1 Əy oƣlum, ǝgǝr sɵzlirimni ⱪobul ⱪilsang,

ǝmrlirimni ⱪǝlbingdǝ saⱪlisang,

2 ⱨekmǝtkǝ ⱪulaⱪ salsang,

danaliⱪⱪa kɵnglüng ⱪoysang,

3 ǝⱪil-parasǝtni tilisǝng,

danaliⱪⱪa erixix üqün awazingni kɵtürsǝng,

4 kümüxni arzu ⱪilƣandǝk uni arzu ⱪilsang,

yoxurun hǝzinini izdigǝndǝk uni izdisǝng,

5 xu qaƣda Pǝrwǝrdigardin ⱪorⱪuxni bilisǝn,

Hudani tonuyalaysǝn.

6 Qünki Pǝrwǝrdigar ⱨekmǝt bǝrgüqidur.

Uning aƣzidin bilim wǝ danaliⱪ qiⱪidu.

7 U duruslarƣa mǝdǝt berixkǝ tǝyyar turidu,

U adil yolda mangƣanlarƣa ⱪalⱪandur.

8 U adillarning yollirini saⱪlaydu,

tǝⱪwadarlarning yollirini ⱪoƣdaydu.

9 Xu qaƣda ⱨǝⱪⱪaniyliⱪ, adilliⱪ wǝ durusluⱪni tonuysǝn,

ⱨǝmmǝ yahxi yollarni qüxinisǝn.

10 Qünki danaliⱪ kɵnglünggǝ kiridu,

jening ilim-ⱨekmǝtkǝ amraⱪ bolidu.

11 Pǝm-parasǝt seni ⱪoƣdaydu,

danaliⱪ seni saⱪlaydu.

12 Qünki ⱨekmǝt seni yaman yoldin ⱪutⱪuzup,

ǝgri gǝp ⱪilƣuqilardin saⱪlaydu.

13 Toƣra yollarni taxlap ⱪarangƣuluⱪ yollarda mangƣuqilardin

u seni halas ⱪilidu.

14 U seni yamanliⱪ ⱪilixtin huxal bolƣanlardin,

yamanlarning yalƣanqiliⱪidin xadlanƣanlardin saⱪlaydu.

15 U ǝgri yollarda mangidiƣanlardin,

tǝtür yollarda yürgüqilǝrdin ⱪutⱪuzidu.

16 U seni buzuⱪ hotundin,

siliⱪ sɵzlǝydiƣan yat ayaldin saⱪlaydu.

17 Yax waⱪtida tǝgkǝn yoldixini taxlap,

Hudaning aldida ⱪilƣan ǝⱨdisini untuƣan ayaldin u seni ⱪutⱪuzidu.

18 Qünki xundaⱪ ayal ɵz ɵyi bilǝn ⱪoxulup ɵlümgǝ barar,

uning yolliri ɵlgǝnlǝrning makaniƣa baxlar.

19 Uning ⱪexiƣa barƣanlarning birimu ⱪaytip kǝlmǝs,

ular ⱨayatⱪa erixtüridiƣan yolni tapalmas.

20 Əmma sǝn yahxilarning yolida mangƣin,

ⱨǝⱪⱪaniylarning izliridin qiⱪmiƣin.

21 Qünki durus kixilǝr zeminda yaxar,

toƣra kixilǝr u yǝrdǝ turup ⱪalar.

22 Lekin yamanlar zemindin ⱨǝydilip yoⱪitilar,

wapasizlar uningdin yulup taxlinar.