6
1 Lekin Pǝrwǝrdigar Musaƣa: «Əmdi sǝn Fir’ǝwngǝ ⱪilidiƣinimni kɵrisǝn. Qünki u bir küqlük ⱪol tǝripidin zorlinip, ularni ⱪoyup beridu, bir ⱪudrǝtlik ⱪolning sǝwǝbidin ularni ɵz zeminidin ⱨǝydǝp qiⱪiriwetidu» dedi. 2 Andin keyin Huda Musaƣa mundaⱪ dedi: «Mǝn Pǝrwǝrdigardurmǝn. 3 Ibraⱨim, Is’ⱨaⱪ wǝ Yaⱪubⱪa ⱨǝmmigǝ ⱪadir Huda bolup kɵründüm, lekin ularƣa ‹Yaⱨwǝⱨ› degǝn namim bilǝn axkara bolmidim. ◼ 4 Mǝn ular bilǝn ǝⱨdǝ tüzüp, ular musapir bolup turƣan zeminni, yǝni Kǝn’an zeminini ɵzlirigǝ berixkǝ wǝdǝ ⱪildim. 5 Əmdi Misirliⱪlar tǝripidin ⱪulluⱪta tutulƣan Bǝni Isra’ilning nalǝ-pǝryadini anglap, tüzgǝn ǝⱨdǝmni esimgǝ aldim. 6 Xuning üqün Bǝni Isra’ilƣa mundaⱪ degin: ‹Mǝn, Pǝrwǝrdigar, silǝrni Misirliⱪlarning yükliri astidin qiⱪirip, ularning ⱪulluⱪidin azad ⱪilimǝn. Mǝn bilikimni uzitip ularƣa eƣir jazalarni berip, silǝrni ⱪutuldurimǝn. 7 Mǝn silǝrni Ɵz hǝlⱪim ⱪilimǝn wǝ Ɵzüm silǝrning Hudayinglar bolimǝn. Xu qaƣda Mening silǝrni Misirliⱪlarning yüklirining astidin ⱪutⱪuzup qiⱪarƣuqi Hudayinglar Pǝrwǝrdigar ikǝnlikimni bilisilǝr. 8 Mǝn silǝrni Ibraⱨim, Is’ⱨaⱪ wǝ Yaⱪubⱪa ⱪǝsǝm bilǝn wǝdǝ ⱪilƣan zeminƣa elip berip, uni silǝrgǝ igidarqiliⱪ ⱪilixⱪa berimǝn. Mǝn Pǝrwǝrdigardurmǝn›». 9 Bu sɵzlǝrni Musa Bǝni Isra’ilƣa eytip bǝrdi, lekin ular ⱪulluⱪ azabidin bax kɵtürǝlmigǝqkǝ, uningƣa ⱪulaⱪ salmidi. 10 Andin keyin Pǝrwǝrdigar Musaƣa yǝnǝ: 11 «Berip, Misirning padixaⱨi Fir’ǝwngǝ: ‹Bǝni Isra’ilning ɵz zeminingdin qiⱪip ketixigǝ yol ⱪoyƣin› dǝp eytⱪin» dedi. 12 Lekin Musa Pǝrwǝrdigarning aldida: «Mana, Bǝni Isra’il manga ⱪulaⱪ salmiƣan yǝrdǝ, Fir’ǝwn mǝndǝk hǝtnisiz lǝwliri bar bir adǝmgǝ ⱪandaⱪ ⱪulaⱪ salsun?» dedi. ◼
13 Əmma Pǝrwǝrdigar Musa wǝ Ⱨarunƣa sɵzlǝp ǝmr ⱪilip, Bǝni Isra’ilni Misirdin elip qiⱪix üqün ularni Bǝni Isra’il wǝ Misirning padixaⱨi Fir’ǝwngǝ ǝwǝtti.
Rubǝn, Ximon wǝ Lawiyning ǝwladliri
14 Tɵwǝndikilǝr ularning jǝmǝtlirining baxliⱪliri. Isra’ilning tunji oƣli Rubǝnning oƣulliri: Hanok, Pallu, Hǝzron wǝ Karmi idi. Bular Rubǝnning nǝsilliri idi.
15 Ximonning oƣulliri: Yemu’ǝl, Yamin, Oⱨad, Yakin, Zohar wǝ Kǝn’anliⱪ ayalidin bolƣan oƣli Xa’ul idi. Bular Ximonning nǝsilliri idi.
16 Lawiyning oƣulliri ularning isimliri nǝsǝbnamiliri boyiqǝ: Gǝrxon, Ⱪoⱨat wǝ Mǝrari idi. Lawiy bir yüz ottuz yǝttǝ yil ɵmür kɵrdi.
17 Gǝrxonning oƣulliri ɵz nǝsilliri boyiqǝ: Libni wǝ Ximǝy idi.
18 Ⱪoⱨatning oƣulliri Amram, Yizⱨar, Hebron wǝ Uzzi’ǝl idi. Ⱪoⱨat bir yüz ottuz üq yil ɵmür kɵrdi.
19 Mǝrarining oƣulliri Mahli wǝ Muxi idi. Bular nǝsǝbnamiliri boyiqǝ Lawiyning nǝsilliri idi.
20 Amram bolsa ɵz ⱨammisi Yokǝbǝdni hotunluⱪⱪa aldi. U uningƣa Ⱨarun wǝ Musani tuƣup bǝrdi. Amram bir yüz ottuz yǝttǝ yil ɵmür kɵrdi.
21 Yizⱨarning oƣulliri Ⱪoraⱨ, Nefǝg wǝ Zikri idi.
22 Uzzi’ǝlning oƣulliri Mixa’ǝl, Elizafan wǝ Sitri idi.
23 Ⱨarun bolsa Naⱨxonning singlisini, yǝni Aminadabning ⱪizi Elixebani hotunluⱪⱪa aldi. U uningƣa Nadab, Abiⱨu, Eli’azar wǝ Itamarni tuƣup bǝrdi.
24 Ⱪoraⱨning oƣulliri Assir, Əlⱪana wǝ Abiyasaf idi. Bular Ⱪoraⱨiylarning nǝsilliri idi.
25 Ⱨarunning oƣli Eli’azar, Puti’ǝlning ⱪizliridin birini hotunluⱪⱪa aldi. U uningƣa Pinihasni tuƣup bǝrdi. Bular ɵz nǝsilliri boyiqǝ Lawiylarning jǝmǝtlirining baxliⱪliri idi.
26 «Bǝni Isra’ilni ularning ⱪoxunliri boyiqǝ Misirdin elip qiⱪinglar» dǝp Pǝrwǝrdigardin ǝmr alƣanlar muxu Ⱨarun wǝ Musa idi. 27 Bǝni Isra’ilni Misirdin elip qiⱪix üqün Misirning padixaⱨi Fir’ǝwngǝ sɵz ⱪilƣan kixilǝrmu muxu Ⱨarun wǝ Musa idi.
Musa bilǝn Ⱨarunning yǝnǝ Firǝwnning aldiƣa berixi
28 Pǝrwǝrdigar Misirning zeminida Musaƣa sɵz ⱪilƣinida, 29 Musaƣa: «Mǝn Pǝrwǝrdigardurmǝn. Sanga ⱪilƣan sɵzlirimning ⱨǝmmisini Misirning padixaⱨi Fir’ǝwngǝ yǝtküzgin» dedi. 30 Lekin Musa Pǝrwǝrdigarning aldida: «Mǝndǝk hǝtnisiz lǝwliri bar bir kixigǝ Fir’ǝwn ⱪandaⱪmu ⱪulaⱪ salsun?» dedi.