1 Əy oƣlum, ⱨekmitimgǝ diⱪⱪǝt ⱪilƣin,

dana sɵzlirimgǝ ⱪulaⱪ salƣin.

2 Xundaⱪ ⱪilsang pǝm-parasǝtlik bolisǝn,

lǝwliringdǝ ilim-ⱨekmǝtni saⱪlaysǝn.

3 Buzuⱪ hotunning lǝwliri ⱨǝrǝ kɵnikidin aⱪⱪan ⱨǝsǝldǝktur,

uning aƣzi yaƣdǝk siliⱪtur.

4 Lekin u ahirda ǝmǝndǝk aqqiⱪ bolar,

ikki bisliⱪ ⱪiliqtǝk ɵtkür bolar.

5 Uning putliri ɵlüm tǝripigǝ mangar,

ⱪǝdǝmliri ɵlüklǝr diyariƣa elip barar.

6 Uning yollirining ǝgri-toⱪay ikǝnlikini bayⱪimay ⱪalisǝn.

Bolmisa ⱨayatliⱪ yoliƣa burulatting.

7 Əy oƣullar, manga ⱪulaⱪ selinglar,

aƣzimning sɵzliridin qiⱪmanglar.

8 Ɵz yolungni mundaⱪ ayaldin neri ⱪilƣin,

ɵyining ixikigǝ yeⱪin barmiƣin.

9 Baxⱪilarƣa izzitingni bǝrmigin,

rǝⱨimsizlǝrgǝ yilliringni tapxurmiƣin.

10 Yatlar bayliⱪingdin toymisun,

japa tartip tapⱪanliring baxⱪa kixining ɵyigǝ kǝtmisun.

11 Ɵmrüngning ahiri kǝlgǝndǝ,

ǝt-bǝdining qirip kǝtkǝn ⱨalitigǝ yǝtkǝndǝ:

12 «Nemixⱪa ǝdǝpni yaman kɵrdüm,

nemixⱪa kɵnglümdǝ nǝsiⱨǝtni rǝt ⱪildim?

13 Nemixⱪa ustazlirimning sɵzini anglimidim,

nemixⱪa tǝlim bǝrgüqilirimgǝ ⱪulaⱪ salmidim?

14 Mǝn yiƣilƣan jama’ǝtning aldida

yamanliⱪⱪa muptila bolƣili tas ⱪaldim» dǝp ⱪalmiƣin.

15 Ɵz ⱪuduⱪungdin su tartⱪin,

ɵz buliⱪingdin aⱪⱪan suni iqkin.

16 Qǝxmiliring taxⱪiriƣa taxsunmu?

Eriⱪliringning süyi koqilarƣa eⱪip kǝtsunmu?

17 Ular seningki bolsun,

ularni baxⱪilar bilǝn ortaⱪlaxmiƣin.

18 Sening ⱪuduⱪung bǝrikǝtlik bolsun,

yax waⱪtingda alƣan ayalingdin ⱨuzurlanƣin.

19 U sanga dil tartⱪan bir maraldǝk bolsun,

gɵzǝl bir keyiktǝk bolsun.

Uning ⱪoyni seni sɵyündürsun,

uning muⱨǝbbitidin ⱨǝmixǝ lǝzzǝt alƣin.

20 Əy oƣlum, nemixⱪa buzuⱪ hotun bilǝn lǝzziting bolƣay?

Nemixⱪa yat ayalni ⱪuqaⱪlaysǝn?

21 Mana, adǝmning yolliri Pǝrwǝrdigarning kɵz aldida axkaridur,

U uning ⱨǝmmǝ yollirini kɵzitip turidu.

22 Yaman kixi ɵz yamanliⱪliridin tutulup ⱪalar,

gunaⱨining ⱪiltiⱪiƣa qirmixip ⱪalar.

23 U tǝrbiyini rǝt ⱪilƣini üqün ɵlǝr,

kɵpligǝn ǝhmǝⱪliⱪliridin eziⱪip ketǝr.