1 Pǝrwǝrdigar Musa wǝ Ⱨarunƣa sɵz ⱪilip mundaⱪ dedi:

2 «Lawiylarning iqidin Ⱪoⱨatning ǝwladlirini ularning a’ilǝ-jǝmǝtliri boyiqǝ sanaⱪtin ɵtküzüp, 3 ottuz yaxtin ǝllik yaxⱪiqǝ bolƣan, uqrixix qediridiki ixlarni ⱪilix üqün hizmǝtkǝ kirgǝnlǝrning ⱨǝmmisini saniƣin.

4 Ⱪoⱨatning ǝwladlirining wǝzipisi uqrixix qedirining iqidǝ ǝng muⱪǝddǝs nǝrsilǝrgǝ ⱪaraxtur. 5 Bargaⱨ kɵqürülidiƣan waⱪtida Ⱨarun wǝ uning oƣulliri kirip, xaⱨadǝt sanduⱪining aldiƣa kirixni tosup turidiƣan ayrima pǝrdini elip, uning bilǝn xaⱨadǝt sanduⱪini yepip ⱪoysun.

6 Buning üstigǝ ular delfin terisidin yasalƣan bir yokpuⱪni yepip, buning üstigǝ yǝnǝ kɵk rǝnglik bir rǝhtni yepip, andin kɵtürüx hadilirini ɵtküzüp ⱪoysun. 7 Ular tǝⱪdim nenining xirǝsining üstigǝ kɵk rǝnglik rǝhtni selip, uning üstigǝ tawaⱪlar, piyalilǝr, iqimlik ⱨǝdiyǝsi ⱪuyidiƣan ⱪǝdǝⱨlǝr wǝ qɵgünlǝrni tizip ⱪoysun, u yǝrdǝ ⱨǝmixǝ turidiƣan nannimu tizip ⱪoysun. 8 Andin uning üstigǝ toⱪ ⱪizil rǝnglik bir rǝhtni yepip, buning üstigǝ yǝnǝ delfin terisidin yasalƣan bir yopuⱪni yepip, andin keyin kɵtürüx hadilirini ɵtküzüp ⱪoysun. 9 Andin keyin kɵk rǝnglik bir rǝhtni elip, uning bilǝn qiraƣdan wǝ qiraƣlirini, pilik ⱪisⱪuqliri wǝ küldanlirini wǝ qiraƣ yeƣiƣa ixlitilidiƣan ⱨǝmmǝ ⱪaqilarni yepip ⱪoysun. 10 Andin ular qiraƣdanni wǝ ⱨǝmmǝ ⱪaqa-ⱪuqilirini delfin terisidin yasalƣan bir yopuⱪ bilǝn yɵgǝp, ⱨǝmmisini bir zǝmbilgǝ salsun. 11 Ular altun huxbuygaⱨ üstigǝ kɵk rǝnglik bir rǝhtni yepip, üstigǝ yǝnǝ delfin terisidin yasalƣan bir yopuⱪni yepip ⱪoysun, andin keyin kɵtürüx hadilirini ɵtküzüp ⱪoysun. 12 Ular muⱪǝddǝs jayning iqidǝ ixlitidiƣan ǝswab-jabduⱪlirining ⱨǝmmisini kɵk rǝnglik bir rǝhtkǝ yɵgǝp, andin keyin ularni delfin terisidin yasalƣan bir yopuⱪning iqigǝ ⱪoyup, zǝmbilgǝ salsun. 13 Andin keyin ular ⱪurbangaⱨni yaƣ-külliridin tazilap, ⱪurbangaⱨning üstigǝ sɵsün rǝnglik bir rǝhtni yepip ⱪoysun. 14 Ular uning hizmitigǝ ixlitidiƣan ǝswablarni, yǝni otdanlar, lahxigirlar, gürjǝklǝr wǝ jawurlarni, xundaⱪla ⱪurbangaⱨning ⱨǝmmǝ ǝxyalirini elip, ⱪurbangaⱨning üstigǝ ⱪoyup, buning üstigǝ delfin terisidin yasalƣan yopuⱪni yepip, andin keyin kɵtürüx hadilirini ɵtküzüp ⱪoysun.

15 Bargaⱨ kɵqürülidiƣan waⱪtida, Ⱨarun wǝ uning oƣulliri muⱪǝddǝs nǝrsilǝrni wǝ muⱪǝddǝs jayning ǝswablirini yepip bolƣandin keyin, Ⱪoⱨatning ǝwladliri uni kɵtürgili kǝlsun, lekin ɵlüp kǝtmǝsliki üqün muⱪǝddǝs nǝrsilǝrgǝ tǝgmisun. Mana bular uqrixix qedirining iqidin Ⱪoⱨat ǝwladlirining kɵtürüp toxuydiƣan nǝrsiliridur.

16 Kaⱨin Ⱨarunning oƣli Eli’azarning wǝzipisi qiraƣ yeƣi, huxbuy isriⱪ, ⱨǝr künning axliⱪ ⱨǝdiyǝsi wǝ mǝsiⱨlǝx yeƣiƣa ⱪarax, pütün ibadǝt qediri wǝ xu yǝrdiki ⱨǝmmǝ nǝrsilǝr wǝ muⱪǝddǝs jay bilǝn uning ǝswablirini saⱪlaxtur».

17 Pǝrwǝrdigar Musa wǝ Ⱨarunƣa sɵz ⱪilip mundaⱪ dedi:

18 «Ⱪoⱨatiylarning jǝmǝtining Lawiy ⱪǝbilisidin yoⱪalmasliⱪi üqün, 19 ular ǝng muⱪǝddǝs nǝrsilǝrgǝ yeⱪin barƣanda ɵlüp kǝtmǝy ⱨayat ⱪelixi üqün, Ⱨarun wǝ uning oƣulliri ular bilǝn kirip, ularning ⱨǝrbirigǝ nemǝ ⱪilip, nemini kɵtüridiƣinini kɵrsitip bǝrsun. 20 Lekin ular kirip, muⱪǝddǝs nǝrsilǝrgǝ bir dǝmmu ⱪarimisun, qünki ǝgǝr undaⱪ ⱪilsa, ɵlidu».

21 Pǝrwǝrdigar Musaƣa sɵz ⱪilip mundaⱪ dedi:

22 «Gǝrxonning ǝwladlirini ularning a’ilǝ-jǝmǝtliri boyiqǝ sanaⱪtin ɵtküzüp, 23 ottuz yaxtin ǝllik yaxⱪiqǝ bolƣan, uqrixix qediridiki ixlarni ⱪilix üqün hizmǝtkǝ kirgǝnlǝrning ⱨǝmmisini saniƣin. 24 Gǝrxoniylarning ǝwladlirining ⱪilidiƣan hizmiti wǝ ular kɵtüridiƣan nǝrsilǝr tɵwǝndikiqǝ: 25 Ular ibadǝt qedirining pǝrdiliri wǝ uqrixix qedirining ɵzi, buning üstigǝ ⱪoyulƣan yopuⱪi wǝ delfin terisidin yasalƣan tax yopuⱪi wǝ uqrixix qedirining kirix eƣizining pǝrdisini kɵtürsun. 26 Buningdin baxⱪa, ular ibadǝt qedirini wǝ ⱪurbangaⱨning qɵrisini ⱪorxiƣan ⱨoylining pǝrdiliri wǝ bu ⱨoyliƣa kiridiƣan dǝrwazining pǝrdisini, bularning taniliri wǝ ⱨǝmmǝ ixlitilidiƣan ǝswab-jabduⱪlirini kɵtürsun wǝ xuningƣa munasiwǝtlik ixlarni ⱪilsun.

27 Gǝrxoniylarning ǝwladlirining kɵtürüx wǝ hizmitigǝ tegixlik ixliri Ⱨarun wǝ uning oƣullirining buyruⱪi boyiqǝ ⱪilinsun. Silǝr ularning ⱨǝrbirigǝ nemǝ kɵtüridiƣinini bǝlgilǝp beringlar. 28 Mana bu Gǝrxonning ǝwladlirining jǝmǝtlirining uqrixix qedirida ⱪilidiƣan ixliridur. Ular kaⱨin Ⱨarunning oƣli Itamarning ⱪol astida hizmǝt ⱪilsun.

29 Sǝn Mǝrarining ǝwladlirini ularning a’ilǝ-jǝmǝtliri boyiqǝ sanaⱪtin ɵtküzüp, 30 ottuz yaxtin ǝllik yaxⱪiqǝ bolƣan, qediridiki ixlarni ⱪilix üqün hizmǝtkǝ kirgǝnlǝrning ⱨǝmmisini saniƣin. 31 Ularning uqrixix qedirida ⱪilidiƣan ⱨǝmmǝ ixliri wǝ kɵtüridiƣan nǝrsiliri munulardur: Ular ibadǝt qedirining tahtayliri, baldaⱪliri, tüwrükliri wǝ ularning putliri, 32 ⱨoylining qɵrisidiki tüwrükliri wǝ ularning putliri, ⱪozuⱪliri wǝ tanilirini ⱨǝmmǝ ǝswabliri bilǝn billǝ kɵtürsun wǝ xuningƣa munasiwǝtlik ⱨǝmmǝ ixlarni ⱪilsun. Silǝr ularning ⱨǝrbirigǝ kɵtüridiƣan nǝrsilǝrni bir-birlǝp nami bilǝn bǝlgilǝp beringlar. 33 Mana bu Mǝrarining ǝwladlirining jǝmǝtlirining uqrixix qediridiki hizmitidur, ularning kaⱨin Ⱨarunning oƣli Itamarning ⱪol astida ⱪilidiƣan ixliridur» dedi.

34 Musa, Ⱨarun wǝ jama’ǝtning baxliⱪliri Ⱪoⱨatning ǝwladlirini ularning a’ilǝ-jǝmǝtliri boyiqǝ sanaⱪtin ɵtküzüp, 35 ottuz yaxtin ǝllik yaxⱪiqǝ bolƣan, uqrixix qediridiki ixlarni ⱪilix üqün hizmǝtkǝ kirgǝnlǝrning ⱨǝmmisini sanidi. 36 Ɵz jǝmǝtliri boyiqǝ sanaⱪtin ɵtküzülgǝnlǝrning sani ikki ming yǝttǝ yüz ǝllik idi. 37 Mana bu Ⱪoⱨatiylarning jǝmǝtliridin bolup, uqrixix qedirida hizmǝt ⱪilidiƣan, Musa wǝ Ⱨarun Pǝrwǝrdigarning Musaƣa buyruƣini boyiqǝ sanaⱪtin ɵtküzgǝnlǝrning sani idi.

38 Gǝrxonning ǝwladliridin ottuz yaxtin axⱪan, 39 uqrixix qediridiki ixlarni ⱪilix üqün hizmǝtkǝ kirgǝnlǝrning ⱨǝmmisi ɵz a’ilǝ-jǝmǝtliri boyiqǝ sanaⱪtin ɵtküzüldi. 40 Ɵz a’ilǝ-jǝmǝtliri boyiqǝ sanaⱪtin ɵtküzülgǝnlǝrning sani ikki ming altǝ yüz ottuz kixi idi. 41 Mana bu Gǝrxonning ǝwladlirining jǝmǝtliridin bolup, uqrixix qedirida hizmǝt ⱪilidiƣan, Musa wǝ Ⱨarun Pǝrwǝrdigarning buyruƣini boyiqǝ sanaⱪtin ɵtküzgǝnlǝrning sani idi.

42 Mǝrarining ǝwladliridin ottuz yaxtin axⱪan, 43 uqrixix qediridiki ixlarni ⱪilix üqün hizmǝtkǝ kirgǝnlǝrning ⱨǝmmisi ɵz a’ilǝ-jǝmǝtliri boyiqǝ sanaⱪtin ɵtküzüldi. 44 Ɵz a’ilǝ-jǝmǝtliri boyiqǝ sanaⱪtin ɵtküzülgǝnlǝrning sani üq ming ikki yüz kixi idi. 45 Mana bu Mǝrarining ǝwladlirining jǝmǝtliridin bolƣan, Musa wǝ Ⱨarun Pǝrwǝrdigarning Musaƣa buyruƣini boyiqǝ sanaⱪtin ɵtküzgǝnlǝrning sani idi.

46 Lawiylardin ottuz yaxtin ǝllik yaxⱪiqǝ bolƣan, 47 uqrixix qedirida ix ⱪilix wǝ yük kɵtürüx üqün hizmǝtkǝ kirgǝnlǝr ⱨǝmmisi ɵz a’ilǝ-jǝmǝtliri boyiqǝ Musa, Ⱨarun wǝ Isra’ilning baxliⱪlirining wasitisi bilǝn sanaⱪtin ɵtküzüldi. 48 Sanaⱪtin ɵtküzülgǝnlǝrning sani jǝm’iy sǝkkiz ming bǝx yüz sǝksǝn kixi idi. 49 Ular Pǝrwǝrdigarning buyruⱪi boyiqǝ Musa tǝripidin sanaⱪtin ɵtküzüldi wǝ ularning ⱨǝrbirigǝ ⱪilidiƣan ixi wǝ kɵtüridiƣan yüki bǝlgilǝp berildi. Bu tǝriⱪidǝ ular Pǝrwǝrdigarning buyruⱪi boyiqǝ Musaning wasitisi bilǝn sanaⱪtin ɵtküzüldi.