1 Pǝrwǝrdigarƣa ⱨǝmdusanalar bolsun!

Əy jenim, Pǝrwǝrdigarni mǝdⱨiyiligin.

2 Mǝn ɵmür boyi Pǝrwǝrdigarƣa ⱨǝmd eytimǝn,

Mǝwjutla bolsam Hudayimƣa mǝdⱨiyǝ nahxilirini eytimǝn.

3 Silǝr hanzadilǝrgǝ ixǝnq baƣlimanglar,

ⱪutⱪuzalmaydiƣan adǝm balisiƣa tayanmanglar.

4 Uning nǝpisi üzülgǝndǝ, u tupraⱪⱪa ⱪaytidu.

U kündǝ uning arzu-niyǝtliri yoⱪ bolup ketidu.

5 Yaⱪubning Hudasi yardǝmqisi bolƣan,

ɵz Hudasi Pǝrwǝrdigarƣa ümid baƣliƣan adǝm bǝhtliktur.

6 U asman bilǝn yǝrni,

dengiz wǝ uningdiki ⱨǝmmǝ mǝwjudatlarni yaratⱪandur.

Uning wapadarliⱪi mǝnggülüktur.

7 U zulum tartⱪuqilar üqün adil ⱨɵküm qiⱪirar,

aq ⱪalƣanlarƣa nan berǝr.

Pǝrwǝrdigar mǝⱨbuslarni azad ⱪilar.

8 Pǝrwǝrdigar korlarning kɵzlirini aqar,

Pǝrwǝrdigar mükqiyip ⱪalƣanlarni turƣuzar,

Pǝrwǝrdigar ⱨǝⱪⱪaniylarni sɵyǝr.

9 Pǝrwǝrdigar musapirlarni ⱪoƣdar,

yetim-yesir wǝ tul hotunlarni yɵlǝr,

ǝmma yamanlarning yolini ǝgri-toⱪay ⱪilar.

10 Pǝrwǝrdigar ǝbǝdkiqǝ ⱨɵkümranliⱪ ⱪilar.

Əy Si’on, sening Hudaying nǝsildin nǝsilgǝ ⱨɵküm sürǝr.

Pǝrwǝrdigarƣa ⱨǝmdusanalar bolsun!