1 Musa jawab berip: «Ular manga ixǝnmǝy, sɵzümgǝ ⱪulaⱪ salmay, bǝlki: ‹Pǝrwǝrdigar sanga kɵrünmidi› deyixi mumkin» dedi. 2 Pǝrwǝrdigar uningdin: «Bu ⱪolungdiki nemǝ?» dǝp soridi. U: «Bir ⱨasa» dǝp jawab bǝrdi. 3 Pǝrwǝrdigar: «Uni yǝrgǝ taxliƣin» dedi. Musa uni yǝrgǝ taxlisa, u yilanƣa aylandi. Musa uningdin ⱪaqti. 4 Andin Pǝrwǝrdigar Musaƣa: «Ⱪolungni uzitip uning ⱪuyruⱪini tutⱪin» dedi. U ⱪolini uzitip uni tutti. U uning ⱪolida yǝnǝ ⱨasa bolup ⱪaldi. 5 Pǝrwǝrdigar uningƣa: «Buning bilǝn ular ɵz ata-bowilirining Hudasi, Ibraⱨimning Hudasi, Is’ⱨaⱪning Hudasi wǝ Yaⱪubning Hudasi bolƣan Pǝrwǝrdigarning sanga kɵrünginigǝ ixinidu» dedi.

6 Pǝrwǝrdigar uningƣa yǝnǝ: «Ⱪolungni ⱪoynungƣa salƣin» dedi. U ⱪolini ⱪoyniƣa selip qiⱪarsa, mana, ⱪoli mahaw kesiligǝ giriptar bolup, ⱪardǝk aⱪirip kǝtkǝnidi. ^◼   7 Andin Pǝrwǝrdigar uningƣa: «Ⱪolungni yǝnǝ ⱪoynungƣa salƣin» dedi. U ⱪolini yǝnǝ ⱪoyniƣa selip, andin yǝnǝ ⱪoynidin qiⱪarsa, mana, u ǝsligǝ kelip, bǝdinining baxⱪa yǝrlirigǝ ohxax boldi. 8 Pǝrwǝrdigar yǝnǝ: «Əgǝr ular sanga ixǝnmisǝ wǝ awwalⱪi mɵjizilik karamǝtkǝ etibar ⱪilmisa, ikkinqi mɵjizilik karamǝtkǝ ixǝnsun. 9 Lekin ular bu ikki mɵjizigimu ixǝnmisǝ wǝ sening sɵzüngni anglimisa, sǝn Nil dǝryasining süyidin bir’az elip, ⱪuruⱪ yǝrgǝ sǝpkin. Xundaⱪ ⱪilsang, sǝn Nil dǝryasidin alƣan su, ⱪuruⱪ yǝr üstidǝ ⱪanƣa aylinidu» dedi.

10 Lekin Musa Pǝrwǝrdigarƣa: «Əy Rǝbbim, mǝn gǝpkǝ usta ǝmǝsmǝn. Awwalmu xundaⱪ idi, Sǝn hizmǝtkaring bilǝn sɵzlǝxkǝndin keyinmu yǝnǝ xundaⱪ, qünki gepi kǝmtük, tili eƣir bir adǝmmǝn» dedi. 11 Pǝrwǝrdigar uningƣa: «Adǝmgǝ eƣiz bǝrgǝn kim? Adǝmni gaqa yaki gas, kɵrǝlǝydiƣan yaki kor ⱪilƣuqi kim? Mǝn Pǝrwǝrdigar ǝmǝsmu? 12 Əmdi sǝn barƣin. Mǝn Ɵzüm sening aƣzing bilǝn billǝ bolup, nemǝ sɵzlǝydiƣiningni sanga ɵgitimǝn» dedi. 13 Lekin u: «Əy Rǝbbim, Sǝndin ɵtünüp ⱪalay, Sǝn haliƣan baxⱪa kixini ǝwǝtip, uning ⱪoli bilǝn bu ixni ⱪilƣin» dedi. 14 Pǝrwǝrdigar Musaƣa ƣǝzǝplinip mundaⱪ dedi: «Lawiylardin bolƣan Ⱨarun akang ǝmǝsmu? Uning obdan gǝp ⱪilalaydiƣinini bilimǝn. Mana, u seni ⱪarxi elixⱪa qiⱪti. U seni kɵrgǝndǝ kɵngli hux bolidu. 15 Sǝn uning bilǝn sɵzlixip, eytidiƣan sɵzlǝrni aƣziƣa salisǝn. Mǝn Ɵzüm sening aƣzing wǝ uning aƣzi bilǝn billǝ bolimǝn. Nemǝ ⱪilixinglar kerǝklikini silǝrgǝ ɵgitip turimǝn. 16 Ⱨarun sening ornungda hǝlⱪⱪǝ sɵz ⱪilip, sening aƣzing bolidu. Sǝn bolsang uning üqün Huda kǝbi bolisǝn. 17 Bu ⱨasini ⱪolungda tutup, uning bilǝn mɵjizilik karamǝtlǝrni kɵrsitisǝn».

18 Xuning bilǝn Musa ɵz ⱪeynatisi Yetroning yeniƣa ⱪaytip kelip, uningƣa: «Manga ijazǝt bǝrgin. Misirdiki ɵz ⱪerindaxlirimning ⱪexiƣa berip, ular ⱨayatmu ǝmǝsmu, kɵrüp kelǝy» dedi. Yetro bolsa Musaƣa: «Tinq-aman berip kǝlgin» dedi. 19 Pǝrwǝrdigar Midiyanda Musaƣa: «Misirƣa ⱪaytip barƣin, qünki sening jeningni almaⱪqi bolƣan kixilǝr ɵlüp kǝtti» dedi.

20 Xuning bilǝn Musa ayali wǝ oƣullirini elip, ularni exǝkkǝ mindürüp, Misirƣa ⱪaytixⱪa yolƣa qiⱪti. Musa Hudaning ⱨasisini ⱪoliƣa elip mangdi. 21 Pǝrwǝrdigar Musaƣa mundaⱪ dedi: «Misirƣa ⱪaytip barƣiningda sǝn agaⱨ bolup, Mǝn sanga ⱪilixⱪa ⱪudrǝt bǝrgǝn mɵjizilǝrning ⱨǝmmisini Fir’ǝwnning aldida kɵrsǝtkin. Lekin Mǝn uning kɵnglini ⱪattiⱪ ⱪilip, hǝlⱪni ⱪoyup bǝrmǝydiƣan ⱪilimǝn. 22 U qaƣda sǝn Fir’ǝwngǝ: ‹Pǝrwǝrdigar mundaⱪ dǝydu: «Isra’il Mening tunji oƣlum bolidu. 23 Mǝn sanga: ‹Oƣlumni Manga ibadǝt ⱪilixi üqün ⱪoyup bǝrgin› degǝn bolsammu, sǝn uni ⱪoyup bǝrmiding. Bu sǝwǝbtin Mǝn ǝmdi sening tunji oƣlungni ɵltürimǝn»› degin».

24 Ular sǝpǝr ⱪilƣinida, Pǝrwǝrdigar bir ⱪonalƣuda uningƣa uqrap, uni ɵltürmǝkqi boldi. 25 Bu ǝsnada Zippora bir ittik qaⱪmaⱪ texini elip, ɵz oƣlining hǝtnǝ terisini kesip, uni uning putiƣa tǝgküzüp: «Sǝn mǝn üqün bir ⱪanliⱪ toy yigitisǝn» dedi. 26 Xuning bilǝn Pǝrwǝrdigar uni ⱪoyup bǝrdi. Bu qaƣda Zipporaⱨ hǝtnining sǝwǝbidin «Bir ⱪanliⱪ toy yigiti!» degǝnidi.

27 Pǝrwǝrdigar Ⱨarunƣa: «Musa bilǝn uqrixix üqün qɵl-bayawanƣa barƣin» degǝnidi. Xuning bilǝn u berip Hudaning teƣida Musa bilǝn uqrixip, uni sɵydi. 28 Musa ɵzini ǝwǝtkǝn Pǝrwǝrdigarning ⱨǝmmǝ sɵzlirini wǝ kɵrsitixkǝ buyruƣan mɵjizilik karamǝtlǝrning ⱨǝmmisini Ⱨarunƣa eytip bǝrdi.

29 Andin keyin Musa wǝ Ⱨarun berip, Bǝni Isra’ilning ⱨǝmmǝ aⱪsaⱪallirini yiƣdi. 30 Ⱨarun ularƣa Pǝrwǝrdigarning Musaƣa eytⱪan ⱨǝmmǝ sɵzlirini bayan ⱪilip berip, hǝlⱪning kɵz aldida mɵjizilik karamǝtlǝrni kɵrsǝtti. 31 Hǝlⱪ buni kɵrüp ixǝndi. Ular Pǝrwǝrdigarning Bǝni Isra’ilni yoⱪlap, ularning zulum astida ikǝnlikigǝ etibar bǝrginini angliƣinida, baxlirini egip sǝjdǝ ⱪilixti.