Bikarqiliⱪ wǝ zina hǝtiridin agaⱨlandurux
6
1 Əy oƣlum, ǝgǝr dostung üqün kepil bolƣan bolsang, yat kixigǝ ⱪol sozup wǝdǝ bǝrgǝn bolsang,
2 aƣzingning sɵzi bilǝn tutulƣan bolsang,
lǝwliringning eytⱪini bilǝn baƣlinip ⱪalƣan bolsang,
3 yeⱪiningning ⱪoliƣa qüxkining üqün
mundaⱪ ⱪilƣin, ǝy oƣlum:
Ɵzüngni ⱪutulduruxung üqün uning ⱪexiƣa barƣin,
uning aldiƣa yiⱪilip, uningƣa yalwurƣin.
4 Kɵzliringgǝ uyⱪu bǝrmigin,
ⱪirpiⱪliringni ⱪaⱪmiƣin.
5 Owqining ⱪolidin ⱪeqiwatⱪan keyiktǝk,
owqining toridin ⱪeqiwatⱪan ⱪuxtǝk ⱪutuluxⱪa tirixⱪin.
6 Əy ⱨurun, qümüligǝ berip ⱪarap baⱪⱪin,
uning ⱨǝrikǝtlirigǝ sǝpselip ⱪarap dana bolƣin.
7 uningƣa nǝ sǝrdar, nǝ nazarǝtqi, nǝ hoja bolmisimu,
8 u yaz waⱪtida ozuⱪini tǝyyarlaydu,
orma waⱪtida axliⱪini yiƣidu.
9 Əy ⱨurun, ⱪaqanƣiqǝ uhlaysǝn?
Ⱪaqan uyⱪungdin oyƣinip turisǝn?
10 «Yǝnǝ azƣinǝ uhliwalay, azƣinǝ mügdiwalay,
yǝnǝ azƣinǝ waⱪit ⱪol ⱪoxturup yetiwalay» desǝng,
11 namratliⱪ bir bulangqidǝk üstünggǝ kelidu,
moⱨtajliⱪ bir ⱪaraⱪqidǝk seni basidu.
12 Ⱨeqnemigǝ yarimaydiƣan yaman adǝm
aƣzi bilǝn yalƣan sɵzlǝp yüridu.
13 U kɵzlirini ⱪisip,
putliri wǝ ⱪolliri bilǝn xǝrǝt ⱪilip yüridu.
14 Mundaⱪ kixining kɵngli ⱪara niyǝtliktur,
u ⱨǝmixǝ jedǝl qiⱪirip yüridu.
15 Xunga uningƣa tuyuⱪsiz bala-ⱪaza kelidu,
u ⱪutulalmay birdinla ezilidu.
16 Pǝrwǝrdigar yaman kɵrgǝn altǝ nǝrsǝ bar,
Uningƣa yirginqlik bolƣan yǝttǝ nǝrsǝ bar:
17 Ular bolsa tǝkǝbbur kɵz, yalƣanqi til,
bigunaⱨ ⱪan tɵkidiƣan ⱪollar,
18 ⱪara niyǝtlik kɵngül,
yamanliⱪⱪa yügüridiƣan putlar,
19 yalƣan sɵzlǝydiƣan sahta guwaⱨqi
wǝ ⱪerindaxlar arisida jedǝl teriƣuqi.
20 Əy oƣlum, atangning buyruⱪliriƣa boysunƣin,
anangning tǝlimini taxlimiƣin.
21 Bularni yürikinggǝ ornitiwalƣin,
boynungƣa marjandǝk esiwalƣin.
22 Barƣiningda ular seni baxlaydu,
yatⱪiningda seni saⱪlaydu,
oyƣanƣiningda sanga sɵzlǝydu.
23 Qünki buyruⱪ bir qiraƣdur, tǝlim bir nurdur
wǝ tǝrbiyining tǝnbiⱨliri ⱨayat yolidur.
24 Ular seni saⱪlaydu yaman ayaldin
wǝ buzuⱪ hotunning siliⱪ sɵzliridin.
25 Ɵz kɵnglüngdǝ uning güzǝllikini arzu ⱪilmiƣin,
u seni ⱪax-kɵz oynitixi bilǝn jǝlp ⱪilip azdurmisun.
26 Qünki paⱨixǝ ayalning sǝwǝbidin
kixi bir qixlǝm nanƣa moⱨtaj bolar,
baxⱪa kixining hotuni kixining ǝziz jenini owliwalar.
27 Bir kixi ⱪoyniƣa ot salsa, kiyimi kɵyüp kǝtmǝmdu?
28 Qoƣlar üstidǝ mangsa, putliri kɵyüp kǝtmǝmdu?
29 Ɵz ⱪoxnisining ayali bilǝn bir orunda yatⱪan kixi xundaⱪ bolar,
kimki baxⱪisining ayaliƣa tǝgsǝ, jazasiz ⱪalmas.
30 Aq ⱪelip, ɵz ⱪorsiⱪini toyƣuzux üqün
oƣriliⱪ ⱪilƣan oƣri kǝmsitilmǝs.
31 Lekin tutulup ⱪalsa, u yǝttǝ ⱨǝssǝ tɵlǝm tɵlǝr,
ɵyidiki ⱨǝmmǝ nǝrsini berixi lazim bolar.
32 Bir ayal bilǝn zina ⱪilƣuqi ǝⱪilsizdur,
u ɵz jeniƣa ⱨalakǝt elip kelidu.
33 U tayaⱪ wǝ dǝxnǝm yǝydu,
uning xǝrmǝndiliki ɵqürülmǝydu.
34 Qünki künlǝx oti erining ƣǝzipini ⱪozƣar,
u intiⱪam alƣan künidǝ rǝⱨim ⱪilmas.
35 U sowƣat ⱪobul ⱪilmas,
ⱪanqilik qong tɵlǝm bǝrsǝngmu, u razi bolmas.