1 Pǝrwǝrdigar Musaƣa sɵz ⱪilip:

2 «Sǝn Ⱨarunƣa: ‹Sǝn qiraƣlarni qiraƣdanning üstigǝ ornatⱪanda, yǝttǝ qiraƣni qiraƣdanning aldi tǝripigǝ yoruⱪ qüxürgüdǝk tǝriⱪidǝ ornatⱪin› dǝp eytⱪin» dedi.

3 Ⱨarun xundaⱪ ⱪilip, Pǝrwǝrdigarning Musaƣa buyruƣinidǝk qiraƣlarni qiraƣdanning aldi tǝripigǝ yoruⱪ qüxürgüdǝk tǝriⱪidǝ ornatti. 4 Qiraƣdan soⱪma altundin yasalƣanidi, putidin tartip güllirigiqǝ soⱪup yasalƣanidi. Musa Pǝrwǝrdigar uningƣa kɵrsǝtkǝn nusha boyiqǝ bu qiraƣdanni yasiƣanidi.

5 Pǝrwǝrdigar Musaƣa sɵz ⱪilip mundaⱪ dedi:

6 «Sǝn Bǝni Isra’ilning iqidin Lawiylarni tallap, ularni pakliƣin. 7 Ularni paklax üqün kǝfarǝt süyini ularning üstigǝ sǝpkin. Andin keyin ular ɵzining pütün bǝdinigǝ ustira selip, kiyimlirini yuyup, ɵzini pak ⱪilsun. 8 Andin keyin ular bir torpaⱪ wǝ axliⱪ ⱨǝdiyǝsi üqün yaƣ arilaxturulƣan esil un kǝltürsun. Buningdin baxⱪa, sǝn gunaⱨ ⱪurbanliⱪi üqün yǝnǝ bir torpaⱪni kǝltürgin. 9 Andin Lawiylarni uqrixix qedirining aldiƣa yiƣⱪin, wǝ Bǝni Isra’ilning barqǝ jama’itinimu jǝm ⱪilƣin. 10 Sǝn Lawiylarni Pǝrwǝrdigarning aldiƣa yiƣⱪiningda Bǝni Isra’il kelip, ɵz ⱪollirini ularning üstigǝ ⱪoysun. 11 Andin keyin Ⱨarun Bǝni Isra’ilning iqidin Lawiylarni elip, Pǝrwǝrdigarning hizmitini ⱪilsun dǝp, ularni pulanglatma ⱨǝdiyǝsi süpitidǝ uningƣa tǝⱪdim ⱪilsun. 12 Andin keyin Lawiylar ɵz ⱪollirini torpaⱪlarning üstigǝ ⱪoysun. Sǝn buning birini gunaⱨ ⱪurbanliⱪi süpitidǝ sunup, yǝnǝ birini kɵydürmǝ ⱪurbanliⱪ süpitidǝ, Lawiylar üqün kǝfarǝt kǝltürsun dǝp, Pǝrwǝrdigarning aldida sunƣin. 13 Andin sǝn Lawiylarni Ⱨarun wǝ uning oƣullirining aldida turƣuzup, pulanglatma ⱨǝdiyǝ süpitidǝ Pǝrwǝrdigarning aldida tǝⱪdim ⱪilƣin. 14 Sǝn bu tǝriⱪidǝ ularni Bǝni Isra’ilning iqidin ayriƣin, Lawiylar mening bolidu.

15 Sǝn Lawiylarni paklap pulanglatma ⱨǝdiyǝ süpitidǝ tǝⱪdim ⱪilƣandin keyin, ular kirip, uqrixix qedirida hizmǝt ⱪilsun. 16 Qünki ular Bǝni Isra’ilning iqidin mǝhsus Manga tǝⱪsimlǝp berilgǝndur. Mǝn ularni Bǝni Isra’ilning arisida tunji bolup baliyatⱪuni aqⱪan ⱨǝmmisining orniƣa Ɵzümgǝ talliwaldim. 17 Qünki Bǝni Isra’ilning iqidiki mǝyli insan bolsun, mǝyli ⱨaywan bolsun ⱨǝmmǝ tunjilar Meningdur. Mǝn Ɵzüm Misir zeminidiki ⱨǝmmǝ tunjilarni ɵltürginimdǝ ularni Ɵzüm üqün ayrip muⱪǝddǝs ⱪildim. 18 Əmdi Mǝn Bǝni Isra’ilning arisidiki tunjilarning orniƣa Lawiylarni tallap, 19 Bǝni Isra’ilning muⱪǝddǝs jayƣa yeⱪin kelip ɵzini ɵlümgǝ tutup bǝrmǝsliki üqün, Mǝn Lawiylarni uqrixix qedirida Bǝni Isra’ilning ⱪilidiƣan hizmitini ⱪilixi üqün Ⱨarun wǝ uning oƣulliriƣa bǝrdim».

20 Musa, Ⱨarun wǝ Isra’ilning pütün jama’iti, Pǝrwǝrdigar Musaƣa Lawiylar toƣrisida buyruƣanlirining ⱨǝmmisini bǝja kǝltürdi. 21 Lawiylar ɵzlirini paklap, kiyimlirini yuƣandin keyin, Ⱨarun ularni pulanglatma ⱨǝdiyǝ süpitidǝ Pǝrwǝrdigarning aldida tǝⱪdim ⱪildi wǝ ularni paklax üqün ular üqün kǝfarǝt kǝltürdi. 22 Andin keyin Lawiylar kirip, Ⱨarun wǝ uning oƣullirining ⱪoli astida uqrixix qedirida hizmǝt ⱪildi. Bǝni Isra’il Pǝrwǝrdigar Musaƣa Lawiylar toƣrisida ⱪandaⱪ buyruƣan bolsa, xundaⱪ ⱪildi.

23 Pǝrwǝrdigar Musaƣa sɵz ⱪilip mundaⱪ dedi:

24 «Lawiylar toƣrisidiki ⱨɵküm xuki, yigirmǝ bǝx yaxtin axⱪanlar uqrixix qedirining hizmitini ⱪilix üqün sǝpkǝ kirsun. 25 Lekin Lawiylardin bolƣan kixi ǝllik yaxⱪa kirgǝndin tartip, hizmǝt ⱪilixtin azad bolidu. U yǝnǝ hizmǝt ⱪilmisun. 26 U uqrixix qedirida ɵz ⱪerindaxliridin hǝwǝr elip ularƣa yardǝm bǝrsǝ bolidu, ǝmma hizmǝt ⱪilmisun. Lawiylarning ⱪilidiƣan hizmitini xundaⱪ orunlaxturƣin.