1 Hǝlⱪning ƣotuldixip turƣini Pǝrwǝrdigarning ⱪuliⱪiƣa yamanliⱪ bolup anglandi. Pǝrwǝrdigar buni angliƣinida uning ⱪattiⱪ ƣǝzipi ⱪozƣaldi. Pǝrwǝrdigarning ot-yalⱪuni ularning arisida tutixip, bargaⱨning qetidikilǝrni yutup kǝtti. 2 Xuning bilǝn hǝlⱪ Musaƣa pǝryad ⱪildi. Andin Musa Pǝrwǝrdigarƣa du’a ⱪildi wǝ xuning bilǝn ot ɵqüp ⱪaldi. 3 Pǝrwǝrdigarning ot-yalⱪuni u yǝrdǝ ularning arisida kɵyüp turƣini üqün u jayƣa «Tabera» dǝp at ⱪoyuldi. ^◼  

4 Əmma ularning arisidiki yat kixilǝrning nǝpsliri taⱪildaxti. Bǝni Isra’ilmu nalǝ ⱪilip: «Əmdi kimmu bizgǝ gɵx berǝr? 5 Mana, biz Misirda bikarƣa yegǝn beliⱪni yad etimiz, tǝrhǝmǝk, ⱪoƣun, küdǝ, piyaz wǝ samsaⱪmu esimizdǝ bar. 6 Lekin bu yǝrdǝ mannadin baxⱪa yegili ⱨeq nǝrsǝ yoⱪ, biz ⱪurup ketimiz» deyixti. 7 Manna bolsa axkɵki uruⱪiƣa ohxaytti, rǝnggi mǝrwayittǝk idi. 8 Hǝlⱪ ǝtrapida aylinip yürüp uni yiƣip, bǝzidǝ yarƣunqaⱪta tartatti, bǝzidǝ ⱨawanqida soⱪup, uni ⱪazanƣa selip pixurup, uningdin nan pixuratti. Uning tǝmi bolsa yaƣliⱪ toⱪaqning tǝmidǝk idi. 9 Xǝbnǝm keqisi bargaⱨning üstigǝ qüxkǝndǝ mannamu xuning üstigǝ qüxǝtti. 10 Musa, hǝlⱪning ⱪaysila a’ilǝ-jǝmǝttin bolsun, ⱨǝrbirlirining ɵz qedirining ixikidǝ nalǝ ⱪilip yiƣliƣinini anglidi. Bu qaƣda Pǝrwǝrdigarning ⱪattiⱪ ƣǝzipi ⱪozƣaldi, Musamu bǝk narazi idi. 11 Andin Musa Pǝrwǝrdigarƣa mundaⱪ dedi: «Nemixⱪa Sǝn bu hǝlⱪning ⱨǝmmisining yükini manga artip, Ɵz hizmǝtkaringni azabⱪa salding? Nemixⱪa nǝziringdǝ iltipat tapmidim? 12 Mǝn pütün bu hǝlⱪⱪǝ ⱨamilidar boldummu? Ularni mǝn tuƣdummu? Bolmisa nemixⱪa Sǝn manga: ‹Mǝn Ɵzüm ularning ata-bowiliriƣa ⱪǝsǝm bilǝn wǝdǝ ⱪilƣan zeminƣa, ularni bir ǝmqǝktiki balidǝk ɵz ⱪuqiⱪingda kɵtürüp elip barƣin› dǝwatisǝn. 13 Pütün bu hǝlⱪⱪǝ ⱪǝyǝrdin gɵx tepip berǝlǝymǝn? Ular manga: ‹Bizgǝ yegili gɵx bǝrgin!› dǝp nalǝ ⱪiliwatidu. 14 Mǝn yalƣuz bu ⱨǝmmǝ hǝlⱪni kɵtürüp yürǝlmǝymǝn. Bu ix manga ziyadǝ eƣir kelidu. 15 Əgǝr Sǝn manga bu tǝriⱪidǝ mu’amilǝ ⱪilsang, meni ɵltürüwǝtkin, Sǝndin ɵtünǝy. Əgǝr nǝziringdǝ iltipat tapⱪan bolsam, meni bu azabliⱪ ⱨalitimni kɵrmǝydiƣan ⱪilƣaysǝn».

16 Pǝrwǝrdigar Musaƣa mundaⱪ jawab bǝrdi: «Sǝn Bǝni Isra’ilning aⱪsaⱪalliri iqidin ɵzüng tonuydiƣan hǝlⱪning aⱪsaⱪalliri wǝ ularƣa baxliⱪ bolƣanlardin yǝtmix kixini aldimƣa yiƣip, ularni uqrixix qediriƣa kǝltürüp, u yǝrdǝ ɵzüng bilǝn billǝ turƣuzƣin. 17 Mǝn u yǝrgǝ qüxüp, sǝn bilǝn sɵzliximǝn wǝ sening üstüngdiki Roⱨtin elip, ularning üstigǝ tɵkimǝn. Andin keyin, ular hǝlⱪning yükini kɵtürüxtǝ sanga yardǝm berixidiƣan bolidu. Xuning bilǝn sǝn bu yükni yalƣuz kɵtürmǝydiƣan bolisǝn. 18 Andin hǝlⱪⱪǝ mundaⱪ degin: ‹Silǝr ǝtigiqǝ ɵzünglarni Pǝrwǝrdigarƣa atap paklisanglar, yegili gɵx tapisilǝr. Silǝr yiƣa-zar ⱪilip Pǝrwǝrdigarning ⱪuliⱪiƣa nalǝnglarni yǝtküzüp: «Əmdi bizgǝ kimmu gɵx beridu? Misirda turƣinimizda ǝⱨwalimiz yahxi idi» degininglar üqün, Pǝrwǝrdigar ǝmdi silǝrgǝ yegili gɵx beridu. 19 Silǝr bir-ikki kün, bǝx-on kün yaki yigirmǝ kün ǝmǝs, 20 bǝlki pütün bir ay burunliringlardin qiⱪⱪuqǝ, kɵnglünglar ilǝxküqǝ gɵx yǝysilǝr, qünki silǝr aranglarda bolƣan Pǝrwǝrdigarni taxlap: «Misirdin nemixⱪa qiⱪip kǝlduⱪ?» dǝp Uning aldida nalǝ ⱪilip yiƣa-zar ⱪildinglar›».

21 Lekin Musa: «Mening qɵrǝmdiki hǝlⱪning ǝrkǝk piyadilǝrning sani altǝ yüz ming! Əmma Sǝn: ‹Mǝn ularƣa gɵx berimǝn, ular pütün bir ay dawamida bu gɵxni yǝydu› dǝysǝn. 22 Ularƣa soyup berixkǝ yǝtküdǝk ⱪoy wǝ kala tepilamdu? Ularni toyƣuzux üqün dengizning ⱨǝmmǝ beliⱪlirini yiƣmaⱪ lazim ǝmǝsmu?» dedi. 23 Pǝrwǝrdigar Musaƣa jawab berip: «Pǝrwǝrdigarning ⱪoli ⱪisⱪa bolup ⱪaptimu? Mana, Mening sanga eytⱪinim ǝmǝlgǝ axurulamdu-yoⱪ? Əmdi kɵrisǝn» dedi.

24 Musa taxⱪiriƣa qiⱪip, Pǝrwǝrdigar nemǝ degǝn bolsa uni hǝlⱪⱪǝ eytip bǝrdi. U hǝlⱪning aⱪsaⱪalliridin yǝtmix kixini yiƣip, ularni ibadǝt qedirining qɵrisidǝ turƣuzup ⱪoydi. 25 Andin Pǝrwǝrdigar bulut iqidǝ qüxüp, Musa bilǝn sɵzlixip, uning üstidiki Roⱨtin elip, uni bu yǝtmix aⱪsaⱪalning üstigǝ ⱪoydi. Xundaⱪki, Roⱨ ularning üstigǝ qüxkǝn ⱨaman ular pǝyƣǝmbǝrlik ⱪilixⱪa baxlidi. Lekin keyin ular undaⱪ ⱪilalmidi.

26 Ularning iqidin Əldad wǝ Medad isimliⱪ ikki kixi bargaⱨta ⱪalƣanidi. Ular ibadǝt qediriƣa barmiƣan bolsimu, tizimƣa elinƣanlardin bolƣaqⱪa, ularning üstigimu Roⱨ qüxkini üqün, ular bargaⱨta pǝyƣǝmbǝrlik ⱪilixⱪa baxlidi. 27 Bir yigit Musaning aldiƣa yügürüp kelip: «Əldad wǝ Medad degǝn kixilǝr bargaⱨta pǝyƣǝmbǝrlik ⱪiliwatidu» dedi. 28 Musaning yax hizmǝtkarlirining biri, Nunning oƣli Yǝxu’a buni anglap: «Əy hojam Musa, sǝn ularni tosⱪin» dedi. 29 Lekin Musa uningƣa: «Nemixⱪa mǝn üqün mundaⱪ ǝndixǝ ⱪilisǝn? Kaxki Pǝrwǝrdigarning ⱨǝmmǝ hǝlⱪi pǝyƣǝmbǝr bolsa idi, Pǝrwǝrdigar Ɵz Roⱨini ularning üstigǝ ⱪoysa idi» dedi.

30 Xuning bilǝn Musa Isra’ilning aⱪsaⱪalliri bilǝn billǝ bargaⱨⱪa ⱪaytip kǝldi.

31 Andin Pǝrwǝrdigar tǝripidin ⱪattiⱪ bir boran qiⱪip, dengizdin bɵdünilǝrni uqurup elip kelip, bargaⱨning qɵrisigǝ taxlidi, ular bargaⱨtin u tǝrǝpkǝ bir künlük yol wǝ bu tǝrǝpkǝ bir künlük yol kǝlgüdǝk, uzunluⱪta yǝr yüzini ikki gǝz kǝlgüdǝk igizliktǝ ⱪaplidi. 32 Hǝlⱪ ornidin turuxup, xu küni pütün kün wǝ pütün keqǝ bɵdünilǝrni yiƣipla ⱪalmay, ǝtisimu pütün kün bularni yiƣip yürdi. Ⱨǝmmidin az yiƣⱪan kixi on homǝr yiƣdi. Yiƣip bolƣanda ular bɵdünilǝrni bargaⱨning qɵrisigǝ yeyip ⱪoydi. ^◼   33 Lekin gɵx tehi qaynalmastin ularning qixliri arisida turƣanda, Pǝrwǝrdigarning ƣǝzipining oti hǝlⱪⱪǝ tutixip, Pǝrwǝrdigar hǝlⱪni eƣir bir waba bilǝn urdi. 34 U jayƣa Ⱪibrot-Ⱨatawǝ dǝp at ⱪoyuldi. qünki u yǝrdǝ nǝpsi yaman kixilǝr dǝpnǝ ⱪilinƣanidi. ^◼   35 Hǝlⱪ Ⱪibrot-Ⱨatawǝdin ⱪozƣilip mengip Hazerotⱪa bardi, wǝ ular Hazerotta tohtidi.