1 Pǝrwǝrdigar Sinay teƣida Musa bilǝn sɵzlǝxkǝn künlǝrdǝ, Ⱨarun wǝ Musaning ǝwladliri tɵwǝndikilǝrdur: 2 Ⱨarunning oƣullirining isimliri mundaⱪ idi: tunji oƣli Nadab, andin Abiⱨu, Eli’azar wǝ Itamar. 3 Bular, Ⱨarunning oƣullirining, kaⱨin boluxi üqün, mǝsiⱨlinip kaⱨinliⱪ hizmitigǝ tǝyinlǝngǝnlǝrning isimliri idi. ^◼   4 Lekin Nadab wǝ Abiⱨu Sinay qɵlidǝ Pǝrwǝrdigarning aldiƣa yat bir otni kǝltürginidǝ Pǝrwǝrdigarning aldida ɵlüp kǝtkǝnidi, ularning ǝwladlirimu ⱪalmiƣanidi. Xunga Eli’azar wǝ Itamar ɵz atisi Ⱨarunning ⱪexida kaⱨinliⱪ hizmitini ⱪilatti.

5 Pǝrwǝrdigar Musaƣa sɵz ⱪilip mundaⱪ dedi:

6 «Sǝn Lawiy ⱪǝbilisini yeⱪin kǝltürüp, ularning kaⱨin Ⱨarunƣa hizmǝt ⱪilixi üqün, ularni uning aldida turƣuzƣin. 7 Ular uning tǝripidin wǝ pütün jama’ǝt tǝripidin ɵzlirigǝ tapxurulƣan ixlarni uqrixix qedirining aldida orunlap, qedirning hizmitini bejirsun. 8 Ular uqrixix qedirining ǝswab-jabduⱪlirini saⱪlisun wǝ Bǝni Isra’il üqün ibadǝt qedirining hizmitini ⱪilsun. 9 Sǝn Lawiylarni Ⱨarun wǝ uning oƣulliriƣa bǝrgin. Ular Bǝni Isra’il iqidin mǝhsus uningƣa tǝⱪsimlǝp berilgǝn. 10 Lekin Ⱨarun wǝ uning oƣullirini kaⱨinliⱪ wǝzipisigǝ tǝyinligin. Əgǝr yat bir kixi buningƣa yeⱪin kǝlsǝ, ɵltürülsun».

11 Pǝrwǝrdigar Musaƣa sɵz ⱪilip mundaⱪ dedi:

12 «Mana, Mǝn Ɵzüm Bǝni Isra’ilning iqidin Lawiylarni ayrip, Bǝni Isra’ilning baliyatⱪuni aqⱪan ⱨǝmmǝ tunjilirining orniƣa Manga has bolsun dǝp, Lawiylarni talliwaldim. 13 Qünki ⱨǝmmǝ tunjilar Meningdur. Mǝn Misir zeminida ⱨǝmmǝ tunjilarni ɵltürgǝn kündǝ, Bǝni Isra’ilning, mǝyli insan bolsun, mǝyli ⱨaywan bolsun, ⱨǝmmǝ tunjilirini Ɵzüm üqün ayrip muⱪǝddǝs ⱪilƣanidim. Dǝrwǝⱪǝ ular Meningdur. Mǝn Pǝrwǝrdigardurmǝn».

14 Pǝrwǝrdigar Sinay qɵlidǝ Musaƣa sɵz ⱪilip:

15 «Sǝn Lawiylarni a’ilǝ-jǝmǝtliri boyiqǝ sanaⱪtin ɵtküzgin, yǝni yexi bir ayliⱪtin axⱪan ⱨǝmmǝ oƣul balini saniƣin» dedi. 16 Xuning bilǝn Musa Pǝrwǝrdigarning ǝmri boyiqǝ, ɵzigǝ buyruƣinidǝk ularni sanaⱪtin ɵtküzdi.

17 Lawiyning oƣullirining isimliri Gǝrxon, Ⱪoⱨat wǝ Mǝrari idi.

18 Gǝrxonning oƣullirining isimliri, ulardin kelip qiⱪⱪan jǝmǝtliri boyiqǝ, Libni wǝ Ximǝy idi.

19 Ⱪoⱨatning oƣullirining isimliri, ulardin kelip qiⱪⱪan jǝmǝtliri boyiqǝ, Amram, Yizⱨar, Hebron wǝ Uzzi’ǝl idi.

20 Mǝrarining oƣullirining isimliri, ulardin kelip qiⱪⱪan jǝmǝtliri boyiqǝ, Mahli wǝ Muxi idi. Bular ata jǝmǝtliri boyiqǝ Lawiylarning jǝmǝtliri idi.

21 Gǝrxondin Libniylarning jǝmǝti wǝ Ximǝylǝrning jǝmǝti barliⱪⱪa kǝldi. Bular Gǝrxoniylarning jǝmǝtliri idi. 22 Bularning iqidin sanaⱪtin ɵtküzülgǝnlǝrning sani, yǝni yexi bir ayliⱪtin axⱪan sanalƣan barliⱪ oƣul balilarning sani yǝttǝ ming bǝx yüz idi. 23 Gǝrxoniylarning jǝmǝtliri ibadǝt qedirining kǝynidǝ, ƣǝrb tǝrǝptǝ ɵz qedirlirini tikǝtti. 24 La’ǝlning oƣli Əlyasaf Gǝrxoniylarning ata jǝmǝtining baxliⱪi idi. 25 Gǝrxonning oƣullirining wǝzipisi uqrixix qedirida turup, ibadǝt qediri wǝ uning taxⱪiriⱪi yopuⱪi wǝ iq yopuⱪi, xundaⱪla uqrixix qedirining kirix eƣizining pǝrdisini saⱪlax, 26 ibadǝt qedirini wǝ ⱪurbangaⱨning qɵrisini ⱪorxiƣan ⱨoylining pǝrdiliri wǝ ⱨoylining dǝrwazisining pǝrdisini beⱪix wǝ ixⱪa lazim bolidiƣan ⱨǝmmǝ tanilirini saⱪlax idi.

27 Ⱪoⱨattin Amramiylarning jǝmǝti, Yizⱨariylarning jǝmǝti, Hebroniylarning jǝmǝti wǝ Uzzi’ǝliylǝrning jǝmǝti barliⱪⱪa kǝldi. Bular Ⱪoⱨatlarning jǝmǝtliri idi. 28 Bularning iqidin yexi bir ayliⱪtin axⱪan ⱨǝmmǝ oƣul balilarning sani sǝkkiz ming altǝ yüz idi. Ular muⱪǝddǝs jayning ixliriƣa mǝs’ul idi. 29 Ⱪoⱨatning ǝwladlirining jǝmǝtliri ibadǝt qedirining yenida jǝnub tǝrǝptǝ ɵz qedirlirini tikǝtti. 30 Uzzi’ǝlning oƣli Elizafan Ⱪoⱨatiylarning ata jǝmǝtining baxliⱪi idi. 31 Ularning wazipisi ǝⱨdǝ sanduⱪi, xirǝ, qiraƣdan, ⱪurbangaⱨlar, ibadǝt üqün ixlitidiƣan muⱪǝddǝs jayning ǝswabliri wǝ ayrima pǝrdigǝ ⱪarax wǝ uning ⱪalƣan ⱨǝmmǝ ixlirini orunlax idi. 32 Kaⱨin Ⱨarunning oƣli Eli’azar Lawiylarning yetǝkqilirining baxliⱪi bolup, muⱪǝddǝs jayƣa ⱪarax hizmitini ⱪilidiƣan kixilǝrgǝ nazarǝtqi idi.

33 Mǝraridin Mahliylarning jǝmǝti wǝ Muxiylarning jǝmǝti barliⱪⱪa kǝldi. Bular Mǝrariylarning jǝmǝtliri idi. 34 Bularning iqidin yexi bir ayliⱪtin axⱪan ⱨǝmmǝ sanaⱪtin ɵtküzülgǝn oƣul balilarning sani altǝ ming ikki yüz idi. 35 Abihayilning oƣli Zuri’ǝl Mǝrariylarning ata jǝmǝtining baxliⱪi idi. Ularning bargaⱨi ibadǝt qedirining yenida, ximal tǝrǝptǝ idi. 36 Mǝrarining oƣullirining wǝzipisi ibadǝt qedirining tahtayliri, baldaⱪliri, tüwrükliri, putliri wǝ ⱨǝmmǝ ǝswabliriƣa ⱪarax, uning baxⱪa ⱨǝmmǝ ixlirini ⱪilix, 37 wǝ ⱨoylining qɵrisidiki tüwrüklǝr wǝ putlirini, ⱪozuⱪlirini wǝ tanilirini saⱪlax idi.

38 Ibadǝt qediri bolƣan uqrixix qedirining aldida kün qiⱪix tǝripidǝ qedirning udulida Musa, Ⱨarun wǝ uning oƣulliri qedir-bargaⱨ tikti. Ular Bǝni Isra’il üqün muⱪǝddǝs jayƣa ⱪarax hizmitini ⱪilatti. Qünki ǝgǝr bir yat kixi uningƣa yeⱪinlaxsa, ɵltürülǝtti.

39 Lawiylarning iqidin Musa wǝ Ⱨarun tǝripidin Pǝrwǝrdigarning buyruⱪi bilǝn jǝmǝtliri boyiqǝ sanaⱪtin ɵtküzülgǝn, yexi bir ayliⱪtin axⱪan ǝrkǝklǝrning jǝm’iy sani yigirmǝ ikki ming idi.

40 Pǝrwǝrdigar Musaƣa: «Bǝni Isra’ilning iqidǝ yexi bir ayliⱪtin axⱪan tunji oƣullirining ⱨǝmmisini isimliri bilǝn tizimƣa alƣin. 41 Sǝn Bǝni Isra’ilning ⱨǝmmǝ tunjilirining ornida Lawiylarni elip Manga atiƣin — Mǝn Pǝrwǝrdigardurmǝn — wǝ Bǝni Isra’ilning ⱨǝmmǝ qarwa mallirining tunjilirining ornida Lawiylarning qarwa mallirini elip Manga atiƣin» dedi. 42 Musa Pǝrwǝrdigarning buyruⱪi boyiqǝ Bǝni Isra’ilning ⱨǝmmǝ tunjilirini sanaⱪtin ɵtküzdi. 43 Isimliri bilǝn tizimƣa elinip, sanaⱪtin ɵtküzülgǝn, yexi bir ayliⱪtin axⱪan tunji oƣul balilirining sani yigirmǝ ikki ming ikki yüz yǝtmix üq idi.

44 Pǝrwǝrdigar Musaƣa sɵz ⱪilip mundaⱪ dedi:

45 «Sǝn berip, Bǝni Isra’ilning ⱨǝmmǝ tunjilirining ornida Lawiylarni alƣin wǝ ularning qarwa mallirining ornida Lawiylarning qarwa mallirini alƣin. Bu tǝriⱪidǝ Lawiylar Manga has bolsun. Mǝn Pǝrwǝrdigardurmǝn. 46 Lawiylarning sanidin exip kǝtkǝn Bǝni Isra’ilning ikki yüz yǝtmix üq tunjisi üqün, azad ⱪilix bǝdili süpitidǝ, 47 sǝn ⱨǝrbir kixi üqün muⱪǝddǝs jayning xekǝlining ɵlqimi boyiqǝ bǝx xekǝl alƣin. Ⱨǝrbir xekǝl yigirmǝ geraⱨⱪa barawǝr bolsun. ^◼   48 Oxuⱪ qiⱪip ⱪalƣanlar üqün azad ⱪilix bǝdili süpitidǝ alƣan bu kümüxni Ⱨarun wǝ uning oƣulliriƣa bǝrgin».

49 Xuning bilǝn Musa Lawiylardin oxuⱪ qiⱪip ⱪalƣan Isra’iliylar üqün azad ⱪilix bǝdilining kümüxini aldi. 50 Bǝni Isra’ilning tunjiliridin elinƣan bu kümüxning ⱨesabi muⱪǝddǝs jayning xekǝlining ɵlqimi boyiqǝ bir ming üq yüz atmix bǝx xekǝl idi. 51 Musa Pǝrwǝrdigarning ⱨɵkümi boyiqǝ azad ⱪilix bǝdilining pulini elip, Pǝrwǝrdigar uningƣa buyruƣinidǝk, buni Ⱨarun wǝ uning oƣulliriƣa tapxurup bǝrdi.