1 Dawud yazƣan mǝdⱨiyǝ nahxisi.

Əy Hudayim, ǝy Padixaⱨ,

mǝn Seni uluƣlaymǝn,

Sening namingƣa ǝbǝdil’ǝbǝd ⱨǝmdusana eytimǝn.

2 Ⱨǝr küni Sanga ⱨǝmdusana eytip,

ǝbǝdil’ǝbǝdkiqǝ namingni mǝdhiyilǝymǝn.

3 Pǝrwǝrdigar uluƣdur wǝ mǝdⱨiyilǝxkǝ ǝng layiⱪtur,

Uning uluƣluⱪi ǝⱪildin üstündur.

4 Ⱨǝrbir nǝsil keyinki nǝsilgǝ Sening ixliringni mahtap beridu,

uluƣ ǝmǝlliringni bayan ⱪilidu.

5 Mǝn Sening uluƣ xanu-xǝwkiting

wǝ ajayip ixliring toƣrisida sɵzlǝymǝn.

6 Hǝlⱪ Sening ⱨǝywǝtlik ixliringning ⱪudriti toƣrisida sɵzlǝydu.

Mǝnmu Sening uluƣluⱪungni bayan ⱪilimǝn.

7 Ular Sening katta meⱨribanliⱪingni ǝslǝp uni bayan ⱪilidu,

ⱨǝⱪⱪaniyliⱪingni küylǝp nahxa eytidu.

8 Pǝrwǝrdigar xǝpⱪǝtlik wǝ rǝⱨimdildur,

U asan ƣǝzǝplǝnmǝs,

Uning meⱨir-xǝpⱪiti qǝksizdur.

9 Pǝrwǝrdigar ⱨǝmmigǝ meⱨribandur,

Uning küyümqanliⱪi barqǝ yaratⱪanlirini ɵz iqigǝ alƣandur.

10 Sening ⱨǝmmǝ ixliring Seni mǝdⱨiyilǝydu, ǝy Pǝrwǝrdigar,

Sening tǝⱪwadarliring Sanga ⱨǝmdusana eytidu.

11 Ular padixaⱨliⱪingning xanu-xǝripidin sɵzlǝp,

küq-ⱪudritingni bayan ⱪilidu.

12 Bu tǝriⱪidǝ ular adǝm baliliriƣa Sening uluƣ ixliringni

wǝ padixaⱨliⱪingning xan-xǝripi wǝ xǝwkitini bildüridu.

13 Sening padixaⱨliⱪing mǝnggülük padixaⱨliⱪtur,

sǝltǝniting nǝsildin nǝsilgidur.

14 Pǝrwǝrdigar ⱨǝmmǝ yiⱪilƣanlarni yɵlǝydu,

Püklinip ⱪalƣanlarning ⱨǝmmisini yɵlǝp turƣuzidu.

15 Ⱨǝmmining kɵzliri Sanga tǝlmürǝp turidu,

Sǝn ɵz waⱪtida ularƣa rizⱪini yǝtküzüp berisǝn.

16 Sǝn ⱪolungni eqip,

ⱨǝmmǝ janliⱪlarning eⱨtiyajini ⱪandurisǝn.

17 Pǝrwǝrdigar ⱨǝmmǝ yollirida adildur,

ⱨǝmmǝ ixlirida meⱨribandur.

18 Pǝrwǝrdigar Ɵzigǝ du’a ⱪilƣanlarƣa,

Uningƣa qin kɵnglidin yalwurƣanlarning ⱨǝmmisigǝ yeⱪindur.

19 U tǝⱪwadarlirining arzusini ǝmǝlgǝ axuridu,

ularning pǝryadini anglap ularni ⱪutⱪuzidu.

20 Pǝrwǝrdigar Ɵzini sɵyidiƣanlarning ⱨǝmmisini saⱪlaydu,

ǝmma yamanlarning ⱨǝmmisini ⱨalak ⱪilidu.

21 Aƣzim Pǝrwǝrdigarƣa ⱨǝmdusana eytip turidu,

ⱨǝmmǝ tirik jan ǝbǝdil’ǝbǝd Uning muⱪǝddǝs namini mǝdⱨiyilǝydu.