1 Tɵwǝndikilǝr Musaning I’ordan dǝryasining xǝrⱪiy tǝripidiki Paran, Tofǝl, Laban, Hazerot wǝ Di-Zaⱨabning otturisida, Sufning udulidiki qɵldǝ pütkül Bǝni Isra’ilƣa eytⱪan sɵzliridur. 2 Horeb teƣidin Ⱪadǝx-Barne’aƣiqǝ, Se’ir taƣliⱪining yoli arⱪiliⱪ, on bir künlük yoldur. 3 Ⱪiriⱪinqi yili on birinqi ayning birinqi küni Musa Pǝrwǝrdigarning uningƣa Bǝni Isra’ilƣa munasiwǝtlik barliⱪ buyruƣanliri ularƣa bayan ⱪildi. 4 Musa Hexbonda olturuxluⱪ Amoriylarning padixaⱨi Sihonni wǝ Ədrǝydiki Axtarotta olturuxluⱪ Baxan padixaⱨi Ogni uruxup mǝƣlup ⱪilƣandin keyin bu wǝⱪǝ yüz bǝrdi. 5 Musa I’ordan dǝryasining xǝrⱪiy tǝripidiki Mo’abning zeminida bu ⱪanunni bayan ⱪilixni baxlidi. U mundaⱪ dedi:

6 «Hudayinglar Pǝrwǝrdigar Horeb teƣida bizgǝ sɵz ⱪilip mundaⱪ dedi: ‹Bu taƣning ǝtrapida yetǝrlik waⱪit turdunglar. 7 Əmdi burulup yolƣa qiⱪinglar. Amoriylarning taƣliⱪliriƣa, wǝ tüzlǝngliktǝ, taƣliⱪta wǝ oymanliⱪta yaxawatⱪan, jǝnubiy zeminda wǝ dengiz boyida yaxawatⱪan ⱪoxna hǝlⱪlarning zeminliriƣa, yǝni uluƣ Firat dǝryasiƣiqǝ sozulƣan Kǝn’anliⱪlarning zemini wǝ Liwan zeminiƣa beringlar. ^◼   8 Mana, Mǝn bu zeminni ⱪolunglarƣa tapxurup berimǝn. Beringlar, Pǝrwǝrdigar ata-bowiliringlar Ibraⱨimƣa, Is’ⱨaⱪ wǝ Yaⱪubⱪa ⱪǝsǝm ⱪilip: «Silǝr wǝ silǝrdin keyin kelidiƣan nǝsilgǝ uni berimǝn» dǝp wǝdǝ ⱪilƣan zeminni igilǝnglar›. 9 Əyni waⱪitta mǝn silǝrgǝ mundaⱪ dedim: ‹Yükünglarni mǝn yalƣuz kɵtürǝlmǝymǝn. 10 Hudayinglar Pǝrwǝrdigar silǝrni awutⱪaqⱪa, mana ǝmdi silǝr asmanning yultuzliridǝk nurƣun boldunglar. 11 U silǝrgǝ eytⱪinidǝk ata-bowiliringlarning Hudasi bolƣan Pǝrwǝrdigar silǝrni yǝnǝ ming ⱨǝssǝ oxuⱪraⱪ awutup, silǝrgǝ bǝrikǝt ata ⱪilƣay. 12 Lekin mǝn yükünglarni ⱪandaⱪmu yalƣuz kɵtürǝlǝymǝn, japaliringlarni tartip, talax-tartixinglarƣa ⱪandaⱪ qidiyalaymǝn? 13 Xunga silǝr ɵz ⱪǝbililiringlardin dana, ǝⱪil-parasǝtlik wǝ mɵtiwǝr kixilǝrni tallap kɵrsitinglar, mǝn ularni silǝrgǝ baxliⱪ ⱪilip tǝyinlǝymǝn›. 14 Silǝr manga jawab berip: ‹Sening eytⱪiningdǝk ⱪilinsa, yahxi bolidu› dedinglar. 15 Xuning bilǝn mǝn ⱪǝbililiringlarning iqidin dana wǝ mɵtiwǝr kixilǝrni tallap, ularni mingbexi, yüzbexi, ǝllikbexi wǝ onbexi ⱪilip tǝyinlǝp, üstünglarƣa baxliⱪ, ⱪǝbililiringlarƣa sǝrdar ⱪilip ⱪoydum. 16 Əyni waⱪitta mǝn ⱨakimliringlarƣa mundaⱪ buyruⱪ berip: ‹Silǝr ⱪerindaxliringlarning dǝwasini anglap, mǝyli bir kixining ɵz ⱪerindixi bilǝn dǝwasi bolsun, mǝyli uningkidǝ turƣan musapir bilǝn dǝwasi bolsun, ularning arisida adil ⱨɵküm qiⱪiringlar. 17 Ⱨɵküm qiⱪirixta ⱨeq kixigǝ yüz-hatirǝ ⱪilmay, mǝyli kiqik yaki qong bolsun, ⱨǝmmisining dǝwasini anglanglar. Ⱨɵküm Hudaningdur, xunga ⱨeq kixining ⱨǝywisidin ⱪorⱪmanglar. Əgǝr bir dǝwa silǝrgǝ tǝs kɵrünsǝ, uni manga elip kelinglar. Mǝn uni anglaymǝn› dedim.

18 Əyni qaƣda mǝn silǝrgǝ ⱪilidiƣan ⱨǝmmǝ ixliringlar toƣrisida buyruⱪ bǝrdim.

19 Andin keyin biz Pǝrwǝrdigar Hudayimizning buyruⱪi boyiqǝ Horeb teƣidin yolƣa qiⱪip, Amoriylarning taƣliⱪliri tǝripigǝ mengip, ɵzünglar kɵrgǝn u pütkül ⱪorⱪunqluⱪ qong qɵldin ɵtüp, Ⱪadǝx-Barne’aƣa yetip kǝlduⱪ. 20 Mǝn silǝrgǝ: ‹Əmdi silǝr Pǝrwǝrdigar Hudayimiz bizgǝ beridiƣan Amoriylarning taƣliⱪ zeminiƣa kǝldinglar. 21 Mana, bu zeminni Hudayinglar Pǝrwǝrdigar aldinglarƣa ⱪoydi. Əmdi silǝr qiⱪip, ata-bowiliringlarning Hudasi Pǝrwǝrdigar silǝrgǝ eytⱪinidǝk, uni igiliwelinglar, ⱪorⱪmanglar, ⱨuduⱪmanglar› dedim. 22 Andin silǝr ⱨǝmminglar ⱪeximƣa kelip: ‹Biz berixtin ilgiri zeminning ǝⱨwalini bilix, wǝ biz baridiƣan yol wǝ kiridiƣan xǝⱨǝrlǝr toƣrisida hǝwǝr elix üqün u yǝrgǝ aldin adǝmlǝr ǝwǝtilsun› dedinglar. 23 Bu sɵz manga muwapiⱪ kǝlgǝqkǝ, mǝn ⱨǝr ⱪǝbilidin birdin adǝm elip, aranglardin on ikki kixini tallidim. 24 Ular berip, taƣliⱪⱪa qiⱪip, Əxkol wadisiƣa qüxüp, u yǝrni tǝkxürüp kɵrdi. 25 Ular ⱪollirida u yǝrning mewisidin alƣaq kelip bizgǝ hǝwǝr berip: ‹Pǝrwǝrdigar Hudayimiz bizgǝ beridiƣan zemin yahxi ikǝn› dedi.

26 Lekin xundaⱪ bolsimu, silǝr u yǝrgǝ qiⱪixni halimay, Hudayinglar Pǝrwǝrdigarning buyruⱪiƣa ⱪarxi qiⱪtinglar. 27 Silǝr qedirliringlarda olturup ƣotuldixip: ‹Pǝrwǝrdigar bizgǝ ɵq bolƣaqⱪa, bizni Amoriylarning ⱪoliƣa tapxurup ⱨalak ⱪilix üqün Misirdin elip qiⱪti. 28 Biz nǝgǝ bararmiz? Ⱪerindaxlirimiz bizgǝ: «U yǝrdiki hǝlⱪ bizdin küqlük wǝ egiz, xǝⱨǝrliri intayin qong wǝ sepilliri asmanƣa taⱪixidikǝn. Ⱨǝm u yǝrdǝ Anaⱪiylarnimu kɵrduⱪ» dǝp bizning kɵnglimizni parakǝndǝ ⱪildi› dedinglar. 29 Mǝn silǝrgǝ jawab berip: ‹Silǝr jür’ǝtlik bolunglar, ulardin ⱪorⱪmanglar. 30 Hudayinglar Pǝrwǝrdigar kɵz aldinglarda silǝr üqün Misirda ⱪilƣandǝk, ⱨelimu aldinglarda mengip, silǝr üqün jǝng ⱪilidu. 31 Insan ɵz oƣlini kɵtürüp yürgǝndǝk, Pǝrwǝrdigar Hudayinglarning silǝrni bu yǝrgǝ yǝtküqǝ mangƣan pütün yolliringlarda kɵtürüp kǝlginini kɵrdunglar. 32 Lekin xundaⱪtimu, ɵz Hudayinglar Pǝrwǝrdigarƣa ixǝnmidinglar. 33 U yolda qüxidiƣan jayinglar üqün yǝr izdǝx, mangidiƣan yolunglarni kɵrsitix üqün keqisi ot, kündüzi bulut iqidǝ aldinglarda mangdi› dedim. 34 Əmma Pǝrwǝrdigar sɵzliringlarni angliƣinida ƣǝzǝplinip: 35 ‹Bu yaman nǝsildin ⱨeqⱪim Mǝn ⱪǝsǝm ⱪilip ata-bowiliringlarƣa berixkǝ wǝdǝ ⱪilƣan zeminni kɵrmǝydu. 36 Pǝⱪǝt Yǝfunnǝning oƣli Kalǝb, pütün ⱪǝlbi bilǝn Pǝrwǝrdigarƣa ǝgǝxkǝqkǝ, u zeminni kɵridu. Mǝn uningƣa wǝ uning baliliriƣa u ɵzi dǝssǝp yürgǝn zeminni berimǝn› dǝp ⱪǝsǝm ⱪildi. 37 Ⱨǝm xundaⱪla silǝrning sǝwǝbinglardin Pǝrwǝrdigar manga ƣǝzǝplinip mundaⱪ dedi: ‹Sǝnmu u yǝrgǝ kirmǝysǝn. 38 Əmma hizmǝtkaring bolƣan Nunning oƣli Yǝxu’a u yǝrgǝ kiridu. Uni riƣbǝtlǝndürgin, qünki uning arⱪiliⱪ Bǝni Isra’il zeminni igilǝydu. 39 Silǝrning: «Düxmǝnning oljisi bolup ketidu» degǝn bowaⱪliringlar, bügün yahxi-yamanni pǝrⱪ etixni bilmigǝn baliliringlar bolsa u yǝrgǝ kiridu. Mǝn zeminni ularƣa berimǝn wǝ ular uni igilǝydu. 40 Əmma silǝr ǝmdi burulup, Ⱪizil dengiz yoli bilǝn qɵl tǝrǝpkǝ menginglar›. 41 Silǝr manga jawab berip: ‹Biz Pǝrwǝrdigarƣa ⱪarxi gunaⱨ ⱪilduⱪ. Əmdi biz qiⱪip, Pǝrwǝrdigar Hudayimiz bizgǝ buyruƣandǝk jǝng ⱪilayli› dedinglar. Xuning bilǝn ⱨǝrbiringlar bǝl baƣlap, ⱪorallinip, taƣliⱪⱪa qiⱪixⱪa tǝyyar boldunglar. 42 Lekin Pǝrwǝrdigar manga: ‹Sǝn ularƣa: «Silǝr u yǝrgǝ qiⱪip jǝng ⱪilmanglar, qünki Mǝn aranglarda ǝmǝsmǝn. Undaⱪ ⱪilmanglar, bolmisa düxmǝnliringlar tǝripidin urulup, mǝƣlup ⱪilinisilǝr» dǝp eytⱪin› dedi. 43 Mǝn silǝrgǝ xu boyiqǝ sɵz ⱪildim, lekin silǝr ⱪulaⱪ salmidinglar, bǝlki Pǝrwǝrdigarning buyruⱪiƣa ⱪarxi qiⱪip, jaⱨilliⱪ ⱪilip taƣliⱪⱪa qiⱪtinglar. 44 Əmma u taƣliⱪ zeminda turƣan Amoriylar silǝrgǝ ⱪarxi qiⱪip, ⱨǝrilǝrdǝk silǝrni ⱪoƣlidi. Ular silǝrni Se’irda urup mǝƣlup ⱪilip, Hormaⱨⱪiqǝ ⱪoƣlap bardi. 45 Silǝr ⱪaytip kelip, Pǝrwǝrdigarning aldida yiƣlidinglar. Lekin Pǝrwǝrdigar silǝrni tingximidi, pǝryadinglarƣa ⱪulaⱪ salmidi. 46 Xuning bilǝn silǝr Ⱪadǝxtǝ nurƣun künlǝr turdunglar, heli uzun waqit u yǝrdǝ turup ⱪaldinglar.