1 Nǝƣmiqilǝrning bexiƣa tapxurulup, tarliⱪ sazlar bilǝn eytilsun dǝp, Dawud yazƣan mǝdⱨiyǝ nahxisi.

2 Əy ⱨǝⱪⱪaniyliⱪimning ilaⱨi!

Nalǝ ⱪilsam sanga, jawab bǝr manga.

Külpǝttǝ ⱪalƣinimda, azad ⱪilding meni.

Xǝpⱪǝt ⱪilip angla du’ayimni.

3 Əy insan baliliri,

ⱪaqanƣiqǝ mening xan-xɵⱨritimni dǝpsǝndǝ ⱪilisilǝr?

Ⱪaqanƣiqǝ ⱪuruⱪ sɵzgǝ kɵngül berip,

yalƣanqiliⱪni izdǝp yürisilǝr?

Selaⱨ.

4 Əmma bilip ⱪoyunglarki,

Pǝrwǝrdigar tǝⱪwadar kixini tallaydu.

Mǝn Uningƣa iltija ⱪilsam,

Pǝrwǝrdigar meni anglaydu.

5 Aqqiⱪlanƣininglarda ⱨǝm, gunaⱨ ⱪilmanglar.

Ornunglarda yetip ɵz kɵngülliringlarda oylinip, tinqlininglar.

Selaⱨ.

6 Ⱨǝⱪⱪaniyliⱪning ⱪurbanliⱪlirini sununglar,

wǝ Pǝrwǝrdigarƣa tayininglar.

7 Nurƣun kixi: «Kim bizgǝ yahxiliⱪ kɵrsitǝlǝydu?» deyixidu.

Əy Pǝrwǝrdigar, yüzüngning nurini bizning üstimizgǝ qaqⱪin.

8 Sǝn mening kɵnglümgǝ bǝrgǝn huxalliⱪ,

axliⱪ wǝ yengi xarab mol bolƣanlarning huxalliⱪidinmu ziyadidur.

9 Amanliⱪta yetip uhlaymǝn,

qünki pǝⱪǝt Sǝn, ǝy Pǝrwǝrdigar,

meni tinq-amanliⱪta saⱪlaysǝn.