1 Bǝni Isra’il Misir zeminidin qiⱪⱪandin keyinki ikkinqi yili birinqi ayda, Pǝrwǝrdigar Sinay qɵlidǝ Musaƣa sɵz ⱪilip:

2 «Bǝni Isra’il Ɵtüp ketix ⱨeytini bekitilgǝn waⱪtida ɵtküzsun. ^◼   3 Silǝr uni bu ayning on tɵtinqi küni ahxam waⱪtida ɵtküzünglar. Bekitilgǝn waⱪitta, uning ⱨǝmmǝ ⱪanun-bǝlgilimiliri wǝ ⱪa’idǝ-nizamliri boyiqǝ uni ɵtküzünglar» dedi.

4 Xuning bilǝn Musa Bǝni Isra’ilƣa: «Silǝr Ɵtüp ketix ⱨeytini ɵtküzünglar» dǝp buyrudi. 5 Buning bilǝn ular birinqi ayning on tɵtinqi küni ahxam waⱪtida, Sinay qɵlidǝ Ɵtüp ketix ⱨeytini ɵtküzdi. Bǝni Isra’il ⱨǝr ixta Pǝrwǝrdigarning Musaƣa buyruƣinidǝk ⱪildi.

6 Lekin ɵlükkǝ tegip ketip ɵzini napak ⱪilip, u küni Ɵtüp ketix ⱨeytini ɵtküzǝlmǝydiƣan birnǝqqǝ kixi bar idi. Ular u kündǝ Musa wǝ Ⱨarunning aldiƣa kǝldi. 7 Bu kixilǝr Musaƣa sɵzlǝp: «Mana, biz bir ɵlük adǝmning sǝwǝbidin napak bolduⱪ. Əmdi bu ix sǝwǝbidin biz Bǝni Isra’il bilǝn billǝ Pǝrwǝrdigarning ⱨǝdiyǝsini kǝltürüxkǝ rǝt ⱪilinimizmu?» dǝp soridi. 8 Musa ularƣa jawab berip: «Saⱪlap turunglar. Pǝrwǝrdigar silǝr toƣruluⱪ nemǝ buyruydiƣinini anglap baⱪay» dedi.

9 Pǝrwǝrdigar Musaƣa sɵz ⱪilip mundaⱪ dedi:

10 «Sǝn Bǝni Isra’ilƣa mundaⱪ degin: ‹Əgǝr silǝrdin yaki ǝwladliringlardin biri ɵlükning sǝwǝbidin napak bolƣan bolsimu, yaki uzun sǝpǝrdǝ bolsimu, Pǝrwǝrdigarning Ɵtüp ketix ⱨeytini ɵtküzsun. 11 Ular uni ikkinqi ayning on tɵtinqi küni ahxam waⱪtida ɵtküzsun. Ɵtüp ketix ⱨeytining ⱪurbanliⱪi bolsa petir nan wǝ aqqiⱪ otyax bilǝn billǝ yeyilip, 12 ǝtisigǝ uningdin ⱨeqnemǝ ⱪaldurmisun wǝ uning ⱨeqbir sɵngiki sundurulmisun. Ular ɵtüp ketix ⱨeyti toƣrisidiki ⱪanun-bǝlgilimǝ boyiqǝ uni ɵtküzsun. 13 Lekin bir kixi pak bolup, sǝpǝrmu ⱪilmay, Ɵtüp ketix ⱨeytini ɵtküzmisǝ, undaⱪ kixi, bekitilgǝn waⱪitta Pǝrwǝrdigarning ⱨǝdiyǝsini kǝltürmigini üqün, ɵz hǝlⱪidin yulup taxlinip, ɵz gunaⱨining jazasini tartidu. 14 Əgǝr bir musapir aranglarda turup, Pǝrwǝrdigarƣa atalƣan Ɵtüp ketix ⱨeytini ɵtküzüxni halisa, Ɵtüp ketix ⱨeyti toƣrisidiki ⱪanun-bǝlgilimǝ boyiqǝ uni ɵtküzsun. Bu ⱪanun-bǝlgilimǝ mǝyli aranglardiki musapir bolsun, mǝyli yǝrlik adǝm bolsun, ⱨǝmmisigǝ ohxax bolsun›».

15 Uqrixix qediri tiklǝngǝn künidǝ, uqrixix qedirini, yǝni xaⱨadǝt qedirini bir bulut ⱪaplap turdi, wǝ ahxam waⱪtidin tartip tang yoruƣuqǝ ibadǝt qedirining üstidiki bulut ottǝk kɵrünüp turdi. 16 Bu xundaⱪ dawam ⱪildi: Kündüzi uning üstini bulut ⱪaplap turatti wǝ keqisi uning üstidiki bulut ottǝk kɵrünǝtti. 17 Bulut ibadǝt qedirining üstidin kɵtürülgǝndǝ, Bǝni Isra’il ⱪozƣilip mangatti wǝ bulut berip tohtiƣan yǝrdǝ Bǝni Isra’il tohtap qedir tikǝtti. 18 Xundaⱪki, Bǝni Isra’il Pǝrwǝrdigarning buyruⱪi bilǝn ⱪozƣilip mangatti wǝ Pǝrwǝrdigarning buyruⱪi bilǝn qedir-bargaⱨ tikǝtti. Bulut ibadǝt qedirining üstidǝ ⱪanqǝ uzaⱪ tursa, ularmu xunqǝ uzaⱪ bargaⱨta turatti. 19 Bulut ibadǝt qedirining üstidǝ uzaⱪ künlǝrgiqǝ turup ⱪalƣanda, Bǝni Isra’ilmu Pǝrwǝrdigarning buyruƣanliriƣa ri’ayǝ ⱪilip, ⱪozƣilip mangmaytti.

20 Bulut birnǝqqǝ künla ibadǝt qedirining üstidǝ tohtiƣandimu, ular Pǝrwǝrdigarning buyruⱪi boyiqǝ tohtap turatti wǝ Pǝrwǝrdigarning buyruⱪi bilǝn yǝnǝ ⱪozƣilip mangatti. 21 Bulut ahxamdin tang yoruƣuqǝ turup, sǝⱨǝr waⱪtida kɵtürülgǝndǝ, ularmu ⱪozƣilip mangatti. Mǝyli kündüzi bolsun, mǝyli keqisi bolsun, bulut kɵtürülgǝndǝ, ularmu ⱪozƣilip mangatti. 22 Bulut ikki kün, bir ay yaki uzunraⱪ waⱪitⱪiqǝ ibadǝt qedirining üstidǝ tohtap turƣanda, Bǝni Isra’ilmu xu waⱪitⱪiqǝ qedirlirida tohtap turup, ⱪozƣilip mangmaytti, lekin bulut kɵtürülgǝndǝ ularmu ⱪozƣilip mangatti. 23 Ular Pǝrwǝrdigarning buyruⱪi bilǝn tohtap qedir tikǝtti wǝ Pǝrwǝrdigarning buyruⱪi bilǝn ⱪozƣilip mangatti. Musa arⱪiliⱪ berilgǝn Pǝrwardigarning buyruⱪiƣa ǝmǝl ⱪilip, Pǝrwǝrdigarning ⱨɵkümigǝ boysunatti.