1 Əmdi, ǝy Isra’il, mǝn silǝrgǝ bildüridiƣan ⱪanun wǝ ǝⱨkamlarni anglap ǝmǝl ⱪilsanglar, ⱨayatliⱪ tepip, ata-bowiliringlarning Hudasi Pǝrwǝrdigar silǝrgǝ beridiƣan zeminƣa kirip, uni igiliwalisilǝr. 2 Silǝr mǝn silǝrgǝ buyruƣanƣa ⱨeqnemini ⱪoxmay, uningdin ⱨeqnemini ⱨǝm kemǝytmǝy, mǝn silǝrgǝ buyruƣan Hudayinglar Pǝrwǝrdigarning ǝmrlirigǝ ǝmǝl ⱪilinglar. 3 Pǝrwǝrdigarning Ba’al-Pe’orning sǝwǝbidin nemǝ ⱪilƣinini ɵz kɵzünglar bilǝn kɵrdünglar, Hudayinglar Pǝrwǝrdigar Ba’al-Pe’orƣa ǝgǝxkǝnlǝrning ⱨǝmmisini aranglardin yoⱪitiwǝtti. 4 Lekin silǝr, yǝni Hudayinglar Pǝrwǝrdigarƣa baƣlanƣanlar, bügünki küngiqǝ ⱨayat ⱪaldinglar. 5 Mana, mǝn Pǝrwǝrdigar Hudayimning manga buyruƣinidǝk, silǝr igilǝydiƣan zeminƣa kirgininglarda ǝmǝl ⱪilixinglar üqün silǝrgǝ ⱪanun wǝ ǝⱨkamlarni ɵgǝttim. 6 Əmdi silǝr ularƣa ri’ayǝ ⱪilip ǝmǝl ⱪilinglar. Xundaⱪ ⱪilsanglar, hǝlⱪlǝrning aldida ⱨekmǝt wǝ ǝⱪil-parasitinglar axkara bolidu wǝ ular pütün bu ⱪanunlarni angliƣinida: ‹Mana bu uluƣ hǝlⱪ ⱨǝⱪiⱪǝtǝn dana wǝ ǝⱪildar bir hǝlⱪ ikǝn› dǝydu. 7 Qünki Pǝrwǝrdigar Hudayimiz ⱨǝr ⱪetim du’a ⱪilƣinimizda bizgǝ yeⱪin bolƣandǝk, tǝngrisi ɵzigǝ xunqǝ yeⱪin bolƣan baxⱪa bir uluƣ hǝlⱪ barmu? 8 Mǝn bügün aldinglarƣa ⱪoyƣan bu ⱪanunƣa ohxax adil bǝlgilimiliri wǝ ǝⱨkamliri bar uluƣ bir hǝlⱪ tepilamdu?

9 Lekin silǝr eⱨtiyat ⱪilip, ɵzünglarni qing saⱪlanglar. Ɵz kɵzünglar bilǝn kɵrgǝn ixlarni ⱨǝrgiz untup ⱪalmanglar, ularni ɵmrünglardiki barliⱪ künlǝrdǝ yadinglardin qiⱪarmanglar, uni baliliringlar wǝ nǝwriliringlarƣa bildürünglar.

10 Silǝr Horeb teƣining yenida Pǝrwǝrdigar Hudayinglarning aldida turƣan küni Pǝrwǝrdigar manga: ‹Sɵzlirimni anglitixim üqün hǝlⱪni aldimda yiƣⱪin. Ular sɵzlirimni anglap, yǝr yüzidǝ yaxaydiƣan barliⱪ künliridǝ Mǝndin ⱪorⱪup turuxni ɵgǝnsun xundaⱪla baliliriƣimu ɵgǝtsun› dedi. 11 Silǝr yeⱪinlixip taƣning tüwidǝ turdunglar. Taƣda ot kɵyüwatatti, uning yalⱪuni asmanƣa taⱪaxⱪanidi wǝ ⱪarangƣuluⱪ, bulut wǝ zulmǝt taƣni ⱪapliƣanidi.

12 Pǝrwǝrdigar silǝrgǝ ot iqidin sɵz ⱪildi. Silǝr sɵzlǝrning sadasini anglidinglar, ǝmma xǝkil kɵrmidinglar, pǝⱪǝt bir awazni anglidinglar. 13 U silǝrgǝ ǝmǝl ⱪilixni buyruƣan ǝⱨdisini, yǝni on ǝmrni, bayan ⱪilip, bularni ikki tax tahtiƣa oyup yazdi. 14 Əyni qaƣda Pǝrwǝrdigar manga, silǝr berip igilǝydiƣan zemininglarda ǝmǝl ⱪilidiƣan ⱪanun wǝ ǝⱨkamlarni silǝrgǝ ɵgitixni buyrudi.

15 Pǝrwǝrdigar Horebta ot iqidin silǝrgǝ sɵz ⱪilƣan kündǝ silǝr ⱨeqⱪandaⱪ xǝkil kɵrmidinglar, xunga agaⱨ bolup, 16 ɵzünglarni bulƣaxtin saⱪlanglar. Mǝyli ǝr kixining süritidǝ, mǝyli ayal kixining süritidǝ bolsun, ⱨeqⱪandaⱪ but ⱨǝykilini yasimanglar. 17 Mǝyli yǝr yüzidiki qarwining süritidǝ, mǝyli ⱨawada uqidiƣan ⱪanatliⱪ ⱪuxning süritidǝ, 18 mǝyli yǝrdǝ ɵmiligüqi janiwarning süritidǝ, mǝyli yǝr astidiki sularning beliⱪining süritidǝ bolsun, ⱨeqⱪandaⱪ but-ⱨǝykǝl yasimanglar. 19 Silǝr bexinglarni kɵtürüp asmanƣa ⱪarap, kün, ay wǝ yultuzlarni, yǝni asmanning pütün saⱨiblirini kɵrsǝnglar, aldinip ularƣa sǝjdǝ ⱪilip ibadǝt ⱪilixni baxlimanglar, qünki Pǝrwǝrdigar Hudayinglar bularni asmanning tegidiki barliⱪ hǝlⱪlǝrgǝ tǝⱪsim ⱪilip bǝrgǝn. 20 Əmma Pǝrwǝrdigar huddi bügüngǝ ohxax silǝrni: ‹Ular mening miras hǝlⱪim bolsun› dǝp tɵmür humdanliridin, Misirdin elip qiⱪti.

21 Əmma Pǝrwǝrdigar silǝrning sǝwǝbinglardin manga aqqiⱪlinip: ‹Sǝn I’ordan dǝryasidin ɵtmǝysǝn wǝ Pǝrwǝrdigar Hudaying sanga miras ⱪilip beridiƣan yahxi zeminƣa kirmǝysǝn› dǝp ⱪǝsǝm ⱪildi. 22 Xunga mǝn I’ordan dǝryasidin ɵtmǝy, bu yǝrda ɵlimǝn. Əmma silǝr I’ordan dǝryasidin ɵtüp, u yahxi zeminni igilǝysilǝr. 23 Hudayinglar Pǝrwǝrdigarning silǝr bilǝn tüzgǝn ǝⱨdisini untuxtin eⱨtiyat ⱪilinglar. Ɵzünglar üqün ⱨǝrⱪandaⱪ nǝrsining süritidǝ bir but yasap, Hudayinglar Pǝrwǝrdigarning mǝn’i ⱪilƣinini ⱪilmanglar. 24 Qünki Pǝrwǝrdigar Hudaying ⱪizƣinidiƣan Huda bolup, yalmap ketidiƣan bir ottǝktur.

25 Əgǝr silǝr u zeminda uzun waⱪit turup, pǝrzǝntlǝr wǝ nǝwrilǝr kɵrgǝndin keyin buzulup, ⱨǝrⱪandaⱪ nǝrsining süritidǝ bir but ⱨǝykilini yasap, Pǝrwǝrdigar Hudayinglarning nǝziridǝ yaman bolƣanni ⱪilip, Uning aqqiⱪini kǝltürsǝnglar, 26 mǝn bügün silǝrgǝ ⱪarxi asman wǝ yǝrni guwaⱨqi ⱪilip kǝltürüp, eytimǝnki: Silǝr I’ordan dǝryasidin ɵtüp, berip igiliwalidiƣan zeminda tezla ⱨalak bolisilǝr. U yǝrdǝ uzun yaximay, yoⱪilip ketisilǝr. 27 Pǝrwǝrdigar silǝrni yat ǝllǝr arisiƣa qeqiwetidu. Silǝr Pǝrwǝrdigar silǝrni arisiƣa ⱨǝydiwǝtkǝn ǝllǝr iqidǝ az sanliⱪ hǝlⱪ bolup ⱪalisilǝr. 28 Silǝr u yǝrdǝ turup, adǝm ⱪoli bilǝn yaƣaq wǝ taxtin yasalƣan butlarƣa ibadǝt ⱪilidiƣan bolisilǝr. Ular ya anglimaydu, ya kɵrmǝydu, ya yemǝydu, ya purimaydu.

29 Andin silǝr u yǝrdǝ Hudayinglar Pǝrwǝrdigarni izdǝysilǝr. Əgǝr pütün ⱪǝlbinglar wǝ pütün jeninglar bilǝn izdisǝnglar, Uni tapisilǝr. 30 Silǝr keyinki künlǝrdǝ azab-oⱪubǝtkǝ uqrap, bularning ⱨǝmmisi bexinglarƣa kǝlginidǝ ɵz Pǝrwǝrdigar Hudayinglarƣa ⱪaytip, Uning sɵzigǝ ⱪulaⱪ salisilǝr. 31 Qünki Pǝrwǝrdigar Hudaying rǝⱨimdil Huda bolƣaq, U silǝrni taxlap ⱨalak ⱪilmaydu, ⱪǝsǝm ⱪilip ata-bowiliringlar bilǝn tüzgǝn ǝⱨdisini untumaydu.

32 Huda yǝr yüzidǝ insanni yaratⱪandin tartip silǝrdin ilgiri ɵtkǝn zamanlar toƣrisida sorap beⱪinglar. Asmanning bir qetidin yǝnǝ bir qetigiqǝ mundaⱪ bir qong wǝⱪǝ bolƣanmu, buningƣa ohxax bir ix anglanƣanmu? 33 Silǝrgǝ ohxax otning iqidin Hudaning awazini anglap ⱨayat ⱪalƣan bir hǝlⱪ barmu? 34 Yaki Hudayinglar Pǝrwǝrdigar silǝr üqün Misirda kɵz aldinglarda ⱪilƣan barliⱪ ixliridǝk, birǝr tǝngri ɵz hǝlⱪini yǝnǝ bir hǝlⱪning arisidin qiⱪirix üqün balayi’apǝt ǝwǝtip, karamǝt wǝ mɵjizilǝrni kɵrsitip, jǝng qiⱪirip, küqlük ⱪoli wǝ ⱪudrǝtlik bilikini uzitip, bundaⱪ qong wǝⱨimilik ixlarni yaratⱪan? 35 Bular, pǝⱪǝtla Pǝrwǝrdigar Hudadur wǝ Uningdin baxⱪisi yoⱪtur dǝp bilixinglar üqün silǝrgǝ kɵrsitildi. 36 Silǝrgǝ tǝlim berix üqün U asmandin silǝrgǝ awazini anglatti wǝ yǝrdǝ Ɵzining uluƣ otini silǝrgǝ kɵrsǝtti. Silǝr Uning sɵzini otning iqidin anglidinglar. 37 U silǝrning ata-bowiliringlarni yahxi kɵrgǝqkǝ, ularning nǝsillirini tallap, silǝr bilǝn billǝ bolup, uluƣ ⱪudriti bilǝn silǝrni Misirdin elip qiⱪti. 38 U silǝrdin qong wǝ ⱪudrǝtlikrǝk hǝlⱪlǝrni aldinglardin ⱪoƣlap, silǝrni ularning zeminiƣa kirgüzüp, huddi bügünkidǝk uni silǝrgǝ miras ⱪilip bǝrdi. 39 Xunga, bügün Pǝrwǝrdigarning yuⱪiridiki asmanda wǝ tɵwǝndiki yǝr yüzidǝ Huda ikǝnlikini wǝ uningdin baxⱪisi yoⱪluⱪini bilip, buni kɵnglünglarda saⱪlanglar. 40 Silǝr wǝ silǝrdin keyinki baliliringlarning raⱨǝt yaxixi üqün wǝ Pǝrwǝrdigar Hudayinglar ǝbǝdkiqǝ silǝrgǝ beridiƣan zeminda uzun ɵmür kɵrüxünglar üqün, mǝn bügünki kündǝ silǝrgǝ beridiƣan ⱪanun wǝ buyruⱪlarƣa ǝmǝl ⱪilinglar».

41 Andin Musa I’ordan dǝryasining xǝrⱪiy tǝripidǝ üq xǝⱨǝrni ajratti. 42 Adawǝtsiz, ⱪǝstsiz bir adǝmni ɵltürüp ⱪoyƣan kixi bu xǝⱨǝrlǝrning birigǝ ⱪeqip barsa, ⱨayat ⱪalidu. Bu xǝⱨǝrlǝr: 43 Rubǝn ⱪǝbilisi üqün qɵlning tüzlǝnglikidiki Bezǝr, Gad ⱪǝbilisi üqün Giliyadtiki Ramot wǝ Manassǝ ⱪǝbilisi üqün Baxandiki Golandur.

44 Mana bu Musa Bǝni Isra’il aldiƣa ⱪoyƣan ⱪanundur, 45 bular Misirdin qiⱪⱪandin keyin Musa Bǝni Isra’ilƣa jakarliƣan yolyoruⱪ, ⱪanun wǝ ǝⱨkamlardur. 46 Musa buni Bǝyt-Pe’orning udulida, I’ordan dǝryasining xǝrⱪiy tǝripidiki wadida, yǝni Bǝni Isra’il Misirdin qiⱪⱪandin keyin mǝƣlup ⱪilƣan, Hexbonda turƣan Amoriylarning padixaⱨi Sihonning zeminida jakarliƣanidi. 47 Ular mǝzkur padixaⱨning zemini wǝ Baxanning padixaⱨi Ogning zeminini, yǝni I’ordan dǝryasining xǝrⱪiy tǝripidiki Amoriylarning bu ikki padixaⱨining zeminlirini igiliwalƣanidi. 48 Bularning zemini Arnon jilƣisining yenidiki Aro’ǝrdin tartip Siy’on teƣi, yǝni Hǝrmonƣiqǝ sozulatti, 49 xundaⱪla Pisga taƣliⱪining baƣriƣa jaylaxⱪan tüzlǝnglik dengiziƣiqǝ sozulup, I’ordan dǝryasining bu yaⱪisida bolƣan xǝrⱪ tǝripidiki tüzlǝnglik ɵz iqigǝ alatti.