1 Mana bular silǝr igilǝydiƣan zeminƣa barƣininglarda ǝmǝl ⱪilsun dǝp, mening silǝrgǝ ɵgitixim üqün Hudayinglar Pǝrwǝrdigarning tǝripidin buyrulƣan ǝmr, ⱪanun wǝ ǝⱨkamlardur. 2 Silǝr ɵzünglar, baliliringlar wǝ nǝwriliringlar ɵmrünglardiki ⱨǝmmǝ künlǝrdǝ Pǝrwǝrdigar Hudayinglardin ⱪorⱪup, Uning mǝn silǝrgǝ buyrup tapiliƣan ⱨǝmmǝ ⱪanun-bǝlgilimiliri wǝ ǝmrlirigǝ ri’ayǝ ⱪilsanglar, uzun ɵmür kɵrisilǝr. 3 Əmdi, ǝy Isra’il, ularni anglap, ularƣa ǝstayidil ǝmǝl ⱪilsanglar, raⱨǝttǝ yaxap, ata-bowiliringlarning Hudasi Pǝrwǝrdigar silǝrgǝ eytⱪandǝk, süt bilǝn ⱨǝsǝl eⱪip turidiƣan zeminda intayin awup ronaⱪ tapisilǝr.

4 Əy Isra’il, anglanglar: Pǝrwǝrdigar Hudayimiz, Pǝrwǝrdigar birdur. 5 Silǝr Pǝrwǝrdigar Hudayinglarni pütün ⱪǝlbinglar bilǝn, pütün jeninglar bilǝn, pütün küqünglar bilǝn sɵyünglar.

6 Mǝn bügün silǝrgǝ beridiƣan buyruⱪlirimni kɵnglünglarda saⱪlap, 7 ularni baliliringlarƣimu ɵgǝtkin. Silǝr ɵyünglarda oltursanglar, yolda mangsanglar, yatsanglar, ⱪopsanglar, ⱨǝr waⱪit ular toƣrisida sɵzlǝp turunglar. 8 Ularni ⱪolunglarƣa bir ǝslǝtmidǝk baƣlap, pexanǝnglarƣa bir bǝlgidǝk taⱪanglar. 9 Ularni ɵyünglardiki ixiklǝrning kexikigǝ wǝ dǝrwaziliringlarƣa pütüp yezip ⱪoyunglar.

10 Pǝrwǝrdigar Hudayinglar ⱪǝsǝm bilǝn ata-bowiliringlar Ibraⱨim, Is’ⱨaⱪ wǝ Yaⱪubⱪa silǝrgǝ berixkǝ wǝdǝ ⱪilƣan zeminƣa wǝ silǝr ⱪurmiƣan yahxi xǝⱨǝrlǝrgǝ silǝrni kirgüzüp, 11 silǝr toldurmiƣan ⱨǝr hil yahxi nemǝt bilǝn tolƣan ɵylǝr wǝ silǝr kolimiƣan, ilgiri kolanƣan ⱪuduⱪ wǝ silǝr yasimiƣan üzüm wǝ zǝytun baƣlirini silǝrgǝ bǝrginidǝ, uningdin yǝp toyisilǝr. 12 Xunga agaⱨ bolup, ⱪulluⱪ ɵyi bolƣan Misir zeminidin silǝrni elip qiⱪⱪan Pǝrwǝrdigarni untumanglar,

13 bǝlki Pǝrwǝrdigar Hudayinglardin ⱪorⱪup, Uningƣa ibadǝt ⱪilip, Uning nami bilǝn ⱪǝsǝm ⱪilinglar. 14 Silǝr baxⱪa ilaⱨlarƣa ǝgǝxmǝnglar, qɵrǝnglardiki hǝlⱪlǝrning ilaⱨlirining kǝynidin yürmǝnglar. 15 Qünki aranglardiki Pǝrwǝrdigar Hudayinglar ⱪizƣinidiƣan Huda bolƣaqⱪa, eⱨtiyat ⱪilix lazimdur. Pǝrwǝrdigar Hudayinglarning ƣǝzipi silǝrgǝ ⱪarxi ⱪozƣilip, silǝrni yǝr yüzidin yoⱪitiwǝtmisun.

16 Silǝr Hudayinglar Pǝrwǝrdigarni Massada siniƣininglardǝk, yǝnǝ sinimanglar, 17 Hudayinglar Pǝrwǝrdigar silǝrgǝ bǝrgǝn yolyoruⱪlirini wǝ ⱪanunlirini qing tutunglar. 18 Silǝr Pǝrwǝrdigarning nǝziridǝ toƣra wǝ yahxi bolƣanni ⱪilinglar. Əgǝr silǝr raⱨǝttǝ yaxap, Pǝrwǝrdigar ⱪǝsǝm bilǝn ata-bowiliringlarƣa wǝdǝ ⱪilƣan zeminƣa kirip uni igiliwelixni 19 wǝ Pǝrwǝrdigar eytⱪandǝk aldinglardin ⱨǝmmǝ düxmǝnliringlarni ⱨǝydiwetixni halisanglar, xundaⱪ ⱪilinglar.

20 Kǝlgüsidǝ oƣlung sǝndin: ‹Pǝrwǝrdigar Hudayimizning silǝrgǝ bǝrgǝn yolyoruⱪ, ⱪanun wǝ ǝⱨkamlirining mǝnisi nemidur?› dǝp sorisa, 21 sǝn oƣlungƣa jawab berip mundaⱪ degin: ‹Biz Misirda Fir’ǝwnning ⱪulliri iduⱪ, lekin Pǝrwǝrdigar bizni küqlük ⱪoli bilǝn Misirdin elip qiⱪti. 22 Pǝrwǝrdigar bizning kɵz aldimizda Misirda Fir’ǝwn wǝ uning ⱨǝmmǝ a’ilisidikilǝrning üstigǝ ⱨǝywǝtlik ⱨǝm dǝⱨxǝtlik karamǝtlǝr wǝ mɵjizilǝrni kɵrsǝtti. 23 U bizni Ɵzi ⱪǝsǝm bilǝn ata-bowilirimizƣa wǝdǝ ⱪilƣan zeminiƣa kirgüzüx üqün wǝ uni bizgǝ berix üqün, bizni Misirdin elip qiⱪti. 24 Pǝrwǝrdigar bizgǝ bu ⱨǝmmǝ ⱪanunlarƣa ǝmǝl ⱪilip, Pǝrwǝrdigar Hudayimizdin ⱪorⱪuxni buyrudi. Xundaⱪ ⱪilsaⱪ biz huddi bügünkidǝk tirik saⱪlinip, dawamliⱪ yahxiliⱪ kɵrimiz. 25 Əgǝr biz U bizgǝ buyruƣandǝk, Pǝrwǝrdigar Hudayimizning aldida bu ⱨǝmmǝ ǝmrlǝrgǝ ǝstayidil ǝmǝl ⱪilsaⱪ, bu bizning ⱨǝⱪⱪaniyliⱪimiz bolidu›.