1 Pǝrwǝrdigar Musaƣa sɵz ⱪilip mundaⱪ dedi:

2 «Sǝn ɵzüng üqün kümüxtin ikki kanay soⱪup yasitip, ularni jama’ǝtni yiƣixⱪa wǝ bargaⱨlirini yiƣixturup yolƣa qiⱪixⱪa qaⱪirix üqün ixlǝtkin.

3 Ikki kanay tǝng qelinƣanda, pütün jama’ǝt uqrixix qedirining kirix eƣizi aldiƣa kelip, ǝtrapingƣa yiƣilsun.

4 Lekin yalƣuz biri qelinsa, Isra’ilning mingbexiliri bolƣan baxliⱪlar aldingƣa kelip yiƣilsun.

5 Silǝr kanaylarni yuⱪiri awaz bilǝn qalƣininglarda, xǝrⱪ tǝrǝptiki bargaⱨlar ⱪozƣilip mengixⱪa baxlisun.

6 Silǝr ikkinqi ⱪetim buningdin yuⱪiri awaz bilǝn kanaylarni qalƣanda, jǝnub tǝrǝptiki bargaⱨlar ⱪozƣilip mengixⱪa baxlisun. Bu tǝriⱪidǝ ularni ⱪozƣap mangdurux üqün kanay yuⱪiri awaz bilǝn qelinsun.

7 Lekin jama’ǝtni jǝm ⱪilix lazim bolƣanda, kanay qelinglar, ǝmma yuⱪiri awaz bilǝn qalmanglar.

8 Ⱨarunning oƣulliri, yǝni kaⱨinlar kanaylarni qalsun. Bu silǝr üqün nǝsildin nǝsilgǝ mǝnggülük ⱪanun-bǝlgilimǝ bolidu.

9 Əgǝr silǝr ɵz zemininglarda silǝrgǝ zulum salƣan düxmǝn bilǝn jǝnggǝ qiⱪidiƣan bolsanglar, yuⱪiri awaz bilǝn kanay qelinglar. Xundaⱪ ⱪilsanglar, silǝr Hudayinglar Pǝrwǝrdigarning aldida yad etilip, düxmǝnliringlardin ⱪutulisilǝr. 10 Silǝrning huxal bayram künliringlarda, ⱨeytliringlar wǝ yengi ayliringlarda, kɵydürmǝ ⱪurbanliⱪliringlar wǝ amanliⱪ ⱪurbanliⱪliringlarni sunsanglar, Hudayinglarning aldida ǝslinix üqün kanaylarni qelinglar. Mǝn Hudayinglar Pǝrwǝrdigardurmǝn».

11 Ikkinqi yili ikkinqi ayning yigirminqi küni, bulut xaⱨadǝt qediridin kɵtürüldi. 12 Xuning bilǝn Bǝni Isra’il ⱪozƣilip, Sinay qɵlidin qiⱪti. Ular sǝpǝr ⱪilip mangƣanda, bulut Paran qɵlidǝ tohtidi. 13 Bu ularning birinqi ⱪetim Pǝrwǝrdigarning Musa arⱪiliⱪ bǝrgǝn buyruⱪi boyiqǝ ⱪozƣilip sǝpǝrgǝ qiⱪixi idi.

14 Birinqi bolup Yǝⱨuda ⱪǝbilisi ⱪozƣilip, qedirlirini yiƣip, ɵz tuƣining astida ⱪoxun-ⱪoxun bolup mangdi. Bu ⱪoxunning sǝrdari Aminadabning oƣli Naⱨxon idi. 15 Issakar ⱪǝbilisining ⱪoxunining sǝrdari Zo’arning oƣli Nǝtanǝl idi. 16 Zǝbulun ⱪǝbilisining sǝrdari bolsa Helonning oƣli Eliyab idi.

17 Ibadǝt qediri yiƣilip bolƣandin keyin, Gǝrxonning ǝwladliri wǝ Mǝrarining ǝwladliri ⱪozƣilip, ibadǝt qedirini kɵtürüp mangdi.

18 Andin keyin Rubǝniylǝr ⱪozƣilip, qedirlirini yiƣip, ɵz tuƣining astida ⱪoxun-ⱪoxun bolup mangdi. Bu ⱪoxunning sǝrdari Xede’urning oƣli Elizur idi. 19 Ximon ⱪǝbilisining ⱪoxunning sǝrdari Zurixadayning oƣli Xelumi’ǝl idi. 20 Gad ⱪǝbilisining ⱪoxunining sǝrdari bolsa Dǝyu’ǝlning oƣli Əlyasaf idi.

21 Andin keyin Ⱪoⱨatiylar ⱪozƣilip, muⱪǝddǝs buyumlarni kɵtürüp mangdi. Ular yetip barƣuqǝ ibadǝt qediri tikilip bolatti.

22 Andin keyin Əfra’im ⱪǝbilisi ⱪozƣilip, qedirlirini yiƣip, ɵz tuƣining astida ⱪoxun-ⱪoxun bolup mangdi. Bu ⱪoxunning sǝrdari Ammiⱨudning oƣli Əlixama idi. 23 Manassǝ ⱪǝbilisining ⱪoxunining sǝrdari Pedaⱨsurning oƣli Gamli’ǝl idi. 24 Bǝnyamin ⱪǝbilisining ⱪoxunining sǝrdari bolsa Gidonining oƣli Abidan idi.

25 Andin keyin Dan ⱪǝbilisi ⱪozƣilip, ɵz qedirlirini yiƣip, ⱨǝmmisining kǝynidin ɵz tuƣining astida ⱪoxun-ⱪoxun bolup mangdi. Bu ⱪoxunning sǝrdari Amixadayning oƣli Ahi’ǝzǝr idi. 26 Axǝr ⱪǝbilisining ⱪoxunining sǝrdari Okranning oƣli Pagi’ǝl idi. 27 Naftali ⱪǝbilisining ⱪoxunining sǝrdari bolsa Enanning oƣli Ahira idi.

28 Bu tǝriⱪidǝ Bǝni Isra’il ⱪozƣilip mangƣanda, ⱪoxun-ⱪoxun bolup mangdi.

29 Musa ɵz ⱪeynatisi Midiyanliⱪ Reⱨu’ǝlning oƣli Hobabⱪa: «Biz Pǝrwǝrdigar: ‹Mǝn uni silǝrgǝ berimǝn› dǝp wǝdǝ ⱪilƣan zeminƣa ketip barimiz. Sǝnmu biz bilǝn barsang, sanga yahxiliⱪ ⱪilimiz, qünki Pǝrwǝrdigar Isra’ilƣa yahxiliⱪ ⱪilixⱪa wǝdǝ ⱪilƣan» degǝndǝ 30 u uningƣa: «Yaⱪ, mǝn barmaymǝn, yurtumƣa ⱪaytip tuƣⱪanlirimning ⱪexiƣa barimǝn» dǝp jawab bǝrdi. 31 Musa uningƣa: «Sǝn bizni taxlimiƣaysǝn, qünki sǝn bizning qɵl-bayawanda ⱪǝyǝrdǝ qedir-bargaⱨ tikiximizni obdan bilgǝqkǝ, bizning kɵzimiz bolisǝn. 32 Əgǝr sǝn biz bilǝn barsang, Pǝrwǝrdigar bizgǝ ⱪilidiƣan yahxiliⱪⱪa biz seni xerik ⱪilimiz» dedi.

33 Ular Pǝrwǝrdigarning teƣidin yolƣa qiⱪip, üq küngiqǝ yol mangdi. Pǝrwǝrdigarning ǝⱨdǝ sanduⱪi üq küngiqǝ ularning aldida mengip, ular üqün aram alidiƣan jay izdidi. 34 Ular bargaⱨtin ⱪozƣilip kündüzi mangƣanda, Pǝrwǝrdigarning buluti ularning üstidǝ bolatti. 35 Ⱨǝr ⱪetim ǝⱨdǝ sanduⱪi kɵtürülüp mangƣanda, Musa: «Əy Pǝrwǝrdigar, ⱪozƣalƣaysǝn. Sening düxmǝnliring tiripirǝn bolsun, Seni yaman kɵrgǝnlǝr aldingdin ⱪaqsun» dǝytti. 36 Əⱨdǝ sanduⱪi bir jayda tohtiƣanda, u: «Əy Pǝrwǝrdigar, Isra’ilning tümǝnmingliri arisiƣa ⱪaytip kǝlgǝysǝn» dǝytti.