1 Andin keyin biz burulup, Pǝrwǝrdigar manga buyruƣini boyiqǝ Ⱪizil dengiz yoli bilǝn qɵl-bayawanƣa kelip, uzun waⱪitⱪiqǝ Se’ir taƣliⱪining ǝtrapida aylinip yürduⱪ. 2 Xu qaƣda Pǝrwǝrdigar manga sɵzlǝp: 3 ‹Silǝr bu taƣning ǝtrapida yetǝrlik waⱪit aylinip yürdünglar. Əmdi ximal tǝrǝpkǝ burulunglar. 4 Sǝn hǝlⱪⱪǝ buyrup: «Əmdi silǝr Se’irda olturuxluⱪ ⱪerindaxliringlar Əsaw ⱪǝbilisining zeminidin ɵtisilǝr. Ɵtkininglarda ular silǝrdin ⱪorⱪidu, ǝmma silǝr eⱨtiyat ⱪilip, 5 ularƣa ⱨujum ⱪilmanglar, qünki Se’ir taƣliⱪlirini Əsawƣa miras ⱪilip bǝrdim. Xunga ularning zeminidin silǝrgǝ ⱨǝtta put ⱪoyƣudǝk jaymu bǝrmǝymǝn. 6 Yǝydiƣan ozuⱪunglarni ulardin pulƣa elinglar, iqidiƣan süyünglarnimu ulardin pulƣa elinglar. 7 Mana, Pǝrwǝrdigar Hudaying ⱪol salƣan ⱨǝr ixingƣa bǝrikǝt berip, bu qong bayawanda ⱪilƣan sǝpiring dawamida sǝndin hǝwǝr elip kǝldi. Bu ⱪiriⱪ yil Pǝrwǝrdigar Hudaying sǝn bilǝn billǝ bolƣaqⱪa, ⱨeqnemǝng kǝm bolmidi» dǝp eytⱪin› dedi.

8 Xuning üqün biz Se’irda olturuxluⱪ ⱪerindaxlirimiz Əsaw ⱪǝbilisining yenidin ɵtüp burulup, tüzlǝnglik yoli bilǝn mengip, Elat wǝ Əsyon-Gebǝrdin ɵtüp, andin burulup Mo’ab qɵlining yoliƣa qüxüp mangduⱪ. 9 Pǝrwǝrdigar manga: ‹Sǝn Mo’abⱪa ⱨujum ⱪilip, ular bilǝn jǝng ⱪilmiƣin, qünki Mǝn Ar zeminini Lotning ǝwladliriƣa miras ⱪilip bǝrdim. Xunga ularning zeminidin sanga ⱨeq miras bǝrmǝymǝn› dedi.

10 Ilgiri u zeminda Emiylar turatti. Ular Anaⱪiylarƣa ohxax sani kɵp, boyi egiz küqlük bir hǝlⱪ idi. 11 Anaⱪiylarƣa ohxax ularmu Refa’iylarning ⱪatarida ⱨesablandi. Mo’abiylar ularni Emiylar dǝp atidi. ^◼   12 Ⱪǝdimki zamanda Se’irda, Horiylar degǝn bir hǝlⱪ turatti. Lekin huddi Bǝni Isra’il Pǝrwǝrdigar ularƣa bǝrgǝn zeminni igiliwalƣandǝk, Əsawning ǝwladlirimu Horiylarni ⱨǝydǝp qiⱪirip, ularni kɵz aldidin yoⱪitip, ularning zeminida olturaⱪlaxⱪanidi.

13 Pǝrwǝrdigar: ‹Əmdi ⱪozƣilip, Zarǝd jilƣisidin ɵtünglar› dedi. Xuning bilǝn biz Zarǝd jilƣisidin ɵttuⱪ. 14 Ⱪadǝx-Barne’adin qiⱪip, Zarǝd jilƣisidin ɵtüp bolƣuqǝ ottuz sǝkkiz yil ɵtüp kǝtti. Bu waⱪit iqidǝ Pǝrwǝrdigarning ⱪilƣan ⱪǝsimigǝ muwapiⱪ, bargaⱨtiki bu nǝsilning jǝnggǝ layiⱪ kixilirining ⱨǝmmisi ɵlüp kǝtti. 15 Ular ɵlüp tügǝp bolmiƣuqǝ, Pǝrwǝrdigarning ⱪoli bargaⱨta ularni yoⱪitixtin tohtimiƣanidi.

16 Hǝlⱪning iqidiki jǝnggǝ yaraydiƣanlarning ⱨǝmmisi ɵlüp tügigǝndin keyin, 17 Pǝrwǝrdigar manga sɵz ⱪilip:

18 ‹Bügün sǝn Mo’abning qegrisidiki Ar xǝⱨiridin ɵtkin. 19 Xuning bilǝn Ammoniylarƣa yeⱪin kelisǝn, ǝmma ularƣa ⱨujum ⱪilip, ular bilǝn jǝng ⱪilmiƣin, qünki Mǝn Ammoniylarning zeminini Lotning ǝwladliriƣa miras ⱪilip bǝrdim. Xunga uningdin ⱨeqnemini sanga miras ⱪilip bǝrmǝymǝn› dedi.

20 — Ⱪǝdimki zamanda Refa’iylar u yǝrdǝ turƣaqⱪa, bu zeminmu Refa’iylarning zemini bolup ⱨesablinatti. Ammoniylar ularni Zamzummiylar dǝp ataytti. 21 Ular Anaⱪiylarƣa ohxax sani kɵp, boyi egiz, küqlük bir hǝlⱪ idi. Lekin Pǝrwǝrdigar ularni Ammoniylarning aldida wǝyran ⱪilƣaqⱪa, Ammoniylar ularni ⱨǝydǝp qiⱪirip, ularning zeminida olturaⱪlaxti. 22 Xuningƣa ohxax Pǝrwǝrdigar Se’irda turƣan Əsaw ⱪǝbilisi üqünmu ohxax ix ⱪilip, ularning aldida Horiylarni wǝyran ⱪilip taxlidi. Əsaw ⱪǝbilisi ularning zeminini igiliwelip, bügünki küngiqǝ u yǝrdǝ yaxap kǝlmǝktǝ. 23 Xuningdǝk Gazaƣiqǝ sozulƣan kǝntlǝrdǝ yaxiƣan Awwiylarni Kaftoriylar wǝyran ⱪildi. Ular Kaftordin qiⱪip kelip, ularning zeminida olturaⱪlaxti. —

24 Pǝrwǝrdigar yǝnǝ mundaⱪ dedi: ‹Əmdi ⱪozƣilip, Arnon jilƣisidin ɵtünglar. Mana, Mǝn Hexbonning padixaⱨi Amoriy Sihon wǝ uning zeminini ⱪolungƣa tapxurup bǝrdim. Ixni baxlanglar, zeminini igilǝxkǝ, uning bilǝn jǝng ⱪilixⱪa qiⱪinglar. 25 Bügündin baxlap Mǝn asmanning astidiki ⱨǝmmǝ hǝlⱪlǝrning üstigǝ silǝrning dǝⱨxitinglarni wǝ wǝⱨimǝnglarni salimǝn. Xundaⱪki, ular silǝr toƣrisidiki hǝwǝrni anglisa, silǝrdin ⱪorⱪup titrixidu› dedi Pǝrwǝrdigar.

26 Xu qaƣda mǝn Ⱪademot qɵlidin Hexbon padixaⱨi Sihonƣa ǝlqilǝr ǝwǝtip, tinqliⱪ salimi yollap: 27 ‹Zeminingdin ɵtüp ketixkǝ manga ijazǝt bǝrgin. Mǝn udul qong yol bilǝn mengip, nǝ ongƣa, nǝ solƣa burulmaymǝn. 28 Yǝydiƣan ozuⱪumni manga pulƣa setip bǝrgin, iqidiƣan süyümnimu manga pulƣa setip bǝrgin. Pǝⱪǝtla piyadǝ mengip ɵtmǝkqimǝn. 29 Se’irda olturuxluⱪ Əsaw ⱪǝbilisi wǝ Arda olturuxluⱪ Mo’abiylar manga xundaⱪ ijazǝt bǝrdi. Mǝn bolsam, I’ordan dǝryasidin ɵtüp Pǝrwǝrdigar Hudayimiz bizgǝ beridiƣan zeminƣa kirmǝkqimǝn› dedim.

30 Lekin Hexbon padixaⱨi Sihon bizning ɵz zeminidin ɵtüximizgǝ yol ⱪoymidi. Qünki Pǝrwǝrdigar Hudaying uning roⱨini ⱪaturup, uni sening ⱪolungƣa tapxurux üqün kɵnglini ⱪattiⱪ ⱪildi. Bügünki ǝⱨwal dǝrwǝⱪǝ xundaⱪ. 31 Pǝrwǝrdigar manga: ‹Mana, Mǝn ǝmdi Sihon wǝ uning zeminini ⱪolungƣa tapxurup berixkǝ baxlidim. Xuning üqün uning zeminini igiliwelixkǝ baxliƣin› dedi. 32 Sihon ⱨǝmmǝ hǝlⱪini elip, bizgǝ ⱪarxi jǝng ⱪilixⱪa Yaⱨazƣa kǝldi. 33 Lekin Pǝrwǝrdigar Hudayimiz uni ⱪolimizƣa tapxurup bǝrgǝqkǝ, biz uni wǝ oƣullirini wǝ ⱨǝmmǝ hǝlⱪini mǝƣlup ⱪilduⱪ. 34 Biz uning pütün xǝⱨǝrlirini elip, ⱨǝmmǝ xǝⱨǝrliridiki ǝr-ayal wǝ balilarni yoⱪitip, ⱨeqkimni tirik ⱪaldurmay, 35 pǝⱪǝt qarwa mal wǝ biz igiliwalƣan xǝⱨǝrlǝrdiki mal-mülkni ɵzimiz üqün olja alduⱪ. 36 Xundaⱪki, Arnon dǝryasining boyidiki Aro’ǝrdin wǝ Arnon jilƣisidiki xǝⱨǝrdin tartip Giliyadⱪiqǝ bizgǝ ⱪarxi turalaydiƣan xǝⱨǝr tepilmidi. Pǝrwǝrdigar Hudayimiz ⱨǝmmisini ⱪolimizƣa tapxurup bǝrdi. 37 Pǝⱪǝtla Ammoniylarning zeminiƣa, yǝni Yabboⱪ wadisiƣa wǝ taƣlardiki xǝⱨǝrlǝrgǝ yaki Pǝrwǝrdigar Hudayimiz bizgǝ mǝn’i ⱪilƣan ⱨeqⱪaysi yǝrgǝ yeⱪin kǝlmidinglar.