1 Pǝrwǝrdigarning Musaƣa buyruƣini boyiqǝ ular kɵk, sɵsün wǝ toⱪ ⱪizil rǝnglik yiptin muⱪǝddǝs jayning hizmitidǝ kiyilidiƣan kiyimlǝrni, wǝ Ⱨarunning muⱪǝddǝs kiyimlirini tikip tǝyyar ⱪildi.

2 U Efodni zǝr yip, kɵk, sɵsün, toⱪ ⱪizil rǝnglik yip wǝ aⱪ kǝndir yiptin nǝpis toⱪup tǝyyarlidi. 3 Ular altunni soⱪup nepizlitip, uni kesip yip ⱪilip, kɵk, sɵsün, toⱪ ⱪizil rǝnglik yip wǝ aⱪ kǝndir yipning arisiƣa elip, usta ⱨünǝrwǝnning ⱪoli bilǝn rǝngmu-rǝng rǝht toⱪudi. 4 Ular efodning ikki ⱪismini bir-birigǝ baƣlax üqün ikki mürǝ tasmisini yasap, ular arⱪiliⱪ ikki bexini bir-birigǝ baƣlap ⱪoydi. 5 Uning üstigǝ baƣlaydiƣan bǝlwaƣ efod bilǝn bir pütün ⱪilinip, uningƣa ohxax ixlinip, zǝr yip, kɵk, sɵsün, toⱪ ⱪizil rǝnglik yip wǝ aⱪ kǝndir yiptin nǝpis toⱪuldi. Bularning ⱨǝmmisi Pǝrwǝrdigar Musaƣa buyruƣini boyiqǝ ⱪilindi. 6 Ular ⱨeⱪiⱪ taxlirini tǝyyar ⱪilip, altun kɵzlüklǝrgǝ ornatti. Ularning üstigǝ mɵⱨür oyulƣandǝk Isra’ilning oƣullirining isimliri oyuldi. 7 Isra’ilning oƣullirining hatirǝ texi bolsun dǝp, Pǝrwǝrdigarning Musaƣa buyruƣini boyiqǝ u bularni efodning ikki mürǝ tasmisiƣa ⱪadap ⱪoydi.

8 U kɵkrǝklikni usta ⱨünǝrwǝnning ⱪoli bilǝn toⱪutup, bunimu efodⱪa ohxax zǝr yip, kɵk, sɵsün, toⱪ ⱪizil rǝnglik yip wǝ aⱪ kǝndir yiptin nǝpis toⱪup tǝyyar ⱪildi. 9 Kɵkrǝklik ikki ⱪatliⱪ tɵt qasa ⱪilindi. Uning uzunluⱪi bir ƣeriq, kǝnglikimu bir ƣeriq idi. 10 Ular uning üstigǝ tɵt ⱪatar ⱪilip ⱪimmǝtlik taxlarni ornatti. Birinqi ⱪatarda bir ⱪizil yaⱪut, bir topaz wǝ bir zumrǝt ornitildi. 11 Ikkinqi ⱪatarda bir kɵk ⱪaxtax, bir kɵk yaⱪut wǝ bir almas, 12 üqinqi ⱪatarda bir sɵsün yaⱪut, bir ⱨeⱪiⱪ wǝ bir sɵsün kwarts, 13 tɵtinqi ⱪatarda bir seriⱪ yaⱪut, bir aⱪ ⱨeⱪiⱪ wǝ bir yexil ⱪaxtax ornitildi. Bularning ⱨǝmmisi altun kɵzlüklǝrning iqigǝ ornitildi. 14 Bu ⱪimmǝtlik taxlar Isra’ilning oƣullirining isimliri boyiqǝ on ikki danǝ idi. Mɵⱨür oyƣandǝk ⱨǝrbir taxⱪa on ikki ⱪǝbilining nami birdin-birdin oyulƣanidi. 15 Ular kɵkrǝklikkǝ xoynidǝk exilgǝn sap altundin zǝnjirlǝrni yasidi. 16 Ular kɵkrǝklik üqün altundin ikki kɵzlük wǝ ikki ⱨalⱪini yasap, ikki ⱨalⱪini kɵkrǝklikning ikki bexiƣa bekitti. 17 Ular altundin exilip yasalƣan ikki zǝnjirni kɵkrǝklikning ikki bexiƣa bekitilgǝn ikki ⱨalⱪiƣa ɵtküzüp, 18 bu exilgǝn zǝnjirlǝrning ⱪalƣan ikki uqini ikki kɵzlükkǝ ⱪadap, bularni efodning ikki mürǝ tasmisining aldi ⱪismiƣa ornatti. 19 Buningdin baxⱪa ular altundin ikki ⱨalⱪa yasap, efodⱪa tegip turidiƣan kɵkrǝklikning iq tǝripidiki ikki burjikigǝ bekitip ⱪoydi. 20 Xundaⱪla, ular altundin yǝnǝ ikki ⱨalⱪa yasap, bularni efodning ikki mürǝ tasmisining aldi tǝrǝptiki tɵwǝn ⱪismiƣa, ulinidiƣan jayƣa yeⱪin, bǝlwaƣdin yuⱪiri bekitti. 21 Kɵkrǝklik efodning bǝlweƣidin yuⱪiri turuxi wǝ efodtin ajrap kǝtmisliki üqün, ular kɵkrǝklikning ⱨalⱪiliriƣa ɵtküzülgǝn kɵk rǝnglik yip efodning ⱨalⱪiliriƣa baƣlap ⱪoydi. Bularning ⱨǝmmisi Pǝrwǝrdigar Musaƣa buyruƣini boyiqǝ ⱪilindi.

22 U efod pǝxtamasining iqigǝ kiyilidiƣan tonni toⱪup, pütünlǝy kɵp-kɵk ⱪildi. 23 Tonning otturisidiki bax tɵxüki sawutning yaⱪisidǝk ⱪilindi. Yirtilip kǝtmǝsliki üqün uning qɵrisigǝ pǝwǝz tutuldi. 24 Ular tonning etikining qɵrisigǝ kɵk, sɵsün wǝ toⱪ ⱪizil rǝnglik yiptin yasalƣan anarlarni ornatti. 25 Ular altun ⱪongƣuraⱪlarni yasap, bularni tonning etikining qɵrisidiki anarlarning arisiƣa esip ⱪoydi. 26 Hizmǝttǝ kiyilidiƣan tonning etikining pütün qɵrisigǝ bir altun ⱪongƣuraⱪ, andin keyin bir anar, andin yǝnǝ bir altun ⱪongƣuraⱪ, andin yǝnǝ bir anar ornitildi. Bularning ⱨǝmmisi Pǝrwǝrdigarning Musaƣa buyruƣini boyiqǝ ⱪilindi.

27 Ular Ⱨarun wǝ uning oƣulliri üqün aⱪ kǝndirdin toⱪulƣan iq kɵynǝklǝrni tǝyyar ⱪildi. 28 Ular sǝllǝ, zinnǝtlik egiz bɵklǝr wǝ tamballarnimu aⱪ kǝndir yiptin nǝpis toⱪup tǝyyar ⱪildi. 29 Buningdin baxⱪa, ular aⱪ kǝndir yiptin wǝ kɵk, sɵsün wǝ toⱪ ⱪizil rǝnglik yiptin nǝpis toⱪulup kǝxtilǝngǝn rǝhttin bǝlwaƣni tǝyyarlidi. Ular bularning ⱨǝmmisini Pǝrwǝrdigarning Musaƣa buyruƣini boyiqǝ ⱪildi.

30 Ular muⱪǝddǝs bǝlgǝ bolƣan lǝwⱨǝni sap altundin yasap, uning üstigǝ mɵⱨür oyƣandǝk: «Pǝrwǝrdigarƣa atalƣan» dǝp oyup, 31 uni kɵk rǝnglik yip bilǝn sǝlligǝ qigdi. Ular bularning ⱨǝmmisini Pǝrwǝrdigarning Musaƣa buyruƣini boyiqǝ ⱪildi.

32 Bu tǝriⱪidǝ ibadǝt qediri bolƣan uqrixix qedirining ⱨǝmmǝ ixi tǝyyar boldi. Bǝni Isra’il bularning ⱨǝmmisini Pǝrwǝrdigarning Musaƣa buyruƣini boyiqǝ ⱪildi.

33 Ular ibadǝt qedirini Musaning aldiƣa kǝltürdi, yǝni qedir wǝ uning ⱨǝmmǝ ǝswab-jabduⱪliri, izmiliri, tahtayliri, yaƣaq baldaⱪliri, tüwrükliri wǝ putliri, 34 xuningdǝk ⱪizil boyalƣan ⱪoqⱪar terisidin yasalƣan yopuⱪ, delfin terisidin yasalƣan yopuⱪ wǝ yapidiƣan ayrima pǝrdǝ, ^◼   35 xaⱨadǝt sanduⱪi bilǝn uning kɵtürüx hadiliri wǝ mǝrⱨǝmǝt tǝhti, 36 xirǝ wǝ uning ⱨǝmmǝ ǝswabliri wǝ xundaⱪla Hudaƣa atalƣan nanlar, 37 altun qiraƣdan bilǝn uning üstigǝ ⱪoyulidiƣan qiraƣlar, ⱨǝm uning ⱨǝmmǝ ǝswabliri wǝ qiraƣ yeƣi, 38 altun huxbuygaⱨ bilǝn mǝsiⱨlǝx yeƣi wǝ huxbuy isriⱪ, qedirning kirix eƣizining pǝrdisi, 39 mis ⱪurbangaⱨ bilǝn uning mis xalasi, kɵtürüx hadiliri wǝ ⱨǝmmǝ ǝswab-jabduⱪliri, xundaⱪla das bilǝn uning tǝgliki, 40 ⱨoylining pǝrdiliri bilǝn uning tüwrükliri wǝ putliri, ⱨoylining dǝrwazisining pǝrdisi bilǝn uning taniliri wǝ ⱪozuⱪliri, ibadǝt qediri bolƣan uqrixix qedirining ixliriƣa ixlitilidiƣan ⱨǝmmǝ ǝswab-jabduⱪlar, 41 muⱪǝddǝs jayning hizmiti üqün tikilgǝn kiyimlǝr, kaⱨin Ⱨarunning muⱪǝddǝs kiyimliri wǝ uning oƣullirining kaⱨinliⱪ kiyimliri ⱪatarliⱪlarning ⱨǝmmisini elip kǝldi. 42 Bǝni Isra’il Pǝrwǝrdigarning Musaƣa buyruƣanlirining ⱨǝmmisini orunliƣanidi. 43 Musa ixning ⱨǝmmisigǝ sǝpselip ⱪarap, ularning ⱨǝmmisini dǝl Pǝrwǝrdigarning buyruⱪi boyiqǝ ⱪilƣanliⱪini kɵrüp, ularƣa bǝrikǝt tilǝp hǝyrlik du’a ⱪildi.