1 Pǝrwǝrdigar Musaƣa sɵz ⱪilip mundaⱪ dedi: 2 «Birinqi ayning birinqi küni sǝn ibadǝt qediri bolƣan uqrixix qedirini tikligin. 3 Uning iqigǝ xaⱨadǝt sanduⱪini ⱪoyup, sanduⱪning aldiƣa kirixni tosup turidiƣan ayrima pǝrdini asⱪin. 4 Xirǝni iqigǝ elip kirip, üstigǝ ⱪoyulidiƣan nǝrsilǝrni tizip ⱪoyƣin. Andin qiraƣdannimu elip kirip, üstigǝ qiraƣlarni orunlaxturƣin. 5 Altun huxbuygaⱨni xaⱨadǝt sanduⱪining aldiƣa ⱪoyƣin. Ibadǝt qedirining kirix eƣizining pǝrdisini tartip ⱪoyƣin. 6 Kɵydürmǝ ⱪurbanliⱪ ⱪurbangaⱨini ibadǝt qediri bolƣan uqrixix qedirining kirix eƣizining aldiƣa ⱪoyƣin. 7 Dasni uqrixix qediri bilǝn ⱪurbangaⱨning otturisiƣa orunlaxturup, uningƣa su toldurup ⱪoyƣin. 8 Ⱨoylining qɵrisigǝ pǝrdǝ tartip, ⱨoylining dǝrwazisining pǝrdisini esip ⱪoyƣin. 9 Mǝsiⱨlǝx yeƣini elip, ibadǝt qediri wǝ uning iqidiki ⱨǝmmǝ nǝrsilǝrni mǝsiⱨligin. Bu tǝriⱪidǝ uni wǝ ⱨǝmmǝ ǝxyalirini Hudaƣa atap muⱪǝddǝs ⱪilƣin. Xuning bilǝn u muⱪǝddǝs bolidu. 10 Kɵydürmǝ ⱪurbanliⱪ ⱪurbangaⱨi wǝ uning ⱨǝmmǝ ǝswab-jabduⱪlirini mǝsiⱨlǝp, uni Hudaƣa atap muⱪǝddǝs ⱪilƣin. Buning bilǝn ⱪurbangaⱨ ǝng muⱪǝddǝs bolidu. 11 Sǝn das wǝ uning tǝglikinimu mǝsiⱨlǝp muⱪǝddǝs ⱪilƣin. 12 Ⱨarun wǝ uning oƣullirini uqrixix qedirining kirix eƣiziƣa kǝltürüp, ularni su bilǝn yuƣin. 13 Ⱨarunƣa muⱪǝddǝs kiyimlǝrni kiydürüp, uni mǝsiⱨlǝp, muⱪǝddǝs ⱪilip Manga ayriƣin. Xundila u Manga kaⱨin bolup hizmǝt ⱪilalaydu. 14 Andin uning oƣullirini elip kelip, ularƣa iq kɵynǝklirini kiydürüp, 15 ularning atisini mǝsiⱨligǝndǝk Manga kaⱨin bolup hizmǝt ⱪilixi üqün ularnimu mǝsiⱨligin. Bu mǝsiⱨlinixi ular üqün nǝsildin nǝsilgǝ ⱨǝmixǝ kaⱨinliⱪning bǝlgisi bolidu».

16 Musa xundaⱪ ⱪildi. U ⱨǝmmisini Pǝrwǝrdigarning uningƣa buyruƣini boyiqǝ ⱪildi.

17 Xuning bilǝn, ikkinqi yilning birinqi ayning birinqi küni ibadǝt qediri tiklǝndi. 18 Musa ibadǝt qedirini tikip, putlirini orunlaxturup, tahtaylirini tizip, ottura baldaⱪlirini bekitip, tüwrüklirini tiklǝp, 19 ibadǝt qedirining üstigǝ yopuⱪni yepip, yopuⱪning üstigǝ ikkinqi yopuⱪini yepip ⱪoydi. U bularning ⱨǝmmisini Pǝrwǝrdigarning Musaƣa buyruƣini boyiqǝ ⱪildi. 20 Andin keyin u xaⱨadǝtnamini elip, sanduⱪⱪa selip, kɵtürüx hadilirini sanduⱪning ⱨalⱪiliriƣa ɵtküzüp ⱪoyup, mǝrⱨǝmǝt tǝhtini sanduⱪning üstigǝ orunlaxturdi. 21 U sanduⱪni ibadǝt qedirining iqigǝ elip kirip, xaⱨadǝt sanduⱪining aldiƣa kirixni tosup turidiƣan ayrima pǝrdini tartti. U bularning ⱨǝmmisini Pǝrwǝrdigarning Musaƣa buyruƣini boyiqǝ ⱪildi. 22 U xirǝni uqrixix qediriƣa elip kirip, ibadǝt qedirining ximal tǝripidǝ ayrima pǝrdining sirtiƣa orunlaxturup, 23 uning üstigǝ Pǝrwǝrdigarƣa atalƣan nanlarni tizip ⱪoydi. U bularning ⱨǝmmisini Pǝrwǝrdigarning Musaƣa buyruƣini boyiqǝ ⱪildi. 24 U qiraƣdanni uqrixix qedirining iqidiki xirǝning udulida ibadǝt qedirining jǝnub tǝripigǝ ⱪoyup, 25 qiraƣlarni Pǝrwǝrdigarning aldiƣa orunlaxturup ⱪoydi. U bularning ⱨǝmmisini Pǝrwǝrdigarning Musaƣa buyruƣini boyiqǝ ⱪildi. 26 Andin keyin u altun huxbuygaⱨni uqrixix qediriƣa elip kirip, ayrima pǝrdining aldiƣa orunlaxturup, 27 uning üstidǝ huxbuy isriⱪni kɵydürdi. U bularning ⱨǝmmisini Pǝrwǝrdigarning Musaƣa buyruƣini boyiqǝ ⱪildi. 28 U ibadǝt qedirining kirix eƣiziƣa pǝrdini tartti. 29 U kɵydürmǝ ⱪurbanliⱪ ⱪurbangaⱨini ibadǝt qediri bolƣan uqrixix qedirining kirix eƣiziƣa yeⱪin ⱪoyup, uning üstidǝ kɵydürmǝ ⱪurbanliⱪ bilǝn axliⱪ ⱨǝdiyǝsini sundi. U bularning ⱨǝmmisini Pǝrwǝrdigarning Musaƣa buyruƣini boyiqǝ ⱪildi. 30 U dasni uqrixix qediri bilǝn ⱪurbangaⱨning otturisiƣa ⱪoyup, yuyuxⱪa ixlitix üqün uningƣa su toldurup ⱪoydi. 31 Uning süyidǝ Musa, Ⱨarun wǝ uning oƣulliri put-ⱪollirini yuyatti. 32 Ular ⱨǝr ⱪetim uqrixix qediriƣa kirgǝndǝ yaki ⱪurbangaⱨⱪa yeⱪinlaxⱪanda, Pǝrwǝrdigarning Musaƣa buyruƣini boyiqǝ ɵzini yuyatti. 33 Buningdin baxⱪa, u ibadǝt qediri wǝ ⱪurbangaⱨ ⱨoylisining qɵrisigǝ pǝrdǝ tartti wǝ ⱨoylining dǝrwazisining pǝrdisini esip ⱪoydi. Bu tǝriⱪidǝ Musa pütün ixni pütküzdi.

34 U qaƣda bulut uqrixix qedirini ⱪaplidi wǝ Pǝrwǝrdigarning xan-xǝripi ibadǝt qedirini toldurdi. 35 Bulut ibadǝt qedirining üstigǝ ⱪonup, Pǝrwǝrdigarning xan-xǝripi qedirni toldurƣini üqün Musa uqrixix qediriƣa kirǝlmidi. 36 Bulut ⱨǝr ⱪetim uqrixix qedirining üstidin kɵtürülgǝndǝ, Bǝni Isra’il ⱪozƣilip mangatti. Ular ⱨǝmmǝ sǝpǝrliridǝ xundaⱪ ⱪilatti. 37 Əmma bulut kɵtürülmisǝ, ular bulut kɵtürülidiƣan künigiqǝ ⱪozƣilip mangmaytti. 38 Kündüzi Pǝrwǝrdigarning buluti ibadǝt qedirining üstidǝ turatti, keqisi bulut iqidǝ ot kɵrünǝtti. Ⱨǝmmǝ Bǝni Isra’ilning kɵz aldida ularning pütün sǝpǝr jǝryanida xundaⱪ kɵründi.