1 Musa Isra’ilning ⱨǝmmisini jǝm ⱪilip, ularƣa mundaⱪ dedi: «Əy Isra’il, mǝn bügün silǝrgǝ buyruydiƣan ⱪanun wǝ ǝⱨkamlarni ⱪulaⱪ selip anglanglar, ularni ɵginip, kɵngül ⱪoyup ularƣa ǝmǝl ⱪilinglar. 2 Pǝrwǝrdigar Hudayimiz Horebta biz bilǝn bir ǝⱨdǝ tüzdi. 3 Bu ǝⱨdini Pǝrwǝrdigar bizning ata-bowilirimiz bilǝn tüzmidi, bǝlki biz bilǝn, tehi ⱨayat bolup, bügün bu yǝrdǝ turƣanlar bilǝn tüzdi. 4 Pǝrwǝrdigar taƣda ot iqidin yüzmu-yüz turup silǝrgǝ sɵz ⱪildi. 5 Silǝr ottin ⱪorⱪup taƣⱪa qiⱪmiƣaqⱪa, mǝn silǝrgǝ Pǝrwǝrdigarning eytⱪanlirini yǝtküzüx üqün Pǝrwǝrdigar bilǝn silǝrning otturanglarda turdum. U mundaⱪ dedi:

6 ‹Mǝn silǝrni Misirdin, ⱪulluⱪ makanidin elip qiⱪⱪan Pǝrwǝrdigar Hudayinglardurmǝn. 7 Mǝndin baxⱪa ⱨeqⱪandaⱪ ilaⱨing bolmisun. 8 Ɵzüng üqün, mǝyli yuⱪirida asmandiki nǝrsilǝrdin bolsun, mǝyli tɵwǝndǝ yǝrdiki yaki yǝr astida sulardiki nǝrsilǝrdin bolsun, ⱨeqbirining xǝklidǝ but yasimiƣin. 9 Ularƣa sǝjdǝ ⱪilip ibadǝt ⱪilmiƣin. Qünki Mǝn Pǝrwǝrdigar Hudaying ⱪizƣinidiƣan Hudadurmǝn. Meni yaman kɵrgǝnlǝrning baliliriƣa, ⱨǝtta üqinqi-tɵtinqi nǝsligiqǝ, ata-bowiliri ⱪilƣan gunaⱨlirining aⱪiwitini kǝltürimǝn. 10 Lekin Meni sɵyidiƣan wǝ Mening ǝmrlirimgǝ ǝmǝl ⱪilidiƣanlarƣa nǝqqǝ ming ǝwladiƣiqǝ mǝrⱨǝmǝt kɵrsitimǝn.

11 Pǝrwǝrdigar Hudayingning namini biⱨudǝ ixlǝtmigin, qünki Pǝrwǝrdigar Uning namini biⱨudǝ ixlǝtküqini jazasiz ⱪoymaydu.

12 Pǝrwǝrdigar Hudaying sanga buyruƣinidǝk xabat künigǝ ri’ayǝ ⱪilƣin, uni muⱪǝddǝs dǝp bilgin. 13 Altǝ kün ixlǝp, ⱨǝmmǝ ixliringni ⱪilƣin. 14 Lekin yǝttinqi küni Pǝrwǝrdigar Hudayingning xabat küni bolƣaqⱪa, u kündǝ, mǝyli sǝn ɵzüng, oƣul-ⱪizliring yaki ⱪul-dedikliring bolsun, mǝyli kaliliring, exǝkliring yaki baxⱪa qarwa malliring wǝ yaki dǝrwaziliringlar iqidǝ turuwatⱪan musapirlar bolsun, ⱨeqkim ⱨeqⱪandaⱪ ix ⱪilmisun. Xundaⱪ ⱪilsang, ⱪul wǝ dedǝkliringmu sanga ohxax aram alalaydu. 15 Ɵzüngning Misir zeminida ⱪul bolƣiningni wǝ Pǝrwǝrdigar Hudayingning küqlük ⱪoli wǝ uzitilƣan biliki bilǝn seni u yǝrdin elip qiⱪⱪinini yadingda saⱪliƣin. Xuning üqün Pǝrwǝrdigar Hudaying sanga xabat künigǝ ri’ayǝ ⱪilixni buyrudi.

16 Pǝrwǝrdigar Hudayingning sanga buyruƣinidǝk atang wǝ anangƣa ⱨɵrmǝt ⱪilƣin. Xundaⱪ ⱪilsang, sǝn Pǝrwǝrdigar Hudaying sanga beridiƣan zeminda uzun ɵmür kɵrüp, raⱨǝttǝ yaxaysǝn.

17 Ⱪatilliⱪ ⱪilmiƣin.

18 Zina ⱪilmiƣin.

19 Oƣriliⱪ ⱪilmiƣin.

20 Ⱪoxnangning üstidin yalƣan guwaⱨliⱪ bǝrmigin. 21 Ⱪoxnangning ayalini tama ⱪilmiƣin, ⱪoxnangning ɵyi, etizi, ⱪuli, dediki, kalisi, exiki yaki ⱪoxnangning ⱨeqⱪandaⱪ baxⱪa nǝrsisigǝ kɵz ⱪiringni salmiƣin›.

22 Pǝrwǝrdigar bu sɵzlǝrni taƣda ot, bulut wǝ ⱪarangƣuluⱪning iqidin ünlük awaz bilǝn pütün jama’itinglarƣa sɵzlidi, baxⱪa ⱪoxumqǝ ⱪoxmidi. U bu sɵzlǝrni ikki danǝ tax tahtiƣa oyup yezip, manga bǝrdi. 23 Silǝr ⱪarangƣuluⱪning iqidin awazni anglap, taƣda ot kɵyüwatⱪanliⱪini kɵrgininglarda ⱪǝbililiringlarning ⱨǝmmǝ sǝrdarliri wǝ aⱪsaⱪalliri aldimƣa kelip: 24 ‹Mana, Pǝrwǝrdigar Hudayimiz Ɵz xan-xǝripi wǝ uluƣluⱪini bizgǝ kɵrsitip, awazini otning iqidin anglatti. Biz Huda Ɵzi insanƣa sɵz ⱪilip, uni tirik ⱪaldurƣinini bügün kɵrduⱪ. 25 Nemǝ üqün biz ⱨazir ɵlüximiz kerǝk? Bu qong ot bizni yǝp ketidu. Əgǝr biz Pǝrwǝrdigar Hudayimizning sɵzini yǝnǝ anglisaⱪ, ɵlüp ketimiz. 26 Pütün tirik janlar iqidǝ bizgǝ ohxax, otning iqidin ⱨayat Hudaning awazini anglap, tirik ⱪalƣan kim bar? 27 Əmdi sǝn yeⱪin kelip, Pǝrwǝrdigar Hudayimizning ⱨǝmmǝ eytⱪinini anglap, Pǝrwǝrdigar Hudayimizning sanga eytⱪan barliⱪ sɵzlirini bizgǝ yǝtküzsǝng, biz anglap uningƣa ǝmǝl ⱪilimiz› dedinglar.

28 Silǝr manga gǝp ⱪiliwatⱪininglarda, ⱪilƣan sɵzliringlarni Pǝrwǝrdigar anglap, manga mundaⱪ dedi: ‹Mǝn bu hǝlⱪning sanga eytⱪan sɵzini anglidim. Ular obdan gǝp ⱪildi. 29 Kaxki ularda Mǝndin ⱪorⱪup, ⱨǝmixǝ Mening ǝmrlirimni tutidiƣan bir kɵngül bolsa idi, ular wǝ ǝwladliri ǝbǝdkiqǝ raⱨǝttǝ yaxaytti. 30 Əmdi sǝn berip ularƣa: «Ɵz qedirliringlarƣa ⱪaytinglar» degin. 31 Lekin sǝn ɵzüng bu yǝrdǝ Mening yenimda turƣin. Mǝn sanga sɵz ⱪilip, sǝn ularƣa ɵgitidiƣan barliⱪ ǝmr, ⱪanun wǝ ǝⱨkamlarni eytip berimǝn. Ular Mǝn ularƣa igidarqiliⱪ ⱪilixⱪa beridiƣan zeminda turƣinida bularning ⱨǝmmisigǝ ǝmǝl ⱪilsun›. 32 Xuning üqün silǝr ǝmdi Hudayinglar Pǝrwǝrdigarning silǝrgǝ buyruƣiniƣa ǝstayidil ǝmǝl ⱪilip, nǝ ongƣa, nǝ solƣa burulmay, 33 Hudayinglar Pǝrwǝrdigar silǝrgǝ buyruƣan yolda ⱨǝmixǝ mangsanglar, ⱨayatliⱪ tepip, raⱨǝttǝ yaxap, silǝr igiliwalidiƣan zeminda uzun ɵmür kɵrisilǝr.