Ⱨekmǝt izdigüqi bǝrikǝt tapidu
3
1 Əy oƣlum, tǝlimimni untumiƣin, mening buyruⱪlirimni ⱪǝlbingdǝ qing saⱪliƣin.
2 Qünki buning bilǝn uzun ɵmür kɵrisǝn,
yilliringƣa yil ⱪoxulup, amanliⱪ tapisǝn.
3 Meⱨir-muⱨǝbbǝt wǝ sadaⱪǝtlik sǝndin ayrilmisun.
Ularni boynungƣa marjan kǝbi esiwalƣin,
yürikingning tahtisiƣa pütüwalƣin.
4 Xundaⱪta Huda wǝ adǝmlǝrning nǝziridǝ
iltipat tepip, ⱪǝdirlinisǝn.
5 Pütün ⱪǝlbing bilǝn Pǝrwǝrdigarƣa ixǝngin,
ɵz ǝⱪil-parasitinggǝ tayanmiƣin.
6 Ⱨǝmmǝ ixliringda uni yad ǝtsǝng,
U ⱨǝmmǝ yolliringni oquⱪ ⱪilar.
7 Ɵzüngni dana ⱨesablimiƣin,
Pǝrwǝrdigardin ⱪorⱪup, yamanliⱪtin ⱪaqⱪin.
8 Bu sening teninggǝ dawa bolar,
ustihanliringƣa yilik bolar.
9 Ɵz mal-mülküng wǝ dǝslǝpki ⱨosulungni Pǝrwǝrdigarƣa atiƣin,
xundaⱪ ⱪilip Uningƣa xan-xǝrǝp kǝltürgin.
10 Xunda ambarliring axliⱪⱪa tolar,
üzüm siⱪⱪuqliring yengi xarabtin taxar.
11 Əy oƣlum, Pǝrwǝrdigarning tǝrbiyisidin bax tartmiƣin,
Uning ǝdǝb berixini yaman kɵrmigin.
12 Qünki ata ɵzi sɵygǝn oƣlini tǝrbiyiligǝndǝk,
Pǝrwǝrdigar Ɵzi sɵygǝn kixini tǝrbiyilǝr.
13 Ⱨekmǝtni tapⱪan insan
wǝ ǝⱪil-parasǝtni igiligǝn adǝm bǝhtliktur!
14 Ⱨekmǝtni tepix kümüx tepixtin yahxidur,
uning paydisi altunning paydisidin ǝwzǝldur.
15 U mǝrwayittin ⱪimmǝtliktur.
Ⱨeqbir arzuluⱪ nǝrsǝ uningƣa tǝng kǝlmǝydu.
16 Uning ong ⱪolida uzun ɵmür bar,
sol ⱪolida dɵlǝt bilǝn izzǝt bar.
17 Uning yolliri huxalliⱪⱪa tolƣan yollar,
ⱨǝmmǝ izlirida amanliⱪ bar.
18 Uni qing tutⱪuqilarƣa u ⱨayatliⱪ dǝrihidur,
uni saⱪliƣanlar bǝhtliktur.
19 Ⱨekmǝt bilǝn Pǝrwǝrdigar yǝrni yaratti,
danaliⱪ bilǝn asmanni ornatti.
20 Uning danaliⱪi bilǝn qongⱪur bulaⱪlarning suliri qiⱪti
wǝ bulutlar xǝbnǝmni temitti.
21 Əy oƣlum, danaliⱪ wǝ pǝm-parasǝtni saⱪliƣin,
ularni kɵzliringdin yoⱪatmiƣin.
22 Mundaⱪ ⱪilsang, ular jeningƣa ⱨayat beridu,
boynungƣa esilƣan marjandǝk bolidu.
23 Yolungda tinq-aman mangisǝn,
ⱨǝrgiz putlaxmaysǝn.
24 Ⱨeq nǝrsidin ⱪorⱪmay yatisǝn,
yetipla xerin uhlaysǝn.
25 Tuyuⱪsiz kǝlgǝn dǝⱨxǝttin
wǝ yamanlarning üstigǝ kelidiƣan ⱨalakǝttin ⱪorⱪmiƣin.
26 Qünki Pǝrwǝrdigar tayanqingdur,
U putungni ⱪiltaⱪtin saⱪlaydu.
27 Əgǝr ⱪolungdin kǝlsǝ,
ⱨajǝtmǝnlǝrdin yardimingni ayimiƣin.
28 Ⱪoxnangƣa bǝrgili yeningda bir nǝrsǝ bolsa:
«Ⱪaytip ketip, ǝtǝ kǝlsǝng, sanga berǝy» demigin.
29 Ⱪoxnang sanga ixinip ⱪexingda tinq-aman tursa,
uningƣa yaman niyǝttǝ bolmiƣin.
30 Kixi sanga yamanliⱪ ⱪilmiƣan bolsa,
uning bilǝn sǝwǝbsiz uruxmiƣin.
31 Zulum ⱪilƣuqiƣa ⱨǝsǝt ⱪilmiƣin,
uning yollirining ⱨeqbirini tallimiƣin.
32 Buzuⱪ kixi Pǝrwǝrdigarƣa yirginqliktur,
lekin durus kixilǝr bilǝn Uning yeⱪin munasiwiti bardur.
33 Pǝrwǝrdigarning lǝniti yaman kixining ɵyigǝ tegǝr,
lekin U ⱨǝⱪⱪaniylarning ɵyigǝ bǝrikǝt ata ⱪilar.
34 U mǝshirǝ ⱪilƣuqini mǝshirǝ ⱪilar,
lekin miskinlǝrgǝ xapa’ǝt ⱪilar.
35 Danalar izzǝtkǝ erixǝr,
ǝhmǝⱪlǝr bolsa xǝrmǝndilikta ⱪalar.