1 Andin keyin Musa wǝ Ⱨarun Fir’ǝwnning aldiƣa berip, uningƣa: «Isra’ilning Hudasi Pǝrwǝrdigar mundaⱪ dǝydu: ‹Hǝlⱪimni Mǝn üqün qɵldǝ ⱨeyt ɵtküzüx üqün ⱪoyup bǝrgin› » dedi. 2 Lekin Fir’ǝwn ularƣa: «Mǝn uning buyruⱪi bilǝn Isra’ilni ⱪoyup beridiƣan Pǝrwǝrdigar kim bolidu? Mǝn Pǝrwǝrdigarni tonumaymǝn, Isra’ilnimu ⱪoyup bǝrmǝymǝn» dedi. ^◼   3 Ular sɵz ⱪilip: «Ibraniylarning Hudasi bizgǝ kɵründi. Xunga ɵtünimizki, bizgǝ qɵl iqigǝ üq künlük yol yürüp, Pǝrwǝrdigar Hudayimizƣa ⱪurbanliⱪ ⱪiliximizƣa ijazǝt bǝrgǝysǝn, bolmisa U üstimizgǝ waba yaki ⱪiliq ǝwǝtixi mumkin» dedi. 4 Lekin Misirning padixaⱨi ularƣa: «Əy Musa wǝ Ⱨarun, nemixⱪa hǝlⱪni ixliridin tohtitisilǝr? Berip, ixinglarni ⱪilinglar» dedi. 5 Fir’ǝwn yǝnǝ: «Mana, hǝlⱪ zeminda ziyadǝ awup kǝtti. Silǝr bolsanglar ularni ⱨaxar mǝjburiyitidin azad ⱪilmaⱪqisilǝr» dedi.

6 Xu küni Fir’ǝwn hǝlⱪning ǝmgǝk nazarǝtqiliri wǝ ⱨǝydǝkqilirigǝ buyruⱪ berip mundaⱪ dedi: 7 «Hǝlⱪⱪǝ ilgirikidǝk hix ⱪuyuxⱪa saman bǝrmǝnglar, ular ɵzliri saman yiƣsun. 8 Lekin ular ilgiri ⱪanqilik hix ⱪuyup kǝlgǝn bolsa, ⱨelimu kǝm ⱪilmay, xunqilik hix ⱪuydurunglar. Qünki ular ⱨurun, xunga ular: ‹Hudayimizƣa ⱪurbanliⱪ ɵtküzgili beriximizƣa ijazǝt bǝrgin› dǝp warⱪirixip turidu. 9 Bu adǝmlǝr ix bilǝn mǝxƣul bolup, yalƣan gǝplǝrgǝ ⱪulaⱪ salmasliⱪi üqün, eƣir ǝmgǝkkǝ selinsun».

10 Xuning bilǝn, hǝlⱪning üstidǝ turƣan ǝmgǝk nazarǝtqiliri wǝ ⱨǝydǝkqilǝr berip, hǝlⱪⱪǝ: «Fir’ǝwn mundaⱪ dǝydu: ‹Mǝn silǝrgǝ saman bǝrmǝydiƣan boldum. 11 Ɵzünglar berip ⱪǝyǝrdin saman tapalisanglar, elip kelinglar, lekin ⱪilidiƣan ixliringlar ⱪildǝkmu kemǝytilmǝydu›» deyixti. 12 Buning bilǝn hǝlⱪ pütün Misirning zeminiƣa tarilip, saman orniƣa ⱪuruⱪ paⱨallarni yiƣixⱪa baxlidi. 13 Əmgǝk nazarǝtqiliri bolsa ularni aldiritip: «Silǝrgǝ saman berilgǝn qaƣdikidǝk ⱨǝr künlük ixni xu küni orunlanglar» dedi. 14 Fir’ǝwnning ǝmgǝk nazarǝtqiliri tǝripidin tǝyinlǝngǝn Bǝni Isra’ildin bolƣan ⱨǝydǝkqilǝr tayaⱪ yǝp: «Nemixⱪa tünügün wǝ bügün ilgirikidǝk silǝrgǝ tǝⱪsim ⱪilinƣan hix ⱪuydurux wǝzipisini orunlimidinglar?» dǝp soraⱪ ⱪilindi. 15 Xunga Bǝni Isra’ilning ⱨǝydǝkqiliri Fir’ǝwnning aldiƣa berip: «Nemixⱪa ɵz ⱪulliringƣa mundaⱪ ⱪilisǝn? 16 Ular ɵz ⱪulliringƣa saman bǝrmisimu: ‹Hix ⱪuydurunglar› dǝp bizgǝ buyrup turidu. Mana, ⱪulliring tayaⱪ yǝydu, ǝmma gunaⱨ ɵzüngning adǝmliridǝ» dǝp pǝryad ⱪilixti. 17 Lekin Fir’ǝw ularƣa: «Bǝrⱨǝⱪ, ⱨurun ikǝnsilǝr! Ⱨurun bolƣininglar üqün: ‹Biz berip, Pǝrwǝrdigarƣa ⱪurbanliⱪ ⱪilixⱪa bizgǝ ijazǝt bǝrgǝysǝn› dǝwatisilǝr. 18 Əmdi berip, ixinglarni ⱪilinglar. Silǝrgǝ saman berilmǝydu, lekin silǝr tapxuridiƣan hixning sani awwalⱪidǝk bolidu» dedi.

19 «Silǝr ⱨǝr küni ⱪuyidiƣan hixlarning sanini ⱨeq kemǝytmǝysilǝr» dǝp buyrulƣinida, Bǝni Isra’ilning ⱨǝydǝkqiliri bexiƣa bala-ⱪaza kǝlginini bilixti.

20 Ular Fir’ǝwnning aldidin qiⱪip keliwatⱪinida, u yǝrdǝ ularni kütüp turƣan Musa wǝ Ⱨarun bilǝn uqrixip, 21 ularƣa: «Silǝr Fir’ǝwn wǝ uning hizmǝtkarlirining bizdin sǝskinip ketixigǝ sǝwǝb bolup, ularning ⱪoliƣa bizni ɵltürüxkǝ ⱪiliq tutⱪuzƣininglar üqün, Pǝrwǝrdigar silǝrning üstünglardin ⱨɵküm ⱪilsun» deyixti.

22 Musa Pǝrwǝrdigarning aldiƣa ⱪaytip berip: «Əy Rǝbbim, nemixⱪa bu hǝlⱪni balaƣa tiⱪting? Nemixⱪa meni ǝwǝtting? 23 Mǝn Fir’ǝwnning aldiƣa kelip, Sening naming bilǝn sɵz ⱪilƣinimdin tartip, u bu hǝlⱪⱪǝ yamanliⱪ ⱪilip kǝldi. Əmma Sǝn Ɵz hǝlⱪingni ⱨeq ⱪutⱪuzmiding» dedi.