1 Andin Musa Mo’abning tüzlǝnglikliridin Nebo teƣining üstigǝ, yǝni Yerihoning udulidiki Pisganing qoⱪⱪisiƣa qiⱪti. U yǝrdǝ Pǝrwǝrdigar uningƣa pütün zeminni kɵrsǝtti. U uningƣa Giliyadtin tartip Danƣiqǝ, 2 pütün Naftali, Əfra’im wǝ Manassǝning zeminini Yǝⱨuda zemini bilǝn ⱪoxup ƣǝrbtiki dengizƣiqǝ, 3 jǝnubiy zemin wǝ ‹Hormiliⱪ xǝⱨǝr› dǝp atalƣan Yeriho wadisining tüzlǝnglikidin Zo’arƣiqǝ, ⱨǝmmisini kɵrsǝtti. 4 Andin Pǝrwǝrdigar uningƣa: «Mǝn ⱪǝsǝm ⱪilip: ‹Buni sening nǝslinggǝ berimǝn› dǝp Ibraⱨim, Is’ⱨaⱪ wǝ Yaⱪubⱪa wǝdǝ ⱪilƣan zemin budur. Əmdi sanga uni ɵz kɵzüng bilǝn kɵrüxni nesip ⱪildim, lekin ɵzüng u yǝrgǝ kirǝlmǝysǝn» dedi.

5 Andin Pǝrwǝrdigarning hizmǝtkari Musa, Pǝrwǝrdigarning eytⱪinidǝk, u yǝrdǝ Mo’abning zeminida wapat boldi. 6 Wapat bolƣandin keyin, U uni Mo’abning zeminidiki wadida Bǝyt-Pe’orning udulida dǝpnǝ ⱪildi. Lekin uning ⱪǝbrisi ⱪǝyǝrdǝ ikǝnlikini bu waⱪitⱪiqǝ ⱨeqkim bilmǝydu. 7 Musa wapat bolƣan waⱪitta bir yüz yigirmǝ yaxⱪa kirgǝnidi, lekin kɵzliri ⱨeq ajizlixip ⱪalmiƣanidi, bǝdinining küqimu ⱨeq kemǝymigǝnidi. 8 Bǝni Isra’il Musa üqün Mo’abning tüzlǝnglikliridǝ ottuz küngiqǝ matǝm tutti. Xuning bilǝn Musa üqün matǝm tutup yiƣlaydiƣan künlǝr tügigǝnidi.

9 Musa ɵz ⱪollirini Nunning oƣli Yǝxu’aning üstigǝ ⱪoyƣaqⱪa, u ⱨekmǝtning roⱨi bilǝn tolƣanidi. Xundaⱪki, Bǝni Isra’il uningƣa ita’ǝt ⱪilip, Pǝrwǝrdigarning Musaƣa buyruƣinidǝk ⱪilip turdi. 10 Lekin Musadǝk Pǝrwǝrdigar bilǝn yüzmu-yüz sɵzlǝxkǝn bir pǝyƣǝmbǝr Isra’ilning iqidǝ ikkinqi qiⱪmidi. 11 Musa Pǝrwǝrdigar tǝripidin Misir zeminiƣa ǝwǝtilip, Uning buyruⱪi boyiqǝ Fir’ǝwn wǝ uning hizmǝtkarliriƣa wǝ pütün zeminiƣa ⱨǝmmǝ karamǝtlǝr wǝ mɵjizilǝrni kɵrsitip, 12 pütün Isra’il hǝlⱪining kɵz aldida uluƣ küq-ⱪudrǝt wǝ büyük ⱨǝywǝtlik ixlarni namayan ⱪildi.