1 Musa bolsa Midiyanda kaⱨin bolƣan ⱪeynatisi Yetroning ⱪoylirini baⱪatti. Bir küni u ⱪoylarni ⱨǝydǝp qɵldin ɵtüp Hudaning teƣiƣa, yǝni Horeb teƣiƣa kǝldi. ^◼   2 U yǝrdǝ bir tikǝnlik qatⱪal iqidin qiⱪiwatⱪan ot yalⱪunida Pǝrwǝrdigarning Pǝrixtisi uningƣa kɵründi. U ⱪarisa, qatⱪalda ot yeniwatatti, lekin qatⱪal kɵyüp kǝtmǝywatatti. 3 Musa: «Mǝn u yǝrgǝ qiⱪip, bu ajayip mǝnzirigǝ sǝpselip, tikǝnlik qatⱪalning nemixⱪa kɵyüp kǝtmǝydiƣanliⱪini kɵrǝy» dǝp oylidi. 4 Pǝrwǝrdigar uning buni kɵrgili barƣinini kɵrginidǝ, Huda tikǝnlik qatⱪal iqidin uni: «Əy Musa, ǝy Musa» dǝp qaⱪirdi. U: «Mana mǝn» dǝp jawab bǝrdi. 5 Huda uningƣa: «Bu yǝrgǝ yeⱪin kǝlmigin. Qünki sǝn muⱪǝddǝs jayda turuwatisǝn, putliringdin qoruⱪliringni salƣin» dedi. 6 wǝ yǝnǝ: «Mǝn atangning Hudasi, Ibraⱨimning Hudasi, Is’ⱨaⱪning Hudasi wǝ Yaⱪubning Hudasidurmǝn» dedi. Buni degǝndǝ Musa Hudaƣa ⱪaraxtin ⱪorⱪup, yüzini yepiwaldi.

7 Pǝrwǝrdigar uningƣa mundaⱪ dedi: «Bǝrⱨǝⱪ, Mǝn Misirda turƣan hǝlⱪimning dǝrd-ǝlimini kɵrüp, ǝmgǝk nazarǝtqilirining zulumi sǝwǝblik ⱪilƣan nalǝ-pǝryadini anglidim. Mǝn ularning azab qekiwatⱪanliⱪini bilimǝn. 8 Mǝn ularni Misirliⱪlarning ⱪolidin ⱪutⱪuzup u zemindin qiⱪirip, süt bilǝn ⱨǝsǝl eⱪip turidiƣan yahxi wǝ kǝng bir zeminƣa, yǝni Kǝn’aniylar, Hittiylar, Amoriylar, Pǝrizziylǝr, Hiwwiylar wǝ Yǝbusiylarning zeminiƣa elip berix üqün qüxtüm. 9 Mana, Bǝni Isra’ilning nalǝ-pǝryadi Manga yǝtti wǝ Misirliⱪlarning ularƣa ⱪilƣan zulumini kɵrdüm. 10 Xuning üqün ǝmdi barƣin. Mǝn seni Fir’ǝwnning aldiƣa ǝwǝtimǝn, qünki Mening hǝlⱪim Isra’ilni Misirdin elip qiⱪisǝn».

11 Lekin Musa Hudaƣa: «Mǝn kimtim, Fir’ǝwnning aldiƣa berip, Bǝni Isra’ilni Misirdin elip qiⱪidiƣan?» dedi. 12 Huda uningƣa: «Mǝn sanga yar bolimǝn. Ɵzüm seni ǝwǝtkinimning alamiti xu boliduki, sǝn hǝlⱪni Misirdin elip qiⱪⱪandin keyin, silǝr bu taƣda Hudaƣa ibadǝt ⱪilisilǝr» dedi. 13 Musa Hudaƣa: «Mǝn Bǝni Isra’ilning ⱪexiƣa berip ularƣa: ‹Ata-bowiliringlarning Hudasi meni silǝrgǝ ǝwǝtti› deginimdǝ ular mǝndin: ‹Uning nami nemidur?› dǝp sorisa, ularƣa nemǝ dǝp jawab berǝy?» dedi. 14 Huda Musaƣa: «Mǝn ‹Mǝnggü Bar Bolƣuqi›durmǝn» dedi. Andin U: «Bǝni Isra’ilƣa: ‹Mǝnggü bar bolƣuqi meni silǝrgǝ ǝwǝtti› dǝp eytⱪin» dedi. ^◼   15 Huda Musaƣa yǝnǝ mundaⱪ dedi: «Bǝni Isra’ilƣa: ‹Ata-bowiliringlarning Hudasi, Ibraⱨimning Hudasi, Is’ⱨaⱪning Hudasi wǝ Yaⱪubning Hudasi bolƣan «Yaⱨwǝⱨ» meni silǝrgǝ ǝwǝtip: «Əbǝdkiqǝ bu Mening namim bolidu. Nǝsildin nǝsilgiqǝ bu nam bilǝn ǝslinimǝn» dedi› degin. ^◼   16 Əmdi berip, Isra’ilning aⱪsaⱪallirini yiƣip ularƣa: ‹Ata-bowiliringlarning Hudasi, Ibraⱨimning Hudasi, Is’ⱨaⱪning Hudasi wǝ Yaⱪubning Hudasi bolƣan Pǝrwǝrdigar manga kɵrünüp: «Mǝn silǝrni yoⱪlap kelip, Misirda silǝrgǝ nemǝ bolƣinini kɵrdüm. 17 Xuning üqün, Mǝn silǝrni Misirdiki zulumdin qiⱪirip, Kǝn’aniylar, Hittiylar, Amoriylar, Pǝrizziylǝr, Hiwwiylar wǝ Yǝbusiylarning zemini bolƣan, süt bilǝn ⱨǝsǝl eⱪip turidiƣan zeminƣa elip barimǝn dǝp wǝdǝ ⱪildim»› degin. 18 Ular sening sɵzünggǝ ⱪulaⱪ salidu. Andin sǝn Isra’ilning aⱪsaⱪalliri bilǝn billǝ Misir padixaⱨining aldiƣa berip, uningƣa: ‹Ibraniylarning Hudasi Pǝrwǝrdigar bizgǝ kɵründi. Əmdi sanga yalwurimizki, bizning üq kün yol yürüp qɵlgǝ berip, Pǝrwǝrdigar Hudayimizƣa ⱪurbanliⱪ ⱪiliximizƣa ijazǝt bǝrgǝysǝn› dǝnglar. 19 Lekin Misirning padixaⱨi, ⱪudrǝtlik ⱪolning besimi bilǝnmu, yǝnila silǝrni ⱪoyup bǝrmǝydiƣanliⱪini bilimǝn. ^◼   20 Əmma Mǝn Ɵz ⱪolumni uzitip, ularning arisida kɵrsitidiƣan ⱨǝr hil mɵjizilirim bilǝn Misirni urƣinimdin keyin, u silǝrni ⱪoyup beridu. 21 Bu hǝlⱪni Misirliⱪlarning aldida iltipatⱪa erixtürimǝn. Xundaⱪki, silǝr ⱪuruⱪ ⱪol kǝtmǝy, 22 bǝlki ⱨǝrbir ayal ɵz ayal ⱪoxniliridin wǝ ɵz ɵyidǝ turuwatⱪan yat ayallardin altun-kümüx buyumlar wǝ kiyim-keqǝklǝrni sorisun. Bu nǝrsilǝrni ɵz oƣul-ⱪizliringlarƣa taⱪap kiydürisilǝr. Xu tǝriⱪidǝ Misirliⱪlardin olja alƣan bolisilǝr».