar, qünki ⱨǝmmigǝ ⱪadir Huda beximƣa kɵp azab saldi. ^◼   21 Toⱪⱪuzum tǝl bu yǝrdin qiⱪtim, lekin Pǝrwǝrdigar meni ⱪuruⱪ ⱪol ⱪayturdi. Pǝrwǝrdigar meni dǝrdkǝ selip, ⱨǝmmigǝ ⱪadir Huda meni azap-oⱪubǝtkǝ giriptar ⱪilƣan tursa, meni nemixⱪa Na’omi dǝysilǝr?» dedi. 22 Xundaⱪ ⱪilip Na’omi bilǝn kelini bolƣan Mo’abiy Rut, Mo’abning zeminidin Bǝytlǝⱨǝmgǝ ⱪaytip kǝldi, ular kǝlgǝndǝ arpa ormisi baxlanƣanidi.