1 Ɵz bala-qaⱪilirini elip, Yaⱪub bilǝn billǝ Misirƣa barƣan Isra’ilning oƣullirining isimliri tɵwǝndikiqǝ:

2 Rubǝn, Ximon, Lawiy, Yǝⱨuda, 3 Issakar, Zǝbulun, Bǝnyamin, 4 Dan, Naftali, Gad wǝ Axǝr. 5 Yaⱪubning puxtidin bolƣanlar ⱨǝmmisi yǝtmix jan idi. Bu waⱪitta Yüsüp Misirda idi. ^◼   6 Keyin Yüsüp wǝ uning ⱪerindaxliri, ⱨǝmdǝ barliⱪ zamandaxliri wapat boldi. 7 Lekin Bǝni Isra’il kɵp pǝrzǝnt kɵrüp, tez kɵpiyip, intayin küqǝydi. Zemin ular bilǝn tolup kǝtti.

8 Keyin Yüsüpni bilmigǝn yengi bir padixaⱨ Misirda tǝhtkǝ qiⱪti. 9 U ɵz hǝlⱪigǝ: «Mana, Bǝni Isra’ilning hǝlⱪi bizdin ziyadǝ kɵpiyip küqlinip kǝtti. 10 Əmdi biz ular bilǝn aⱪilanǝ ix tutayli. Bolmisa ular tehimu kɵpiyip kǝtkǝndǝ, ǝgǝr bir jǝng qiⱪip ⱪalsa, ular düxmǝnlirimizgǝ ⱪoxulup bizgǝ ⱪarxi urux ⱪilip, zemindin qiⱪip ketixi mumkin» dedi. 11 Xuning bilǝn Misirliⱪlar ularni eƣir ixlar bilǝn ezix üqün, ularning üstigǝ ǝmgǝk nazarǝtqiliri ⱪoydi. Ular Fir’ǝwn üqün Pitom bilǝn Ramsǝs degǝn ambar xǝⱨǝrlirini yasap bǝrdi. 12 Lekin Misirliⱪlar ularni ⱪanqǝ ǝzsimu, ular tehimu kɵpiyip, zeminda awup kǝtti. Bu sǝwǝbtin ular Bǝni Isra’ildin ǝnsirǝxkǝ baxlidi. 13 Xuning bilǝn Misirliⱪlar Bǝni Isra’ilƣa tehimu zulum ⱪilip, ularni tehimu eƣir ixlarƣa saldi. 14 Misirliⱪlar lay etix, hix ⱪuyux wǝ etizlarda ⱨǝr hil ixlar ⱪilix ⱪatarliⱪ eƣir ǝmgǝk bilǝn ularning ⱨayatini aqqiⱪ ⱪilatti. Ular ⱨaxarƣa tutulup, zulum astida ⱪiynilip, ⱨǝmmǝ eƣir ixlarni ⱪilatti.

15 Misir padixaⱨi biri Xifra wǝ yǝnǝ biri Pu’a dǝp atalƣan ikki Ibraniy tuƣut anisiƣa: 16 «Silǝr Ibraniy ayallarni tuƣdurƣininglarda, yahxi ⱪaranglar. Əgǝr oƣul tuƣulsa uni ɵltürüwetinglar, ⱪiz tuƣulsa uni tirik ⱪaldurunglar» dedi. 17 Lekin tuƣut aniliri Hudadin ⱪorⱪup, Misirning padixaⱨi ɵzlirigǝ eytⱪandǝk ⱪilmay, bǝlki balilarni tirik ⱪaldurdi. 18 Misirning padixaⱨi tuƣut anilirini qaⱪirtip, ulardin: «Nemixⱪa mundaⱪ ⱪilip, balilarni tirik ⱪaldurdunglar?» dǝp soridi. 19 Tuƣut aniliri Fir’ǝwngǝ: «Ibraniy ayallar Misirliⱪ ayallarƣa ohximaydu, ular timǝn, küqlük bolƣaqⱪa tuƣut anisi yetip kǝlmǝstǝ ɵzliri tuƣuwalidu» dǝp jawab bǝrdi. 20 Xunga Huda tuƣut aniliriƣa mǝrⱨǝmǝt ⱪilip bǝrikǝt ata ⱪildi. Hǝlⱪ bolsa kɵpiyip ketip, naⱨayiti küqǝydi. 21 Tuƣut aniliri Hudadin ⱪorⱪⱪini üqün U ularni ɵy-oqaⱪliⱪ ⱪilip bǝrikǝtlidi.

22 Andin keyin Fir’ǝwn ɵzining pütün hǝlⱪigǝ: «Ularning yengi tuƣulƣan oƣul balilirining ⱨǝmmisini Nil dǝryasiƣa taxliwetinglar, ⱨǝmmǝ ⱪiz balilirini tirik ⱪaldurunglar» dǝp ǝmr ⱪildi.