1 Ⱪeynanisi Na’omi uningƣa sɵzlǝp: «Əy ⱪizim, sening aramliⱪing üqün ɵy-oqaⱪliⱪ boluxungni izdimǝymǝnmu? 2 Sǝn bizning tuƣⱪinimiz Bo’azning dedǝkliri bilǝn ixlǝp yürdüng xundaⱪmu? Mana ⱪara, u bu keqǝ haminida arpa soruydu. 3 Əmdi sǝn yuyunup-tarinip, ǝtir sürüp, kiyimliringni kiyip, hamanƣa barƣin. Lekin eⱨtiyat ⱪilip, u kixi tamaⱪ yǝp bolƣuqǝ ɵzüngni uningƣa kɵrsǝtmigin. 4 U yatⱪanda uning uhlaydiƣan yerini eniⱪ kɵrüwal. Andin sǝn berip, ayaƣ tǝripini eqip, xu yǝrdǝ yetiwalsang, u ɵzi sanga nemǝ ⱪilixing kerǝklikini eytip beridu» dedi. 5 U uningƣa: «Sǝn nemǝ desǝng xuni ⱪilimǝn» dedi.

6 U hamanƣa qüxüp, ⱪeynanisi uningƣa buyruƣandǝk ⱪildi. 7 Bo’az yǝp-iqip, kɵnglini hux ⱪilip, qǝxning yeniƣa berip yatⱪanda, Rut kelip, tuydurmay ayaƣ tǝripini eqip yatti. 8 Yerim keqidǝ Bo’az qɵqüp aldiƣa engixkǝndǝ, mana ayiƣida bir ayal yetiptu. 9 U: «Kimsǝn?» dǝp soridi. «Mǝn dediking Rut bolimǝn. Sǝn meni ⱪutulduralaydiƣan yeⱪin tuƣⱪan bolƣandin keyin, dedikingni ⱪanitingni astiƣa alƣaysǝn» dǝp jawab bǝrdi. 10 U uningƣa mundaⱪ dedi: «Əy ⱪizim, Pǝrwǝrdigar sanga bǝrikǝt ata ⱪilsun! Ahirda awwalⱪidinmu qongraⱪ meⱨribanliⱪ kɵrsǝtting. Yax yigitlǝr mǝyli kǝmbǝƣǝl, mǝyli bay bolsun, ularning kǝynidin kǝtmiding. 11 Əy ⱪizim, ǝmdi ⱪorⱪmiƣin. Ⱨǝrnemǝ sorisang sanga orundap berimǝn, qünki xǝⱨirimdiki ⱨǝmmǝ hǝlⱪ seni yahxi ayal dǝp bilidu. 12 Ⱪutulduralaydiƣan yeⱪin tuƣⱪining bolƣinim rast, lekin seni ⱪutulduralaydiƣan mǝndin yeⱪinraⱪ tuƣⱪining bar. 13 Əmdi bu keqǝ bu yǝrdǝ ⱪalƣin. Əgǝr ǝtǝ u kixi yeⱪin tuƣⱪanliⱪ ⱨoⱪuⱪi boyiqǝ seni elixni halisa, alsun. Lekin u yeⱪin tuƣⱪanliⱪ ⱨoⱪuⱪi boyiqǝ seni almisa, tirik Pǝrwǝrdigarning nami bilǝn ⱪǝsǝm ⱪilimǝnki, mǝn yeⱪin tuƣⱪanliⱪ ⱨoⱪuⱪi boyiqǝ seni alimǝn. Əmdi sǝⱨǝrgiqǝ bu yǝrdǝ yetip turƣin».

14 U uning ayaƣlirining yenida sǝⱨǝrgiqǝ yetip, biri yǝnǝ birini tonuƣudǝk ayding bolmasta turup kǝtti. Qünki Bo’az: «Bir ayalning bu hamanƣa kǝlginini ⱨeqkim bilmisun» dǝp eytⱪanidi. 15 U uningƣa: «Ɵzüng kiygǝn yepinqini eqip tutup turƣin» dedi. U uni tutup turƣanda Bo’az arpidin altǝ kǝmqǝn kǝmlǝp tɵküp berip, uni uning ɵxnisigǝ artip ⱪoyup, ɵzi xǝⱨǝrgǝ ketti.

16 Rut ⱪeynanisining yeniƣa ⱪaytip kǝlgǝndǝ, u: «Əy ⱪizim, ixing ⱪandaⱪ boldi?» dǝp soridi. U bu adǝmning uningƣa ⱪilƣinining ⱨǝmmisini sɵzlǝp berip, 17 «U: ‹Ɵz ⱪeynanangƣa ⱪuruⱪ ⱪaytmiƣin› dǝp, bu altǝ kǝmqǝn arpini bǝrdi» dedi. 18 Na’omi uningƣa: «Əy ⱪizim, bu ixning ahirini kɵrgüqǝ sǝwr ⱪilƣin. U adǝm bügün bu ixni pütküzmǝy aram almaydu» dedi.