Musaning tuƣuluxi
2
1 Lawiy jǝmǝtidin bolƣan bir kixi Lawiyning nǝslidin bolƣan bir ⱪizni hotunluⱪⱪa aldi. 2 Bu ayal ⱨamilidar bolup bir oƣul tuƣup, uning qirayliⱪ ikǝnlikini kɵrginidǝ uni üq ayƣiqǝ yoxurup saⱪlidi. 3 Uni yǝnǝ yoxuralmaydiƣanliⱪini bilginidǝ, ⱪomuxtin bir sanduⱪ yasap, uni mom wǝ ⱪarimay bilǝn suwap, balini iqigǝ selip, Nil dǝryasining boyidiki ⱪomuxluⱪⱪa ⱪoyup ⱪoydi. 4 Balining aqisi bolsa uningƣa nemǝ bolarkin dǝp, yiraⱪtin ⱪarap turdi. 5 U qaƣda Fir’ǝwnning ⱪizi suƣa qɵmülüx üqün dǝryaƣa qüxti. Uning kenizǝkliri bolsa dǝryaning lewidǝ aylinip yürüxti. Fir’ǝwnning ⱪizi ⱪomuxluⱪning arisidiki sanduⱪni kɵrüp ⱪelip, ɵz kenizikini uni elip kelixkǝ ǝwǝtti. 6 U sanduⱪni eqip ⱪarisa, yiƣlap turƣan bir oƣul balini kɵrüp, uningƣa iqi aƣrip: «Bu Ibraniylarning baliliridin biri ikǝn» dedi. 7 Bu qaƣda balining aqisi Fir’ǝwnning ⱪizidin: «Sǝn üqün balini emitip baⱪidiƣan bir Ibraniy ana tepip kelǝymu?» dǝp soridi. 8 Fir’ǝwnning ⱪizi uningƣa: «Maⱪul, barƣin» degǝndǝ u berip, balining anisini qaⱪirip kǝldi. 9 Fir’ǝwnning ⱪizi uningƣa: «Bu balini elip, mǝn üqün emitip qong ⱪilsang, sanga ix ⱨǝⱪⱪingni berimǝn» dedi. Ayal balini elip, uni emitip baⱪti. 10 Bala qong bolƣanda anisi uni Fir’ǝwnning ⱪizining aldiƣa elip bardi. U uningƣa oƣul boldi. U: «Uni sudin qiⱪiriwaldim» dǝp, uningƣa Musa dǝp at ⱪoydi. ◼
Musaning bir misirliⱪni ɵltürüxi wǝ ⱪeqixi
11 Musa qong bolƣandin keyin xundaⱪ boldiki, u ɵz ⱪerindaxlirining yeniƣa berip, ularning eƣir ǝmgǝkkǝ seliniwatⱪinini kɵrdi. Bu ǝsnada u bir Misirliⱪ adǝmning uning Ibraniy ⱪerindaxliridin bolƣan bir adǝmni uruwatⱪinini kɵrüp ⱪaldi. 12 U ⱨǝr tǝrǝpkǝ ⱪarap, ⱨeq kixi bolmiƣinini kɵrginidǝ, Misirliⱪni ɵltürüp, uni ⱪumƣa kɵmüp yoxurup ⱪoydi. 13 Ətisi u yǝnǝ barƣinida, mana, ikki Ibraniy adǝm bir-biri bilǝn uruxuwatatti. U naⱨǝⱪ urux ⱪilƣan kixigǝ: «Ɵz ⱪerindixingni nemixⱪa urisǝn?» dedi. 14 U jawab berip: «Kim seni üstimizgǝ ⱨakim yaki soraⱪqi ⱪilip ⱪoydi? Misirliⱪni ɵltürginingdǝk menimu ɵltürmǝkqimusǝn?» dedi. Xuni desǝ, Musa ⱪorⱪup: «Bu ix jǝzmǝn axkara bolup ⱪaldi» dǝp oylidi.
15 Fir’ǝwn bu ixni anglap ⱪelip, Musani ɵltürmǝkqi boldi. Lekin Musa Fir’ǝwnning aldidin ⱪeqip qiⱪip, Midiyanning zeminiƣa berip olturaⱪlaxti. U yǝrdǝ u bir ⱪuduⱪning yenida olturup ⱪaldi.
Musa Midiyanning kaⱨininingkidǝ olturuxi
16 Midiyandiki kaⱨinning yǝttǝ ⱪizi bar idi. Ular kelip, su tartip, atisining ⱪoylirini suƣirix üqün oⱪurlarni tolduruxⱪa baxlidi. 17 Bu qaƣda padiqilar kelip, ularni ⱨǝydiwǝtmǝkqi idi, lekin Musa dǝs turup, ⱪizlarƣa yardǝm berip, ⱪoylirini suƣirip bǝrdi. 18 Ular ɵz atisi Reⱨu’ǝlning yeniƣa ⱪaytip kǝlgǝndǝ, u ulardin: «Nemixⱪa bügün xundaⱪ qaⱪⱪan ⱪaytip kǝldinglar?» dǝp soridi. 19 Ular: «Bir Misirliⱪ adǝm bizni padiqilarning ⱪolidin ⱪutⱪuzup, biz üqün su tartip, ⱪoylarni suƣirip bǝrdi» dǝp jawab berixti. 20 U ⱪizliriƣa: «U kixi ⱪǝyǝrdǝ ⱪaldi? Nemixⱪa uni arⱪanglarƣa ⱪoyup kǝldinglar? Uni tamaⱪ yeyixkǝ qaⱪiringlar» dedi. 21 Musa u kixi bilǝn turuxⱪa razi boldi. U kixi bolsa ɵz ⱪizi Zipporani uningƣa hotunluⱪⱪa bǝrdi.
22 U uningƣa bir oƣul tuƣⱪanda, Musa «Mǝn yaⱪa yurtta musapir bolup ⱪaldim» dǝp, uningƣa Gǝrxom dǝp at ⱪoydi. ◼
23 Uzun bir waⱪit ɵtkǝndin keyin, Misirning padixaⱨi ɵldi. Lekin Bǝni Isra’il ⱪulluⱪ ⱨalitidǝ aⱨ urup pǝryad ⱪilƣinida, ularning ⱪulluⱪi sǝwǝblik ⱪilƣan nalǝ-pǝryadi Hudaƣa yǝtti. 24 Huda ularning nalǝ-pǝryadini anglap, Ɵzining Ibraⱨim, Is’ⱨaⱪ wǝ Yaⱪub bilǝn tüzgǝn ǝⱨdisini yadiƣa aldi. 25 Huda Bǝni Isra’ilning ⱨalitini kɵrdi wǝ Huda ularƣa kɵngül bɵldi.