Ⱨekmǝtkǝ erixix yoli
4
1 Əy oƣullar, atining nǝsiⱨǝtini anglanglar, ǝⱪil-parasǝt tepix üqün uningƣa ⱪulaⱪ selinglar.
2 Qünki silǝrgǝ berimǝn yahxi tǝlimni,
xunga taxlimanglar nǝsiⱨǝtimni.
3 Mǝn atamning kiqik balisi idim,
anamning nazuk yalƣuz oƣli idim.
4 Atam manga tǝlim berip mundaⱪ dedi:
Mening sɵzlirimni yürikingdǝ saⱪliƣin
wǝ buyruⱪlirimƣa boysunƣin,
xunda ⱨayatingni saⱪlaysǝn.
5 Ⱨekmǝt wǝ ǝⱪil-parasǝt tapⱪin,
aƣzimning sɵzlirini untumiƣin,
ulardin qiⱪmiƣin.
6 Ⱨekmǝtni taxlimisang, u seni saⱪlaydu.
Uni dost tutsang, u seni ⱪoƣdaydu.
7 Ⱨekmǝt ⱨǝmmidin muⱨimdur.
Xuning üqün ⱨekmǝt izdigin,
pütün barliⱪing bilǝn
ǝⱪil-parasǝt tepix üqün tirixⱪin.
8 Uni uluƣ dǝp bilsǝng, u seni kɵtüridu,
uni ⱪuqiⱪingda tutsang, u sanga izzǝt ata ⱪilidu.
9 U sening bexingƣa bir zinnǝtlik tajni taⱪidu,
xɵⱨrǝtlik bir tajni sanga tapxuridu.
10 Əy oƣlum, meni anglap, sɵzlirimni ⱪobul ⱪilƣin,
xundaⱪ ⱪilsang, ɵmrüng uzaⱪ bolidu.
11 Mǝn sanga ⱨekmǝtning yollirini kɵrsitimǝn,
seni toƣra yollarƣa baxlaymǝn.
12 Putliring tosalƣuƣa uqrimaydu mangƣiningda,
ⱨǝrgiz putlaxmaysǝn yügürginingdǝ.
13 Mening nǝsiⱨǝtimni qing tutⱪin,
uni ⱪoyup bǝrmǝy saⱪliƣin,
qünki u sening ⱨayating bolidu.
14 Yamanlarning iziƣa ǝgǝxmigin,
rǝzillǝrning yolida mangmiƣin.
15 Ularning yolliridin ⱪaqⱪin, u yǝrdin ɵtmigin,
burulup ulardin yiraⱪlixip kǝtkin.
16 Qünki ular yamanliⱪ ⱪilmiƣuqǝ uhliyalmas,
bir kixini yiⱪitmiƣuqǝ, uyⱪusi kǝlmǝs.
17 Yamanliⱪ ularning yǝydiƣan nenidur,
zulum ularning iqidiƣan xarabidur.
18 Əmma ⱨǝⱪⱪaniylarning yoli tang nuridǝktur,
barƣanseri yorup qing qüxtiki ⱪuyaxtǝk bolur.
19 Lekin yamanlarning yoli ⱪarangƣu zulmǝtkǝ ohxar,
ular nemigǝ putlixidiƣinini bilmǝs.
20 Əy oƣlum, sɵzlirimni diⱪⱪǝt bilǝn angliƣin,
gǝplirimgǝ ⱪulaⱪ salƣin.
21 Ularni kɵzliringdin yoⱪatmiƣin,
ⱪǝlbingdǝ qing saⱪliƣin.
22 Ularni tapⱪan kixigǝ ular ⱨayattur,
pütün tenigǝ dawadur.
23 Əng awwal ⱪǝlbingni pak saⱪliƣin,
qünki u ⱨayatning buliⱪidur.
24 Ɵzüngni eƣizning ⱨiylisidin neri tutⱪin,
lǝwlǝrningni ǝgri gǝp ⱪilixtin saⱪliƣin.
25 Kɵzliringni aldingƣa tikkin,
nǝziringni udulƣa salƣin.
26 Putung mangidiƣan yolni tüz ⱪilƣin,
ⱨǝmmǝ yolliringning toƣra boluxiƣa diⱪⱪǝt ⱪilƣin.
27 Nǝ ongƣa, nǝ solƣa burulmiƣin,
ayiƣingni yamanliⱪtin yiƣⱪin.