1 Andin Musa berip, ⱨǝmmǝ Isra’ilƣa mundaⱪ sɵz ⱪildi: 2 «Mǝn bügün bir yüz yigirmǝ yaxta. Əmdi silǝrgǝ sǝrdar yaki baxlamqi bolalmaymǝn. Pǝrwǝrdigarmu manga: ‹Sǝn bu I’ordan dǝryasidin ɵtmǝysǝn› degǝnidi. 3 Lekin Pǝrwǝrdigar Hudayinglar aldinglarda yürüp, bu hǝlⱪlǝrni aldinglardin yoⱪ ⱪilidu. Xuning bilǝn silǝr ularning zeminini igilǝysilǝr. Pǝrwǝrdigarning eytⱪinidǝk Yǝxu’a silǝrni baxlaydu. 4 Pǝrwǝrdigar ⱨalak ⱪilƣan ikki Amoriy padixaⱨ Sihon wǝ Og wǝ ularning zeminiƣa ⱪilƣanlirini, bu hǝlⱪlǝrgimu ⱪilidu. 5 Pǝrwǝrdigar ularni ⱪolunglarƣa bǝrgǝndǝ, ularƣa mǝn silǝrgǝ buyruƣandǝk mu’amilǝ ⱪilinglar. 6 Silǝr jür’ǝtlik wǝ ⱪǝysǝr bolunglar, ulardin ⱪorⱪmanglar, ǝnsirimǝnglar qünki Pǝrwǝrdigar Hudayinglar silǝr bilǝn billǝ baridu, silǝrdin ayrilmaydu, silǝrni taxliwǝtmǝydu».

7 Andin Musa Yǝxu’ani qaⱪirip pütün Isra’ilning aldida uningƣa sɵzlǝp: «Sǝn jür’ǝtlik wǝ ⱪǝysǝr bolƣin, qünki sǝn, Pǝrwǝrdigar ⱪǝsǝm ⱪilip, ‹Mǝn uni ularƣa berimǝn› dǝp, ata-bowiliriƣa wǝdǝ ⱪilƣan zeminƣa bu hǝlⱪni baxlap kirgüzisǝn wǝ ular sǝn arⱪiliⱪ bu zeminni igilǝydu. 8 Mana, Pǝrwǝrdigar sening aldingda mengip, sǝndin ayrilmaydu, seni taxliwǝtmǝydu. Ⱪorⱪma wǝ ǝsla boxixip ⱪalma» dedi.

9 Musa bu ⱪanunni yezip, uni Pǝrwǝrdigarning ǝⱨdǝ sanduⱪini kɵtürüp mangidiƣan Lawiyning oƣulliri bolƣan kaⱨinlar wǝ pütün Isra’ilning aⱪsaⱪalliriƣa tapxurup bǝrdi. 10 Musa ularƣa buyrup mundaⱪ dedi: «Ⱨǝr yǝttinqi yilning ahirida, ⱪǝrzdin keqürüm ⱪilix yilining bekitilgǝn waⱪtida, Kǝpi tikix ⱨeyti baxlanƣinida, 11 Isra’ilning ⱨǝmmisi kelip, Pǝrwǝrdigar Hudayingning aldida jǝm bolux üqün Uning tǝripidin tallinidiƣan jayƣa yiƣilƣinida, ⱨǝmmǝ Isra’ilning aldida bu ⱪanunni, ular anglisun dǝp, oⱪup berisǝn. 12 Anglap ɵginip, ɵz Hudasi Pǝrwǝrdigardin ⱪorⱪup, bu ⱪanunning ⱨǝmmǝ sɵzlirigǝ ǝstayidil ǝmǝl ⱪilixi üqün, ǝrlǝrni, ayallarni, balilarni wǝ dǝrwaziliringlar iqidiki musapirlarni, yǝni pütün hǝlⱪni yiƣip jǝm ⱪilƣin. 13 Ularning bu ⱪanunni bilmǝydiƣan balilirimu uni anglap ɵgǝnsun. Buning bilǝn ular silǝr igilǝx üqün I’ordan dǝryasidin ɵtüp baridiƣan zeminda yaxiƣan ⱨǝmmǝ waⱪtinglarda Pǝrwǝrdigar Hudayinglardin ⱪorⱪidiƣan bolidu».

14 Andin Pǝrwǝrdigar Musaƣa sɵz ⱪilip: «Mana, sening ɵlidiƣan waⱪting yeⱪinlixip ⱪaldi. Əmdi Yǝxu’ani qaⱪirtⱪin. Ikkinglar uqrixix qediriƣa berip, u yǝrdǝ ⱨazir bolunglar. Mǝn uningƣa wǝzipǝ tapxurimǝn» dedi. Xuning bilǝn Musa wǝ Yǝxu’a berip uqrixix qedirida ⱨazir boldi. ^◼   15 Andin Pǝrwǝrdigar qedirning kirix eƣizi üstidǝ tohtiƣan bulut tüwrüki iqidǝ kɵründi. 16 Pǝrwǝrdigar Musaƣa mundaⱪ dedi: «Mana, sǝn ata-bowiliringning yenida raⱨǝt tapⱪiningdin keyin bu hǝlⱪ ⱪozƣilip, ular ǝmdi baridiƣan zemindiki yat ǝllǝrning ilaⱨliriƣa ǝgixip buzuⱪqiliⱪ ⱪilip, Meni taxlap, Mening ular bilǝn tüzgǝn ǝⱨdǝmni buzidu. 17 Xu qaƣda Mening ƣǝzipim ularƣa ⱪarxi ⱪozƣilidu. Mǝn ularni taxlap, ulardin yüzümni yoxurimǝn. Ular wǝyran ⱪilinip, bexiƣa kɵp balayi’apǝt wǝ azab-oⱪubǝt kǝlginidǝ: ‹Hudayimiz arimizda bolmiƣini üqün bu balayi’apǝtlǝr beximizƣa kǝldi ǝmǝsmu?› deyixidu. 18 Lekin Mǝn u kündǝ, ularning baxⱪa ilaⱨlarƣa yüzlinip ⱪilƣan ⱨǝmmǝ yamanliⱪliri sǝwǝblik yüzümni pütünlǝy yoxurimǝn. 19 Əmdi sǝn ɵzüng üqün bu nahxini yezip, uni Bǝni Isra’ilƣa ɵgitip aƣziƣa salƣinki, Bu nahxa Mening Bǝni Isra’ilƣa ⱪarxi bir guwaⱨqim bolsun. 20 Qünki Mǝn ularni, Mǝn ata-bowiliriƣa ⱪǝsǝm bilǝn wǝdǝ ⱪilƣan, süt bilǝn ⱨǝsǝl eⱪip turidiƣan zeminƣa kirgüzimǝn. Ular bolsa yǝp toyup sǝmrigǝndǝ, baxⱪa ilaⱨlarƣa mayil bolup ularƣa qoⱪunup, Meni kɵzgǝ ilmay ǝⱨdǝmni buzidu. 21 — Əmma ularning bexiƣa kɵp balayi’apǝt wǝ azab-oⱪubǝt kǝlginidǝ, bu nahxa ularƣa ⱪarxi bir guwaⱨqi bolidu, qünki ǝwladliri bu nahxini aƣzidin qüxürmǝydu. — Qünki Mǝn ularning Mǝn ularƣa ⱪǝsǝm bilǝn wǝdǝ ⱪilƣan zeminƣa ularni kirgüzmǝstinla oylawatⱪan oy-hiyallirini bilimǝn»

22 Musa u küni bu nahxini yezip, Bǝni Isra’ilƣa ɵgǝtti. 23 Andin Pǝrwǝrdigar Nunning oƣli Yǝxu’ani wǝzipigǝ ⱪoyup: «Sǝn jür’ǝtlik wǝ ⱪǝysǝr bolƣin, qünki sǝn Bǝni Isra’ilni Mǝn ularƣa ⱪǝsǝm bilǝn wǝdǝ ⱪilƣan zeminƣa baxlap kirgüzisǝn, wǝ Mǝn sǝn bilǝn billǝ bolimǝn» dedi.

24 Musa bu ⱪanunning sɵzlirini bir kitabⱪa toluⱪ yezip bolƣandin keyin, 25 Pǝrwǝrdigarning ǝⱨdǝ sanduⱪini kɵtüridiƣan Lawiylarƣa buyrup mundaⱪ dedi: 26 «Bu ⱪanun kitabini elip, uni Hudayinglar Pǝrwǝrdigarning ǝⱨdǝ sanduⱪining yeniƣa ⱪoyunglar. U xu yǝrdǝ sanga ⱪarxi guwaⱨqi süpitidǝ tursun. 27 Qünki mǝn silǝrning asiy wǝ boyni ⱪattiⱪ ikǝnlikinglarni bilimǝn. Silǝr, mana, mǝn tehi aranglarda ⱨayat turupmu, Pǝrwǝrdigarƣa asiyliⱪ ⱪildinglar. Demǝk mǝn ɵlgǝndin keyin tehimu xundaⱪ ⱪilisilǝr. 28 Ⱪeximƣa ⱪǝbililiringlarning ⱨǝmmǝ aⱪsaⱪalliri wǝ silǝrning ǝmǝldarliringlarni yiƣinglar, mǝn sɵzlirimni ularƣa eytip, yǝr bilǝn asmanni ularƣa ⱪarxi guwaⱨqi ⱪilimǝn. 29 Qünki mǝn wapat bolƣandin keyin, silǝrning buzulup, mǝn silǝrgǝ buyruƣan yoldin qǝtnǝp ketidiƣininglarni bilimǝn. Keyinki künlǝrdǝ balayi’apǝtlǝr bexinglarƣa kelidu, qünki silǝr Pǝrwǝrdigarning nǝziridǝ yaman bolƣanni ⱪilip, ⱪolliringlarning ⱪilƣanliri bilǝn Uning aqqiⱪini kǝltürisilǝr».

30 Andin Musa Bǝni Isra’ilning pütün jama’itining aldida bu nahxining sɵzlirini baxtin tartip ahirƣiqǝ oⱪup bǝrdi: