Musaning xe’iri
32
1 Əy asmanlar, mǝn sɵzlisǝm, ⱪulaⱪ sal. Əy yǝr, aƣzimning sɵzlirini angla!
2 Tǝlimim yamƣur kǝbi tamidu,
sɵzlirim xǝbnǝm kǝbi qüxidu.
Ular maysilarƣa qüxkǝn sim-sim yamƣurdǝk,
qimǝnlǝrgǝ yaƣⱪan mol yamƣurdǝktur.
3 Qünki mǝn Pǝrwǝrdigarning namini jakarlaymǝn:
Hudayimizni uluƣlanglar.
4 U ⱪoram taxtur, uning ⱪilƣan ixliri mukǝmmǝldur,
Uning barliⱪ yolliri toƣridur.
U ⱨǝⱪsizliⱪ ⱪlimaydiƣan wapadar Hudadur,
U adil wǝ ⱨǝⱪⱪaniydur.
5 Əmma bu hǝlⱪ bolsa wapasizliⱪ ⱪildi.
Ular uning baliliri bolalmiƣini ularning ɵz ǝyibidur.
Ular ǝgri wǝ azƣun bir nǝsildur.
6 Əy ǝhmǝⱪ nadan hǝlⱪ, Pǝrwǝrdigarƣa xundaⱪ yanduramsǝn?
U sening atang bolup, sanga igidarqiliⱪ ⱪilip,
seni yaritip pǝyda ⱪilƣan ǝmǝsmu?
7 Sǝn ɵtkǝn künlǝrni esinggǝ alƣin,
nǝsildin nǝsilgǝ ɵtkǝn yillarni oyliƣin.
Atangdin sorisang, u sanga sɵzlǝp beridu,
aⱪsaⱪalliringƣa so’al ⱪoysang, ular sanga jawab beridu.
8 Ⱨǝmmidin uluƣ Huda hǝlⱪlǝrning ülüxlirini bɵlüxtürgǝndǝ,
Adǝm’atining ǝwladlirini ⱨǝr jayƣa qaqⱪinida
U hǝlⱪlǝrning qegrilirini Bǝni Isra’ilning sani boyiqǝ bekitti.
9 Qünki Pǝrwǝrdigarning nesiwisi Uning has hǝlⱪi bolidu.
Yaⱪub Uning qǝk bilǝn qüxkǝn mirasidur.
10 U uni qɵldǝ, yawayi ⱨaywanlar ⱨuwlaydiƣan dǝⱨxǝtlik bayawanda tapti.
U uni qɵridǝp, ɵz panaⱨiƣa elip,
kɵz ⱪariquⱪidǝk asridi.
11 Bir bürküt ɵz qanggisini tǝwritip,
balisining üstidǝ pǝrwaz ⱪilip,
ⱪanatlirini yeyip, uni tutup,
pǝylirining üstigǝ elip kɵtürginidǝk,
12 Pǝrwǝrdigarmu uni yalƣuz Ɵzi xundaⱪ yetǝklidi.
Uning yenida baxⱪa ⱨeqbir yat ilaⱨ yoⱪ idi.
13 U uni yǝr yüzining egizliklirigǝ qiⱪirip,
dalaning ⱨosulidin yegüzdi.
U ⱪoram taxtin uningƣa ⱨǝsǝl sümürtüp,
ⱪozilarning yeƣi, Baxan ⱪoqⱪarliri wǝ tekilirining gɵxi
wǝ esil buƣdayning danliri bilǝn ozuⱪlandurdi.
Sǝn üzüm ⱪeni bolƣan xarabni iqting.
15 Lekin Yǝxurun sǝmrip, tǝpkǝk bolup ⱪaldi.
Sǝn sǝmrip bordilip kǝtting!
U ɵzining yaratⱪuqisi bolƣan Hudani taxlap,
ɵzigǝ nijatliⱪ bǝrgüqi ⱪoram texini kɵzgǝ ilmidi. ◼
16 Ular ƣǝyriy ilaⱨlarƣa qoⱪunup Uni ⱪizƣandurdi,
yirginqlik ixlarni ⱪilip Uning ƣǝzipini kǝltürdi.
17 Ular Hudaƣa ǝmǝs, bǝlki jinlarƣa
wǝ ɵzi bilmigǝn, ata-bowilirimu ⱪorⱪmiƣan,
yengi pǝyda bolƣan ilaⱨlarƣa ⱪurbanliⱪ ⱪildi.
18 Sǝn ɵzüngni pǝyda ⱪilƣan ⱪoram taxni hiyalingƣa kǝltürmiding,
seni yaratⱪan Hudani untup ⱪalding.
19 Pǝrwǝrdigar buni kɵrüp,
Ɵz oƣul-ⱪizliriƣa aqqiⱪlinip ularni taxlap,
20 mundaⱪ dedi: ‹Mǝn ulardin yüzümni yoxurup,
ularning aⱪiwitini kɵrǝy,
qünki ular bir azƣun nǝsil, wapasiz balilardur.
21 Ular Huda bolmiƣan butliri bilǝn Meni ⱪizƣandurdi,
inawǝtsiz mǝbudliri bilǝn Meni ƣǝzǝplǝndürdi.
Xunga Mǝnmu hǝlⱪ bolmiƣan birliri bilǝn ularni ⱪizƣandurimǝn,
ǝⱪilsiz bir hǝlⱪ bilǝn ularni ƣǝzǝplǝndürimǝn.
22 Qünki Mening ƣǝzipimning oti tutixip,
ɵlüklǝr diyarining tegigiqǝ kɵyidu,
yǝr wǝ uning ⱨosulini yutup,
taƣlarning ullirinimu kɵydüridu.
23 Mǝn ularning üstigǝ balayi’apǝtlǝrni dɵwilǝymǝn,
ularƣa ya oⱪlirimni atimǝn.
24 Ular aqarqiliⱪtin ezilip,
xiddǝtlik issiⱪ wǝ eƣir ⱨalakǝttin ⱨalsirap ketidu.
Buningdin baxⱪa, Mǝn ularning üstigǝ wǝⱨxiylǝrning qixlirini
wǝ tupraⱪta ɵmilǝydiƣan yilanlarning zǝⱨirini ǝwǝtimǝn.
25 Taxⱪirida ⱪiliq ularni urup, iqkiridǝ wǝⱨimǝ ularni besip,
mǝyli yigit yaki ⱪiz bolsun,
mǝyli emidiƣan bala yaki aⱪsaⱪal bolsun,
ⱨǝmmisini yoⱪitidu.
26 Mǝn ularni qeqiwetip,
adǝmlǝrning arisidin ularning namini yoⱪitiwetmǝkqi idim.
27 Əmma ularning düxmǝnliri mǝshirǝ ⱪilip,
ularning rǝⱪibliri buni hata qüxinip:
«Bizning ⱪolimiz küqlüktur.
Bu Pǝrwǝrdigarning ixi ǝmǝs» demisun dǝp,
Mǝn undaⱪ ⱪilmidim.
28 Qünki ular nǝsiⱨǝttin mǝⱨrum bir hǝlⱪtur,
ularning ǝⱪil-parasiti yoⱪtur.
29 Kaxki ular dana bolsa idi!
Andin ular buni bilip,
ɵz aⱪiwitining ⱪandaⱪ bolidiƣinini oylaytti.
30 Əgǝr ularning ⱪoram texi ularni setiwǝtmigǝn bolsa,
Pǝrwǝrdigar ularni taxlap bǝrmigǝn bolsa,
bir kixi ming kixini ⱪandaⱪ ⱪoƣliyalaytti,
ikki kixi on ming kixini ⱪandaⱪ ⱪaquralaytti?
31 Qünki baxⱪilarning ⱪoram texi,
bizning ⱪoram teximizƣa ohximas.
Buningƣa düxmǝnlirimiz ɵzliri guwaⱨliⱪ berǝlǝydu.
32 Ularning üzüm teli Sodomning üzüm telidin
wǝ Gomorraning etizliⱪidin qiⱪⱪandur.
Üzümliri zǝⱨǝrlik, sapaⱪliri aqqiⱪtur.
33 Ularning xarabi ǝjdiⱨaning zǝⱨiridǝk,
kobra yilanning ɵltüridiƣan zǝⱨiridǝktur.
34 Ⱨǝmmisi Meningkidǝ saⱪlinip,
ɵz hǝzinilirimdǝ mɵⱨürlük turidu ǝmǝsmu?
35 Intiⱪam wǝ jaza Meningkidur,
ularning putlixidiƣan waⱪtiƣiqǝ saⱪlinip turidu.
Qünki ularning balayi’apǝtlik küni yeⱪinlixip,
ularning bexiƣa kelidiƣan wǝⱪǝlǝr tez sürǝttǝ kǝlmǝktǝ›.
36 Qünki Pǝrwǝrdigar ularning küqi tügǝp kǝtkinini,
ⱨǝtta solaⱪliⱪ yaki sirtta ⱪalƣanlarning ⱨeqbirining
ⱪutulup ⱪalmiƣinini kɵrgǝndǝ,
Ɵz hǝlⱪining ⱨǝⱪⱪini ⱪayturup,
Ɵz hizmǝtkarliriƣa rǝⱨimdilliⱪ ⱪilidu.
37 Andin U mundaⱪ dǝydu: ‹Ⱪeni ularning ilaⱨliri?
Ⱪeni ɵzigǝ panaⱨ ⱪilƣan ⱪoram texi?
38 Ularƣa sunulƣan soyum ⱪurbanliⱪlirining yeƣini yegǝnlǝr,
iqimlik ⱨǝdiyǝlirining xarabini iqkǝnlǝr ⱪǝyǝrgǝ kǝtti?
Ⱪeni ular ǝmdi ⱪopup, silǝrgǝ yardǝm berip, panaⱨinglar bolsun!
39 Əmdi bilinglarki, Mǝn Udurmǝn,
wǝ Mǝndin baxⱪa ilaⱨ yoⱪtur.
Mǝn ɵltürimǝn, Mǝn tirildürimǝn,
Mǝn yarilandurimǝn, Mǝn saⱪaytimǝn.
Ⱨeqkim ⱨeqkimni Mening ⱪolumdin ⱪutⱪuzalmaydu.
40 Qünki Mǝn ⱪolumni asmanƣa kɵtürüp:
«Əbǝdkiqǝ ⱨayatturmǝn» dǝp jakarlap,
41 qaⱪnap turidiƣan ⱪiliqimni bilǝp,
ⱪolumƣa ⱨɵküm qiⱪirix ⱪoralini alƣinimda,
düxmǝnlirimdin intiⱪam alimǝn,
Meni ɵq kɵrgǝnlǝrdin ⱪisas alimǝn.
42 Mǝn ya oⱪlirimni ⱪan bilǝn mǝst ⱪilimǝn wǝ ⱪiliqim gɵx yǝydu,
ɵltürgǝnlǝrning wǝ ǝsirgǝ qüxkǝnlǝrning ⱪeni
wǝ düxmǝnlǝrning baxliri bilǝn toyidu.
43 Əy ǝllǝr, uning hǝlⱪi bilǝn billǝ xadlinip tǝntǝnǝ ⱪilinglar,
qünki U Ɵz hizmǝtkarlirining ⱪenining intiⱪamini elip,
düxmǝnliridin ⱪisas elip,
Ɵz zemini wǝ hǝlⱪigǝ kǝfarǝt beridu». ◼
44 Musa wǝ Nunning oƣli Yǝxu’a kelip, bu nahxining ⱨǝmmǝ sɵzlirini hǝlⱪning aldida oⱪup bǝrdi. 45 Musa pütün bu sɵzlǝrni barliⱪ Isra’ilning aldida tamam ⱪilip bolƣanda, 46 ularƣa mundaⱪ dedi: «Mǝn bügün silǝrgǝ ⱪarxi guwaⱨ ⱪilƣan pütün sɵzlǝrni kɵnglünglarƣa püküp, ɵz baliliringlarƣa: ‹Bu ⱪanunning barliⱪ sɵzlirigǝ ǝstayidil ǝmǝl ⱪilinglar› dǝp buyrunglar. 47 Qünki bu bikar sɵz ǝmǝstur, bǝlki silǝrning ⱨayatinglardur. Xundaⱪki, silǝr ǝmdi igilǝx üqün I’ordan dǝryasidin ɵtüp baridiƣan u zeminda bu sɵzlǝr arⱪiliⱪ uzun ɵmür kɵrisilǝr».
48 Xu künning ɵzidǝ Pǝrwǝrdigar Musaƣa sɵz ⱪilip mundaⱪ dedi:
49 «Sǝn muxu Abarim teƣiƣa, yǝni Yerihoning udulida Mo’abning zeminidiki Nebo teƣiƣa qiⱪⱪin. U yǝrdǝ Mǝn Bǝni Isra’ilƣa mülük ⱪilip beridiƣan zeminni kɵrisǝn. 50 Andin, akang Ⱨarun Ⱨor teƣida wapat bolup ǝjdadlirining ⱪexiƣa kǝtkǝndǝk, sǝnmu ɵzüng qiⱪidiƣan taƣda wapat bolup ǝjdadliringning ⱪexiƣa ketisǝn. 51 Qünki silǝr ikkilǝnglar Zin qɵlidiki Mǝriba-Ⱪadǝxning suliri yeniƣa barƣanda, Bǝni Isra’ilning aldida Manga wapasizliⱪ ⱪilip, Meni muⱪǝddǝs dǝp kɵrsǝtmidinglar. 52 Xunga sǝn bu zeminni udulungda kɵrisǝn, lekin Mǝn Bǝni Isra’ilƣa beridiƣan zeminƣa kirǝlmǝysǝn».