3
1 Andin biz burulup mengip Baxanƣa ⱪarap yol alduⱪ. Əmma Baxanning padixaⱨi Og ⱨǝmmǝ hǝlⱪini elip qiⱪip, bizgǝ ⱪarxi jǝng ⱪilixⱪa Ədrǝygǝ kǝldi. 2 Andin Pǝrwǝrdigar manga: ‹Sǝn uningdin ⱨeq ⱪorⱪmiƣin, qünki Mǝn uni ⱨǝmmǝ hǝlⱪi wǝ zemini bilǝn ⱪoxup sening ⱪolungƣa tapxurup bǝrdim. Sǝn Hexbonda turuxluⱪ Amoriylarning padixaⱨi Sihonƣa ⱪilƣiningni uningƣimu ⱪilisǝn› dedi. 3 Deginidǝk Pǝrwǝrdigar Hudayimiz Baxanning padixaⱨi Ogni ⱨǝmmǝ hǝlⱪi bilǝn ⱪoxup ⱪolimizƣa tapxurup bǝrginidǝ, biz ularning birini ⱪoymay ⱪirip taxliduⱪ, 4 uning ⱨǝmmǝ xǝⱨǝrlirinimu alduⱪ. Ulardin almiƣan birmu xǝⱨǝr ⱪalmidi. Bu tǝriⱪidǝ biz atmix xǝⱨǝr elip, Baxandiki Ogning padixaⱨliⱪi bolƣan Argob zeminining ⱨǝmmisini igiliwalduⱪ. 5 Bu xǝⱨǝrlǝrning ⱨǝmmisi egiz sepillar wǝ taⱪaⱪliⱪ dǝrwazilar bilǝn mustǝⱨkǝmlǝngǝnidi. Buningdin baxⱪa, sepilsiz intayin kɵp yezilarmu bar idi. 6 Biz ularni yoⱪattuⱪ, huddi Hexbonning padixaⱨi Sihonƣa ⱪilƣinimizdǝk, ⱨǝmmǝ xǝⱨǝrlǝrdiki ǝrlǝr, ayallar wǝ balilarni yoⱪitiwǝttuⱪ. 7 Əmma ⱨǝmmǝ qarwa mal wǝ biz igiliwalƣan xǝⱨǝrlǝrdiki mal-mülükni ɵzimiz üqün olja ⱪilip alduⱪ. 8 Bu tǝriⱪidǝ biz Arnon jilƣisining u tǝripidiki Amoriylarning ikkila padixaⱨining ⱪolidin, Arnon jilƣisidin tartip Hǝrmon teƣiƣiqǝ bolƣan zeminini tartiwalduⱪ. 9 Sidoniylar Hǝrmon teƣiƣa Siryon dǝp, Amoriylar bolsa Senir dǝp at ⱪoyƣanidi. 10 Biz tüzlǝngliktiki ⱨǝmmǝ xǝⱨǝrlǝrni, pütün Giliyad wǝ Baxanni, taki Salka wǝ Ədrǝygiqǝ Baxandiki Ogning padixaⱨliⱪining xǝⱨǝrlirini igiliwalduⱪ. 11 Refa’iylarning nǝslidin pǝⱪǝtla Baxanning padixaⱨi Og ⱪalƣanidi. Uning yatⱪan orni tɵmürdin yasalƣan kariwat bolup, uzunluⱪi adǝm gezidǝ toⱪⱪuz gǝz, kǝngliki tɵt gǝz idi. U kariwat Ammoniylarning Rabba degǝn xǝⱨiridǝ ⱨazirmu bar. ◼
12 Biz mǝzkur zeminni igiliwalƣandin keyin, mǝn Arnon jilƣisining yenidiki Aro’ǝr wǝ Giliyadning taƣliⱪ zeminining yerimini, xǝⱨǝrliri bilǝn ⱪoxup Rubǝniylǝr wǝ Gadiylarƣa tǝⱪdim ⱪildim. 13 Andin Giliyadning ⱪalƣan ⱪismi wǝ Ogning padixaⱨliⱪi bolƣan pütün Baxanni mǝn Manassǝning yerim ⱪǝbilisigǝ tǝⱪdim ⱪildim. Pütün Argob zemini wǝ pütün Baxan, Refa’iylarning zemini dǝp atilatti. 14 Manassǝning oƣli Ya’ir Gǝxuriylar wǝ Ma’akaylarning qegriliriƣiqǝ pütün Argob zeminini elip, Baxanni ɵz ismi bilǝn Ya’ir kǝntliri dǝp atidi. Baxan zemini bügünki küngiqǝ xundaⱪ dǝp atilip kǝlmǝktǝ. 15 Giliyadni bolsa Makirƣa tǝⱪdim ⱪildim.
16 Rubǝniylǝr wǝ Gadiylarƣa mǝn Giliyadning zeminidin Arnon dǝryasiƣiqǝ, wadining otturisini qegra ⱪilip, taki Ammoniylarning qegrisi bolƣan Yabboⱪ dǝryasiƣiqǝ bolƣan zeminni tǝⱪdim ⱪildim. 17 Buningdin baxⱪa, Kinnǝrǝt kɵlidin tartip xǝrⱪ tǝrǝptiki Pisga taƣliⱪining etikidiki Xor Dengizƣiqǝ sozulƣan tüzlǝnglikni, qegra bolƣan I’ordan dǝryasini ⱪoxup, ularƣa tǝⱪdim ⱪildim.
18 Xu qaƣda mǝn silǝrgǝ: ‹Hudayinglar Pǝrwǝrdigar uningƣa igidarqiliⱪ ⱪilix üqün silǝrgǝ bu zeminni bǝrdi, silǝr, yǝni aranglardiki jǝnggǝ layiⱪ bolƣanlar, ⱪorallinip ⱪerindaxliringlar Bǝni Isra’ilning aldida dǝryadin ɵtünglar. 19 Pǝⱪǝt ayalliringlar wǝ baliliringlar wǝ kɵp bolƣan qarwa malliringlar mǝn silǝrgǝ bǝrgǝn xǝⱨǝrlǝrdǝ ⱪalsun. 20 Taki Pǝrwǝrdigar silǝrgǝ aram bǝrgǝndǝk, ⱪerindaxliringlarƣimu aram bǝrgüqǝ wǝ ular Hudayinglar Pǝrwǝrdigar ularƣa beridiƣan I’ordan dǝryasining u tǝripidiki zeminni igiliwalƣuqǝ, bu yǝrdǝ turup tursun. Andin keyin mǝn silǝrgǝ tǝⱪsim ⱪilƣan zemininglarƣa ⱪaytisilǝr. Ⱨǝrbiringlar ɵz zemininglarƣa ⱪaytinglar› dǝp buyrudim. 21 Ayni qaƣda mǝn Yǝxu’aƣa: ‹Sǝn Hudayinglar Pǝrwǝrdigar bu ikki padixaⱨⱪa ⱪilƣinining ⱨǝmmisini Ɵz kɵzliring bilǝn kɵrdüng. Sǝn ⱪǝyǝrgǝ barsang, Pǝrwǝrdigar u yǝrdiki padixaⱨliⱪlarning ⱨǝmmisigǝ xundaⱪ ⱪilidu. 22 Ulardin ⱨeq ⱪorⱪmanglar, qünki Hudayinglar Pǝrwǝrdigar silǝr üqün jǝng ⱪilidu› dǝp buyrudum.
23 U qaƣda mǝn Pǝrwǝrdigarƣa du’a ⱪilip: 24 ‹Əy Rǝbbim Pǝrwǝrdigar, Sǝn Ɵz hizmǝtkaringƣa uluƣluⱪung wǝ ⱪudrǝtlik ⱪolungni kɵrsǝtting. Qünki asmanda wǝ yǝrdǝ Sening ⱪilƣan uluƣ ixliringni ⱪilalaydiƣan ilaⱨ barmu? 25 Əmdi manga u tǝrǝpkǝ ɵtüp, I’ordan dǝryasining yenidiki yahxi zeminni, u yahxi taƣliⱪ zeminni wǝ Liwanni kɵrüxni nesip ⱪilƣaysǝn› dep ɵtündüm. 26 Lekin Pǝrwǝrdigar silǝr üqün manga ƣǝzǝplǝngǝqkǝ, manga ⱪulaⱪ salmay, bǝlki manga: ‹Əmdi boldi! Bu ix toƣrisida Manga yǝnǝ sɵz ⱪilmiƣin. 27 Sǝn Pisganing qoⱪⱪisiƣa qiⱪip, kɵzliring bilǝn ƣǝrb, ximal, jǝnub wǝ xǝrⱪ tǝrǝplǝrgǝ nǝzǝr salƣin, qünki sǝn bu I’ordan dǝryasidin ɵtmǝysǝn. 28 Əmma Yǝxu’ani wǝzipigǝ tǝyinligin, uni jür’ǝtlik boluxⱪa riƣbǝtlǝndürgin. Qünki u bu hǝlⱪning aldida dǝryadin ɵtidu wǝ uning arⱪiliⱪ ular sǝn kɵridiƣan zeminni igilǝydu› dedi.
29 Xuning bilǝn biz Bǝyt-Pe’orning udulidiki wadida turup ⱪalduⱪ.