1 Pǝrwǝrdigar Musani qaⱪirip, ibadǝt qediridin uningƣa sɵz ⱪilip mundaⱪ dedi:

2 «Sǝn Bǝni Isra’ilƣa mundaⱪ degin:

‹Əgǝr silǝrdin biri Pǝrwǝrdigarning aldiƣa bir ⱪurbanliⱪni kǝltürüxni halisa, uni qarwa maldin, yǝni kalilardin yaki uxxaⱪ mallardin kǝltürüxünglar kerǝktur.

3 Əgǝr uning kalilardin elinƣan ⱪurbanliⱪi kɵydürmǝ ⱪurbanliⱪ bolsa, u ǝyibsiz bir ǝrkǝk ⱨaywanni kǝltürsun. Pǝrwǝrdigarning aldida mǝⱪbul bolux üqün uni ibadǝt qedirining kirix eƣizi aldida ⱪurbanliⱪ ⱪilsun. 4 Mǝⱪbul bolup, uningƣa kǝfarǝt kǝltürüx üqün, u kɵydürmǝ ⱪurbanliⱪ bolidiƣan ⱨaywanning bexiƣa ɵz ⱪolini ⱪoysun. ^◼   5 Andin u Pǝrwǝrdigarning aldida mozayni boƣuzlisun. Kaⱨinlar bolƣan Ⱨarunning oƣulliri ⱪanni elip kelip, uni ibadǝt qedirining kirix eƣizi aldidiki ⱪurbangaⱨning qɵrisigǝ qaqsun. 6 Andin keyin ⱪurbanliⱪ ⱪilƣuqi kɵydürmǝ ⱪurbanliⱪ bolƣan ⱨaywanning terisini soyup, uni parqilisun. 7 Kaⱨin Ⱨarunning oƣulliri ⱪurbangaⱨta ot ⱪalap, otning üstigǝ otun tizip ⱪoysun. 8 Andin keyin Ⱨarunning oƣulliri bolƣan kaⱨinlar, gɵx parqilirini kalla wǝ yeƣi bilǝn ⱪoxup, ⱪurbangaⱨtiki otning üstidiki otunning üstigǝ tizip ⱪoysun. 9 Lekin üqǝy-baƣirliri wǝ paqaⱪliri suda yuyulƣandin keyin, kaⱨin ⱨǝmmisini elip, ⱪurbangaⱨning üstidǝ kɵydürsun. Bu otta kɵydürülidiƣan ⱪurbanliⱪ Pǝrwǝrdigarning aldiƣa hux puraⱪ kǝltüridiƣan kɵydürmǝ ⱪurbanliⱪ bolidu.

10 Əgǝr uning ⱪurbanliⱪi padiliridin elinƣan ⱪoy yaki ɵqkǝ bolsa u ǝyibsiz bir ǝrkǝk ⱨaywan kǝltürsun. 11 U uni ⱪurbangaⱨning ximal tǝripidǝ Pǝrwǝrdigarning aldida boƣuzlisun. Andin keyin, Ⱨarunning oƣulliri, yǝni kaⱨinlar ⱪanni elip, uni ⱪurbangaⱨning qɵrisigǝ qaqsun. 12 Ⱪurbanliⱪ ⱪilƣuqi gɵxni parqilap, kalla bilǝn yaƣni kesip ayrisun. Andin kaⱨin bu nǝrsilǝrni elip, ⱪurbangaⱨtiki otning üstidiki otunning üstigǝ tizip ⱪoysun. 13 Lekin üqǝy-baƣirliri wǝ paqaⱪliri suda yuyulƣandin keyin, kaⱨin ⱨǝmmisini elip kelip, ⱪurbangaⱨning üstidǝ kɵydürsun. Bu otta kɵydürülidiƣan ⱪurbanliⱪ Pǝrwǝrdigarning aldiƣa hux puraⱪ kǝltüridiƣan kɵydürmǝ ⱪurbanliⱪ bolidu.

14 Əgǝr u Pǝrwǝrdigar üqün uqar ⱪanatlardin kɵydürmǝ ⱪurbanliⱪ kǝltürüxni halisa, pahtǝklǝrdin yaki kǝptǝr baqkiliridin ⱪurbanliⱪ kǝltürsun. 15 Kaⱨin uni ⱪurbangaⱨⱪa elip kelip, bexini tolƣap üzüp, ⱪurbangaⱨning üstidǝ kɵydürsun. Ⱪeni bolsa ⱪurbangaⱨning temiƣa siⱪip sepilsun. 16 Taxliⱪini, iqidiki nǝrsiliri bilǝn ⱪoxup, ⱪurbangaⱨning xǝrⱪ tǝripidiki küllükkǝ taxliwǝtsun. 17 Ⱪurbanliⱪ ⱪilƣuqi, ⱪurbanliⱪni parqiliwǝtmǝy, uning ikkila ⱪanitining otturisidin yerip ⱪoysun. Andin keyin kaⱨin buni elip, ⱪurbangaⱨtiki otning üstidiki otunning üstigǝ ⱪoyup kɵydürsun. Bu otta kɵydürülidiƣan ⱪurbanliⱪ Pǝrwǝrdigarning aldiƣa hux puraⱪ kǝltüridiƣan kɵydürmǝ ⱪurbanliⱪ bolidu.