1 Buningdin baxⱪa yǝnǝ, u akatsiyǝ yaƣiqidin ⱪurbangaⱨni yasidi. U tɵt qasa idi. Uning uzunluⱪi bǝx gǝz, kǝngliki bǝx gǝz, egizliki üq gǝz ⱪilindi. 2 U uning tɵt burjikigǝ münggüzlǝr yasidi. Münggüzlǝr ⱪurbangaⱨ bilǝn bir pütün ⱪilinip yasaldi. U ⱪurbangaⱨni mis bilǝn ⱪaplidi. 3 U ⱪurbangaⱨning ǝswab-jabduⱪliri, yǝni daslar, gürjǝklǝr, jawurlar, lahxigirlar wǝ otdanlarni yasidi. U barliⱪ ǝswab-jabduⱪlarni mistin yasidi. 4 U ⱪurbangaⱨ üqün mistin bir xala yasap, uni ⱪurbangaⱨning otturisiƣiqǝ yetip turidiƣan ⱪilip, girwikining astiƣa ⱪoydi. 5 U kɵtürüx hadilirini ɵtküzüx üqün mis xalaning tɵt burjikigǝ tɵt danǝ ⱨalⱪa ⱪuyup yasidi. 6 U kɵtürüx hadilirini akatsiyǝ yaƣiqidin yasap, mis bilǝn ⱪaplidi. 7 U ⱪurbangaⱨni kɵtürüx üqün hadilarni ⱪurbangaⱨning ikki yenidiki ⱨalⱪilarƣa ɵtküzüp ⱪoydi. Ⱪurbangaⱨning iqini kawak ⱪilip tahtaylardin yasidi.

8 Buningdin baxⱪa, u uqrixix qedirining kirix eƣizi aldida hizmǝt ⱪilidiƣan ayallarning mis ǝynǝkliridin bir mis das wǝ uning mis tǝglikini yasidi.

9 Andin keyin u ibadǝt qedirining ⱨoylisini ⱨazirlidi: Jǝnubⱪa ⱪaraydiƣan ⱨoylining jǝnub tǝripigǝ aⱪ kǝndir yiptin nǝpis toⱪulƣan yüz gǝz kelidiƣan pǝrdilǝrni yasidi. 10 Pǝrdilǝrning yigirmǝ tüwrüki wǝ ularning yigirmǝ puti mistin yasaldi. Tüwrüklǝrning ilmǝkliri wǝ ulax tayaⱪliri bolsa kümüxtin idi. 11 Ximal tǝrǝptiki pǝrdilǝrning uzunluⱪimu yüz gǝz idi. Pǝrdilǝrning yigirmǝ tüwrüki wǝ ularning yigirmǝ puti mistin yasaldi. Tüwrüklǝrning ilmǝkliri wǝ ulax tayaⱪliri bolsa kümüxtin idi. 12 Ƣǝrb tǝrǝptiki pǝrdilǝrning uzunluⱪi ǝllik gǝz idi. Pǝrdilǝr üqün on tüwrük wǝ on put yasaldi. Tüwrüklǝrning ilmǝkliri wǝ ulax tayaⱪliri kümüxtin idi. 13 Xǝrⱪⱪǝ ⱪaraydiƣan aldi tǝripidiki pǝrdilǝrning uzunluⱪi ǝllik gǝz idi. 14 Dǝrwazining bir tǝripidiki pǝrdilǝrning kǝngliki on bǝx gǝz idi. Ular üqün üq tüwrük wǝ üq put yasaldi. 15 Ⱨoylining dǝrwazisining yǝnǝ bir tǝripidiki pǝrdilǝrning kǝnglikimu on bǝx gǝz idi. Ikkila tǝripidiki pǝrdilǝr ohxax idi. Ular üqünmu üq tüwrük wǝ üq put yasaldi. 16 Ⱨoylining qɵrisidiki pǝrdilǝrning ⱨǝmmisi aⱪ kǝndir yiptin nǝpis toⱪuldi. 17 Tüwrüklǝrning putliri mistin yasaldi, ularning ilmǝkliri wǝ ulax tayaⱪliri bolsa kümüxtin yasaldi wǝ tüwrüklǝrning baxlirimu kümüx bilǝn ⱪaplandi. Ⱨoylining ⱨǝmmǝ tüwrükliri kümüxtin yasalƣan ulax tayaⱪlar bilǝn bir-birigǝ ulaxturuldi. 18 Ⱨoylining dǝrwazisidiki pǝrdǝ kɵk, sɵsün, toⱪ ⱪizil rǝnglik yip wǝ aⱪ kǝndir yiptin nǝpis toⱪulup kǝxtilǝndi. Uning uzunluⱪi yigirmǝ gǝz, egizliki ⱨoylining pǝrdiliridǝk bǝx gǝz idi. 19 Uning üqün mistin tɵt tüwrük wǝ tɵt put yasaldi. Tɵwrüklǝrning ilmǝkliri kümüxtin yasaldi, baxliri kümüx bilǝn ⱪaplandi wǝ ulax tayaⱪlirimu kümüxtin yasaldi. 20 Ibadǝt qedirining wǝ qɵrisidiki ⱨoylining ⱪozuⱪlirining ⱨǝmmisi mistin yasaldi.

21 Xaⱨadǝt qediri, yǝni ibadǝt qedirini yasax üqün ixlitilgǝn ǝxyalar, Musaning buyruⱪi bilǝn kaⱨin Ⱨarunning oƣli Itamarning ⱪol astidiki Lawiylar tǝripidin sanaⱪtin ɵtküzülüp tizimlanƣanidi. 22 Yǝⱨuda ⱪǝbilisidin Hurning nǝwrisi, Urining oƣli Bezalǝl, Pǝrwǝrdigar Musaƣa buyruƣanning ⱨǝmmisini orunlidi. 23 Dan ⱪǝbilisidin bolƣan Aⱨisamaⱪning oƣli Oⱨoliyab uning yardǝmqisi idi. U nǝⱪⱪax-oymiqiliⱪⱪa usta bolupla ⱪalmay, layiⱨilǝx wǝ kɵk, sɵsün, toⱪ ⱪizil rǝnglik yip wǝ aⱪ kǝndir yiptin kǝxtǝ tikixnimu bilǝtti. 24 Muⱪǝddǝs jayning yasilixiƣa ixlitilgǝn altun, yǝni ⱨǝdiyǝgǝ kǝltürülgǝn altunning ⱨǝmmisi, muⱪǝddǝs jayning xekǝlining ɵlqimi boyiqǝ yigirmǝ toⱪⱪuz talant yǝttǝ yüz ottuz xekǝl idi. 25 Jama’ǝt iqidin sanaⱪtin ɵtküzülgǝn kixilǝrning kǝltürgǝn kümüxi, muⱪǝddǝs jayning xekǝlining ɵlqimi boyiqǝ yüz talant bir ming yǝttǝ yüz yǝtmix bǝx xekǝl idi. 26 Yigirmǝ yaxtin exip sanaⱪtin ɵtüp sanalƣanlarƣa ⱪoxulƣan ⱨǝrbir kixidin bir beka, yǝni muⱪǝddǝs jayning xekǝlining ɵlqimi boyiqǝ yerim xekǝl elinƣanidi. Sanaⱪtin ɵtkǝnlǝr altǝ yüz üq ming bǝx yüz ǝllik kixi idi. 27 Yüz talant kümüxtin muⱪǝddǝs jayning putliri wǝ ayrima pǝrdining putliri ⱪuyuldi. Yüz talanttin yüz put yasaldi. Ⱨǝrbir put üqün bir talant ixlitildi. ^◼   28 Ⱪalƣan bir ming yǝttǝ yüz yǝtmix bǝx xekǝl kümüx tüwrüklǝrning ilmǝklirini yasaxⱪa, ularning baxlirini ⱪaplaxⱪa wǝ ulax tayaⱪlirini yasaxⱪa ixlitildi. 29 Ⱨǝdiyǝ üqün kǝltürülgǝn mis yǝtmix talant ikki ming tɵt yüz xekǝl qiⱪti. 30 Buningdin u uqrixix qedirining kirix eƣizidiki tüwrük putliri, mis ⱪurbangaⱨ, uning mis xalasi wǝ ⱪurbangaⱨning ⱨǝmmǝ ǝswab-jabduⱪlirini, 31 ⱨoylining qɵrisidiki tüwrük putliri, ⱨoylining dǝrwazisidiki tüwrük putliri, xundaⱪla ibadǝt qedirining ⱪozuⱪliri wǝ qɵrisidiki ⱨoylining ⱪozuⱪlirining ⱨǝmmisini yasidi.