1 Hudaning adimi bolƣan Musa wapatidin ilgiri Bǝni Isra’il üqün ⱪilƣan hǝyrlik du’a budur. 2 U mundaⱪ dedi: «Pǝrwǝrdigar Sinay teƣidin qiⱪip kelip,

Se’irdin ularƣa nur qeqip ayan bolup,

Paran teƣidin qaⱪnap zaⱨir boldi.

Nǝqqǝ ming muⱪǝddǝslǝrning arisida qiⱪip kǝldi.

Uning ong ⱪolida Isra’il üqün otluⱪ pǝrmani bar idi.

3 U hǝlⱪni sɵyidu.

Hǝlⱪ iqidiki ⱨǝmmǝ pak muⱪǝddǝs bǝndiliring sening ⱪolungdidur. Ular ayaⱪliring aldida olturup sɵzüngni ⱪobul ⱪilidu.

4 Musa bizgǝ bir ⱪanunni tapxurup,

Yaⱪubning jama’itigǝ miras ⱪilip bǝrdi.

5 Hǝlⱪning sǝrdarliri jǝm bolƣinida,

Isra’ilning ⱪǝbililiri bir bolup yiƣilƣinida,

Yǝxurunning bir padixaⱨi bar idi.

6 Rubǝn bolsa, ɵlmǝy ⱨayat ⱪalsun, adǝmlirimu azaymisun».

7 Yǝⱨuda toƣrisida u mundaⱪ dedi: «Əy Pǝrwǝrdigar, Yǝⱨudaning awazini angliƣin, uni ɵz hǝlⱪigǝ ⱪayturƣin. U ɵz ⱪoli bilǝn ular üqün kürǝx ⱪilidu. Əmdi Sǝn uningƣa düxmǝnlirigǝ ⱪarxi turuxi üqün mǝdǝt bolƣin».

8 Lawiy toƣrisida u mundaⱪ dedi: «‹Urim› wǝ ‹Tumim›liring Sening bu tǝⱪwadar bǝndǝnggǝ tǝgsun. Sǝn uni Massada sinap baⱪting, Mǝriba sulirining yenida uning bilǝn tartixting. ^◼  

9 U ɵz ata-anisi toƣrisida: ‹Ularƣa yüz-hatirǝ ⱪilmaymǝn› dedi, ɵz ⱪerindaxlirini ayimidi wǝ ɵz balilirini tonumidi, bǝlki Sening sɵzüngni tutup ǝⱨdǝngni saⱪlidi. 10 Mana, Lawiylar Yaⱪubⱪa ǝⱨkamliringni uⱪturup, Isra’ilƣa ⱪanunungni ɵgitidu. Ular Sening aldingda huxbuy isriⱪ kɵydüridu, ⱪurbangaⱨingƣa pütün kɵydürmǝ ⱪurbanliⱪlarni elip kelidu. 11 Əy Pǝrwǝrdigar, Lawiyning küqigǝ bǝrikǝt bǝrgin, ⱪollirining ixini ⱪobul ⱪilƣin. Uningƣa ⱪarxi turƣuqi wǝ uni ɵq kɵrgüqilǝrning bǝllirini ⱪopalmiƣudǝk ⱪilip sundurƣin».

12 Bǝnyamin toƣrisida u mundaⱪ dedi: «U Pǝrwǝrdigarning sɵygini bolƣaqⱪa, Pǝrwǝrdigar uningƣa ⱨǝmixǝ sayǝ bolsun. U Uning mürilirining otturisida makanlixip, Uning ⱪexida tinq-aman yaxisun». ^◼  

13 Yüsüp toƣrisida u mundaⱪ dedi: «Uning zeminini Pǝrwǝrdigar bǝrikǝtlik ⱪilsun. U asmanning esil nemǝtliri, xǝbnǝm wǝ yǝr tegidiki nemǝtlǝr bilǝn, 14 kündin ⱨasil bolidiƣan esil nemǝtlǝr wǝ aydin ⱨasil bolidiƣan esil nemǝtlǝr bilǝn, 15 ⱪǝdimki taƣlarning ⱪimmǝt baⱨa ƣǝziniliri wǝ mǝnggülük tɵpiliklǝrning esil nemǝtliri bilǝn, 16 yǝrning ⱨosuli wǝ pütün barliⱪi bilǝn, xuningdǝk tikǝnlik qatⱪalda olturƣuqining iltipati bilǝn bǝrikǝt tapsun. Bularning ⱨǝmmisi Yüsüpning bexiƣa, ɵz ⱪerindaxliridin ayrilƣanning qoⱪⱪisiƣa qüxsun. 17 Buⱪilirining arisida tunjisi uningƣa xǝrǝp kǝltüridu,

uning münggüzliri yawa kaliningkidǝk bolidu. Ular bilǝn u ⱨǝmmǝ hǝlⱪlǝrni, ⱨǝtta yǝrning qǝtliridǝ yaxaydiƣanlarnimu üsidu. Əfra’imning on mingliri xundaⱪ bolidu, Manassǝning minglirimu xundaⱪ bolidu». ^◼  

18 Zǝbulun toƣrisida u mundaⱪ dedi: «Əy Zǝbulun, sǝn texiƣa qiⱪsang, xadlanƣin. Əy Issakar, ɵz qedirliringda hux bolƣin. 19 Mana, ular hǝlⱪlǝrni taƣⱪa qaⱪirip, u yǝrdǝ ⱨǝⱪⱪaniyliⱪning ⱪurbanliⱪlirini sunidu. Ular dengizlarning bayliⱪi wǝ ⱪumƣa kɵmülgǝn hǝzinilǝrni qiⱪirip yiƣidu».

20 Gad toƣrisida u mundaⱪ dedi: «Gadⱪa bundaⱪ kǝngri zeminni bǝrgǝngǝ ⱨǝmdusana bolƣay. Gad, bir ⱪol wǝ kalla parqilaydiƣan qixi xirdǝk olturmaⱪta. 21 U yǝrdǝ ⱨɵkümranliⱪ ⱪilƣuqining ülüxi saⱪlanƣaq, u ɵzigǝ ǝng esil nesiwini talliwaldi. U hǝlⱪning sǝrdarliri bilǝn qiⱪip, Isra’il bilǝn billǝ Pǝrwǝrdigarning adalitini tiklǝp, ⱨɵkümlirini ijra ⱪildi».

22 Dan toƣrisida u mundaⱪ dedi: «Dan bolsa Baxandin sǝkrǝp qüxkǝn bir yax xirdǝktur».

23 Naftali toƣrisida u mundaⱪ dedi: «Əy yǝtküdǝk meⱨir-xǝpⱪǝtkǝ erixkǝn, Pǝrwǝrdigardin kǝlgǝn nemǝt bilǝn tolup kǝtkǝn Napⱨtali, sǝn ƣǝrb bilǝn jǝnubni ɵzünggǝ mülük ⱪilip igilǝysǝn».

24 Axǝr toƣrisida u mundaⱪ dedi: «Axǝr oƣullar arisida bǝrikǝtlik bolidu. U ɵz ⱪerindaxliridin iltipat kɵrsun, ɵz putini yaƣⱪa qilisun. 25 Sening baldaⱪliring tɵmür wǝ mistin bolsun. Sening künliring ⱪandaⱪ bolsa, küq-ⱪudritingmu xundaⱪ bolsun».

26 «Əy Yǝxurun, Hudaƣa ohxaydiƣan ⱨeqkim yoⱪtur.

U sanga yardǝm bǝrgili kɵkkǝ minip,

xundaⱪla xan-xǝripi bilǝn bulutlarƣa minip kelidu.

27 Əzǝliy Huda sening panaⱨgaⱨing bolidu,

mǝnggülük bilǝkliri astingda turidu.

U sǝn üqün düxmǝnlǝrni ⱪoƣliwetip:

‹Ularni ⱨalak ⱪilƣin› dǝp sanga buyruydu. 28 Xuning bilǝn Isra’il amanliⱪta turidu.

Yaⱪubning buliⱪi axliⱪ wǝ xarabi bar bir zeminda,

xǝbnǝm temitidiƣan asminining astida tinq-aman turidu.

29 Əy Isra’il, bǝhtliksǝn! Sanga ohxax kim bar?

Sǝn Pǝrwǝrdigarning ⱪutⱪuzƣan hǝlⱪidursǝn.

U sening mǝdǝtkar ⱪalⱪining wǝ xanliⱪ ⱪiliqingdur.

Sening düxmǝnliring ⱪorⱪup sanga boysunidu

wǝ sǝn ularning egizliklirining üstidǝ mangisǝn».