Pǝnd-nǝsiⱨǝtlǝr
Ⱨekmǝtlik sɵzlǝrgǝ ⱪulaⱪ selixning ǝⱨmiyiti
1
1 Dawudning oƣli, Isra’il padixaⱨi Sulaymanning ⱨekmǝtlik sɵzliri. 2 Bu ⱨekmǝtlik sɵzlǝr bizning
ⱨekmǝt wǝ ǝdǝp-ǝhlaⱪni ɵginiximiz,
danaliⱪⱪa tolƣan sɵzlǝrni qüxiniximiz,
3 tǝrbiyǝ-nǝsiⱨǝt ⱪobul ⱪiliximiz,
ⱨǝⱪⱪaniy, adil wǝ durus boluximiz üqün berildi.
4 Ular saddilarƣa ⱨoxyarliⱪ berǝr,
yaxlarni bilimlik wǝ pǝm-parasǝtlik ⱪilar.
5 Dana kixi bularni anglap bilimini axurar,
ǝⱪil-parasǝtlik kixi mǝsliⱨǝtkǝ erixǝr.
6 Xuning bilǝn ular maⱪal-tǝmsillǝrni,
danixmǝnlǝrning qongⱪur sɵzliri
wǝ tepixmaⱪlirini qüxinidiƣan bolidu.
7 Pǝrwǝrdigardin ⱪorⱪux ilim-ⱨekmǝtning baxlinixidur.
Əmma ǝhmǝⱪlǝr ⱨekmǝt wǝ nǝsiⱨǝtni kɵzgǝ ilmaydu.
8 Əy oƣlum, atangning nǝsiⱨǝtigǝ ⱪulaⱪ salƣin,
anangning tǝlimini taxlimiƣin.
9 Qünki ular bexingƣa taⱪalƣan bir güzǝl tajdǝk bolar,
boynungƣa esilƣan marjandǝk bolar.
10 Əy oƣlum, gunaⱨkarlar seni azdursa,
ularƣa ǝgǝxmigin.
11 Ular: «Biz bilǝn barƣin, ⱪan tɵküx üqün mɵküp yatayli,
sǝwǝb bolmisimu bigunaⱨ kixigǝ tuzaⱪ ⱪurayli.
12 Ɵlüklǝr diyaridǝk kixilǝrni yutuwetǝyli,
gɵrdǝk ularni tirik yǝp ketǝyli.
13 Ⱨǝr hil ⱪimmǝtlik mal tapayli,
ɵylirimizni olja bilǝn toldurayli.
14 Biz bilǝn xerik bolƣin,
pul haltimiz bir bolsun» desimu,
15 ǝy oƣlum, ular bilǝn ⱨǝmraⱨ bolmiƣin,
putungni ularning yolidin tartⱪin.
16 Qünki ularning putliri yamanliⱪⱪa yügüridu,
ular ⱪan tɵküxkǝ aldiraydu.
17 Ⱪuxlarning kɵzliri aldida
tor yeyip ⱪoyuxning paydisi yoⱪ.
18 Lekin bu adǝmlǝr ɵz ⱪenini tɵküx üqün mɵküp yatidu,
ɵz janliriƣa tuzaⱪ ⱪuridu.
19 Ⱨaram paydini kɵzligǝn kixilǝrning yolliri xundaⱪ bolar,
mundaⱪ payda igisining jenini alar.
20 Ⱨekmǝt koqilarda qaⱪirip,
bazarlarda awazini anglitip,
21 koqa baxlirida jakarlap,
xǝⱨǝr dǝrwazilirining aldida sɵz ⱪilip mundaⱪ dǝydu:
22 Əy nadanlar, ⱪaqanƣiqǝ nadanliⱪni yahxi kɵrisilǝr?
Əy mǝshirǝ ⱪilƣuqilar, ⱪaqanƣiqǝ mǝshirǝ ⱪilixtin sɵyünisilǝr?
Əy ǝhmǝⱪlǝr, ⱪaqanƣiqǝ ilim-ⱨekmǝttin nǝprǝtlinisilǝr?
23 Manga ⱪulaⱪ selip, nǝsiⱨǝtimni anglanglar!
Mana, kɵnglümdikini silǝrgǝ tɵküp berimǝn,
sɵzlirimni silǝrgǝ bildürimǝn.
24 Lekin qaⱪirsam, anglimidinglar,
ⱪolumni uzatsam ⱪarimidinglar.
25 Mǝsliⱨǝtimni taxlap,
nǝsiⱨǝtimgǝ ⱪulaⱪ salmidinglar.
26 Xuning üqün mǝn bexinglarƣa bala-ⱪaza kǝlgǝn kündǝ külimǝn,
wǝⱨimilǝr üstünglarƣa kǝlgǝndǝ zangliⱪ ⱪilimǝn.
27 Wǝⱨimǝ ⱨalakǝt elip kǝlgǝn topandǝk kǝlgǝndǝ,
balayi’apǝt bir borandǝk qiⱪⱪanda,
dǝrd-ǝlǝm wǝ ƣǝm-ⱪayƣu üstünglarƣa qüxkǝndǝ,
28 ular manga nalǝ ⱪilsa, mǝn jawab bǝrmǝymǝn,
meni ⱪanqǝ izdisimu meni tapalmaydu.
29 Ular ilim-ⱨekmǝttin nǝprǝtlinip,
Pǝrwǝrdigardin ⱪorⱪuxni halimay,
30 mening mǝsliⱨǝtimgǝ unimay,
ⱨǝmmǝ nǝsiⱨǝtimni rǝt ⱪilƣini üqün,
31 ular ɵz ixlirining mewisini yǝp,
ɵz mǝsliⱨǝtlirining aⱪiwitidin toyidu.
32 Qünki jaⱨillar mǝndin yüz ɵrügini üqün ɵltürülidu,
ǝhmǝⱪlǝrning biƣǝmliⱪi ularni ⱨalak ⱪilidu.
33 Lekin manga ⱪulaⱪ salƣan kixi tinq-aman turidu,
bala-ⱪazadin ⱪorⱪmay hatirjǝm bolidu.