1 Pǝrwǝrdigar Musaƣa sɵz ⱪilip mundaⱪ dedi:

2 «Sǝn Bǝni Isra’ilƣa mundaⱪ degin: ‹Əgǝr bir ǝr yaki ayal kixi nazariyliⱪⱪa wǝdǝ ⱪilip ɵzini Pǝrwǝrdigarƣa atimaⱪqi bolsa, ^◼   3 u ɵzini ⱨaraⱪ-xarabtin yiraⱪ tutup, ⱨaraⱪ-xarabtin yasalƣan sirkinimu iqmisun. Xuningdǝk üzümning xirnisini iqmisun wǝ ⱨɵl yaki ⱪuruⱪ üzümnimu yemisun. 4 Ɵzini atiƣan künlirining ⱨǝmmisidǝ üzüm telidin qiⱪⱪan ⱨarⱪandaⱪ nǝrsini yemǝy, uruⱪidin postiƣiqǝ ⱨǝmmisidin pǝrⱨiz tutsun.

5 Wǝdǝ boyiqǝ ɵzini atiƣan künlirining ⱨǝmmisidǝ bexiƣa ustira saldurmay, ɵzini Pǝrwǝrdigarƣa atiƣan künliri ɵtüp bolmiƣuqǝ ɵzini pak muⱪǝddǝs tutup, qeqini uzun ɵstürsun. 6 Buningdin baxⱪa, u ɵzini Pǝrwǝrdigarƣa atiƣan künlirining ⱨǝmmisidǝ ɵlükkǝ yeⱪinlaxmisun. 7 Atisi, anisi, aka-ukisi yaki aqa-singlisi ɵlüp ⱪalsimu, ular üqün ɵzini napak ⱪilip salmisun, Qünki ɵzini Hudaƣa atax bǝlgisi uning bexining üstididur.

8 Ɵzini atiƣan künlirining ⱨǝmmisidǝ Pǝrwǝrdigarƣa atap pak muⱪǝddǝs bolup tursun. 9 Lekin bir kixi uning yenida tuyuⱪsiz ɵlüp ⱪalsa wǝ xuning bilǝn uning ɵzini Hudaƣa atax bǝlgisi bar bexi napak bolsa, u ɵzini paklax künidǝ qeqini aldursun, yǝni yǝttinqi künidǝ qeqini qüxürsun. 10 Sǝkkizinqi küni u ikki pahtǝk yaki ikki kǝptǝr baqkisini elip, uqrixix qedirining kirix eƣiziƣa elip kelip, kaⱨinƣa bǝrsun. 11 Kaⱨin buning birini gunaⱨ ⱪurbanliⱪi üqün, yǝnǝ birini kɵydürmǝ ⱪurbanliⱪ üqün sunup, ɵlük sǝwǝbidin ɵtküzgǝn gunaⱨi üqün kǝfarǝt kǝltürsun. Xu künning ɵzidǝ u ɵz bexini ⱪayta paklap muⱪǝddǝs ⱪilsun. ^◼   12 Andin keyin u kixi ɵzini Pǝrwǝrdigarƣa atiƣan künlirini ⱪaytidin baxlisun. U bir yaxliⱪ bir ǝrkǝk ⱪozini kǝltürüp, ǝyib ⱪurbanliⱪi süpitidǝ sunsun. Uning atanƣanliⱪi napak ⱪilinƣini üqün, uning ɵzini atiƣan ilgiriki künliri ⱨesabⱪa elinmisun.

13 Nazariy kixi toƣrisidiki ⱪanun mundaⱪ: Ɵzini atiƣan künliri ɵtüp kǝtkinidǝ u uqrixix qedirining kirix eƣiziƣa kǝltürülsun. ^◼   13 U yǝrdǝ u Pǝrwǝrdigar üqün bir yaxliⱪ ǝyibsiz bir ǝrkǝk ⱪozini kɵydürmǝ ⱪurbanliⱪ süpitidǝ, bir yaxliⱪ ǝyibsiz bir qixi ⱪozini gunaⱨ ⱪurbanliⱪi süpitidǝ wǝ ǝyibsiz bir ⱪoqⱪarni amanliⱪ ⱪurbanliⱪi süpitidǝ kǝltürsun. 15 U bir sǝwǝt esil undin yeⱪilip, yaƣlanƣan petir girdǝ nan wǝ yaƣlanƣan petir ⱨǝmǝk nanlarni, xundaⱪla bu nǝrsilǝrgǝ ⱪoxup berilidiƣan axliⱪ ⱨǝdiyǝsi wǝ iqimlik ⱨǝdiyǝlirinimu tǝⱪdim ⱪilip kǝltürsun.

16 Kaⱨin bularni Pǝrwǝrdigarning aldiƣa kǝltürsun wǝ uning üqün gunaⱨ ⱪurbanliⱪi wǝ kɵydürmǝ ⱪurbanliⱪini sunsun. 17 U ⱪoqⱪarni wǝ petir nanlar bar sewǝtni Pǝrwǝrdigarƣa atalƣan amanliⱪ ⱪurbanliⱪi süpitidǝ sunsun. Andin keyin kaⱨin mǝzkur nǝrsilǝrgǝ ⱪoxup berilidiƣan axliⱪ ⱨǝdiyǝsi wǝ iqimlik ⱨǝdiyǝsinimu sunsun.

18 Nazariy kixi uqrixix qedirining kirix eƣizi aldida ɵzini atax bǝlgisi bar qeqini qüxürüp, ɵzini atax bǝlgisi bolƣan qeqini elip, uni amanliⱪ ⱪurbanliⱪining astida kɵyüp turƣan otⱪa salsun. 19 Kaⱨin pixurulƣan ⱪoqⱪarning tɵxi wǝ sewǝttiki bir petir girdini bir petir ⱨǝmǝk nan bilǝn billǝ ⱪoliƣa elip, nazariy kixi qeqini qüxürüp bolƣandin keyin uning ⱪoliƣa bǝrsun. 20 Andin keyin kaⱨin bularni pulanglatma ⱨǝdiyǝ süpitidǝ Pǝrwǝrdigarning aldida pulanglatsun. Bular wǝ pulanglatma ⱨǝdiyǝ bolƣan tɵx wǝ kɵtürmǝ ⱨǝdiyǝ bolƣan arⱪa put muⱪǝddǝs dǝp ⱨesablinip kaⱨinƣa tǝgsun. Bu ixlar ⱪilinip bolunƣandin keyin bu nazariy kixi xarab iqsǝ bolidu. ^◼  

21 Bu bolsa nazariy kixi toƣrisidiki wǝ xu kixining ɵzini atax toƣrisida bǝrgǝn wǝdisi boyiqǝ Pǝrwǝrdigarƣa sunuxi lazim bolƣan ⱪurbanliⱪ toƣrisidiki ⱪanundur. U bǝrgǝn wǝdisi boyiqǝ ɵzini atax toƣrisidiki ⱪanunƣa ǝmǝl ⱪilsun›».

22 Pǝrwǝrdigar Musaƣa sɵz ⱪilip mundaⱪ dedi:

23 «Sǝn Ⱨarun wǝ uning oƣulliriƣa mundaⱪ degin: ‹Silǝr Bǝni Isra’ilƣa hǝyrlik du’a ⱪilƣininglarda ularƣa mundaⱪ dǝnglar:

24 «Pǝrwǝrdigar sanga bǝrikǝt ata ⱪilƣay wǝ seni Ɵz panaⱨida saⱪliƣay.

25 Pǝrwǝrdigar yüzining nurini sening üstünggǝ qaqⱪay, sanga mǝrⱨǝmǝtlik bolƣay.

26 Pǝrwǝrdigar yüzini sanga ⱪaritip, sanga amanliⱪ ata ⱪilƣay».

27 Ular bu tǝriⱪidǝ Mening namim bilǝn Bǝni Isra’ilƣa hǝyrlik du’a ⱪilsa, Mǝn ularƣa bǝrikǝt ata ⱪilimǝn›». ^◼