1 Pǝrwǝrdigar Musaƣa sɵz ⱪilip mundaⱪ dedi:

2 «Bǝni Isra’ilƣa mundaⱪ degin: ‹Bir kixi bilmǝstin Pǝrwǝrdigarning ǝmrliridin birigǝ hilapliⱪ ⱪilip mǝn’i ⱪilinƣan ix ⱪilip selip, gunaⱨkar bolsa, tɵwǝndikidǝk ⱪilsun:

3 Əgǝr mǝsiⱨlǝngǝn kaⱨin hǝlⱪni gunaⱨⱪa tiⱪip ⱪoyidiƣan bir gunaⱨ ⱪilsa, u bu ⱪilƣan gunaⱨi üqün, ǝyibsiz bir torpaⱪni Pǝrwǝrdigarning aldiƣa gunaⱨ ⱪurbanliⱪi üqün kǝltürsun. ^◼   4 U torpaⱪni uqrixix qedirining kirix eƣizining yeniƣa, Pǝrwǝrdigarning aldiƣa kǝltürüp, ɵz ⱪolini uning bexiƣa ⱪoyup, andin torpaⱪni Pǝrwǝrdigarning aldida boƣuzlisun. 5 Andin keyin mǝsiⱨlǝngǝn kaⱨin torpaⱪning ⱪenidin azƣinǝ elip, uqrixix qediriƣa elip barsun. 6 U yǝrdǝ kaⱨin barmiⱪini ⱪanƣa qilap, ⱪanni muⱪǝddǝs jayning ayrima pǝrdisining aldida Pǝrwǝrdigarning ⱨuzurida yǝttǝ ⱪetim sǝpsun. 7 Kaⱨin ⱪandin elip, uni uqrixix qedirida Pǝrwǝrdigarning aldida turƣan huxbuygaⱨning münggüzlirigǝ sürsun. Lekin torpaⱪning ⱪalƣan ⱨǝmmǝ ⱪenini uqrixix qedirining kirix eƣizi aldidiki kɵydürmǝ ⱪurbanliⱪ ⱪurbangaⱨining tüwigǝ tɵksun. 8 Andin u gunaⱨ ⱪurbanliⱪi bolƣan torpaⱪning iqidiki ⱨǝmmǝ yeƣini, yǝni üqǝy-baƣirlirini ⱪapliƣan yaƣ wǝ ⱪalƣan iq yeƣini, 9 wǝ ikki bɵriki bilǝn üstidiki ikki yanpaxtiki yaƣni ajratsun, jigǝrning üstidiki qawa yaƣnimu bɵrǝk bilǝn ⱪoxup kesip ayrisun. 10 Kaⱨin amanliⱪ ⱪurbanliⱪi ⱪilinip kǝltürülgǝn buⱪilarƣa ⱪilƣinidǝk yaƣni qiⱪirip, uni kɵydürmǝ ⱪurbanliⱪ ⱪurbangaⱨining üstidǝ kɵydürsun. 11 Lekin torpaⱪning terisi, ⱨǝmmǝ gɵxi, bexi, paqaⱪliri, üqǝy-baƣirliri wǝ teziki, 12 yǝni torpaⱪning ⱪalƣan ⱨǝmmǝ ⱪismini bargaⱨning taxⱪiriƣa qiⱪirip, kül tɵkülidiƣan pak yǝrgǝ kǝltürüp, uni otunning üstidǝ otta kɵydürsun. Bu nǝrsilǝr kül tɵkülidiƣan yǝrning ɵzidǝ kɵydürüwetilsun.

13 Əgǝr Bǝni Isra’ilning pütün jama’iti ɵzliri bilmǝstin, Pǝrwǝrdigarning ǝmrliridin birigǝ hilapliⱪ ⱪilip mǝn’i ⱪilinƣan bir ixni ⱪilip selip, gunaⱨkar bolsa, 14 jama’ǝtning ɵz ⱪilƣan gunaⱨi axkara bolƣandin keyin, ular gunaⱨ ⱪurbanliⱪi üqün bir torpaⱪni ⱪurbanliⱪ ⱪilip, uni uqrixix qedirining aldiƣa kǝltürsun. 15 Jama’ǝtning aⱪsaⱪalliri Pǝrwǝrdigarning aldida torpaⱪning bexiƣa ɵz ⱪollirini ⱪoyup, andin torpaⱪni Pǝrwǝrdigarning aldida boƣuzlisun. 16 Mǝsiⱨlǝngǝn kaⱨin bolsa torpaⱪning ⱪenidin azƣinǝ elip, uqrixix qediriƣa elip kirsun. 17 Andin keyin u kaⱨin barmiⱪini ⱪanƣa qilap, ⱪanni ayrima pǝrdining aldida Pǝrwǝrdigarning ⱨuzurida yǝttǝ ⱪetim sǝpsun. 18 Andin u ⱪandin elip, uqrixix qedirida Pǝrwǝrdigarning aldida turƣan huxbuygaⱨning münggüzlirigǝ sürsun. Ⱪalƣan ⱨǝmmǝ ⱪenini u uqrixix qedirining kirix eƣizi aldidiki kɵydürmǝ ⱪurbanliⱪ ⱪurbangaⱨining tüwigǝ tɵksun. 19 U buⱪining ⱨǝmmǝ yeƣini qiⱪirip, ⱪurbangaⱨning üstidǝ kɵydürsun. 20 U gunaⱨ ⱪurbanliⱪi bolƣan ilgiriki torpaⱪⱪa ⱪilƣinidǝk, bu torpaⱪⱪimu xundaⱪ ⱪilsun. Bu tǝriⱪidǝ kaⱨin ular üqün kǝfarǝt kǝltürsǝ, u gunaⱨ ulardin kǝqürülidu. 21 Andin keyin u ilgiriki torpaⱪni ⱪilƣinidǝk, bu torpaⱪnimu bargaⱨning taxⱪiriƣa qiⱪirip kɵydürsun. Bu jama’ǝt üqün gunaⱨ ⱪurbanliⱪi bolidu.

22 Əgǝr baxliⱪ bolƣan kixi bilmǝstin Pǝrwǝrdigarning ǝmrliridin birigǝ hilapliⱪ ⱪilip mǝn’i ⱪilinƣan ix ⱪilip selip, gunaⱨkar bolsa, 23 wǝ ⱪilƣan gunaⱨi uningƣa bildürülsǝ, ⱪurbanliⱪi üqün ǝyibsiz bir tekini kǝltürsun. 24 U ɵz ⱪolini tekining bexiƣa ⱪoyup, andin uni kɵydürmǝ ⱪurbanliⱪ bolidiƣan ⱨaywanni boƣuzlaydiƣan jayƣa elip berip, Pǝrwǝrdigarning aldida boƣuzlisun. Bu gunaⱨ ⱪurbanliⱪi bolidu. 25 Andin keyin kaⱨin gunaⱨ ⱪurbanliⱪi bolƣan ⱨaywanning ⱪenidin barmiⱪi bilǝn azƣinǝ elip, uni kɵydürmǝ ⱪurbangaⱨining münggüzlirigǝ sürüp ⱪoysun wǝ uning ⱪalƣan ⱪenini kɵydürmǝ ⱪurbanliⱪ ⱪurbangaⱨining tüwigǝ tɵksun. 26 Amanliⱪ ⱪurbanliⱪi bolidiƣan ⱨaywanning yeƣini kɵydürgǝndǝk, u buningmu ⱨǝmmǝ yeƣini ⱪurbangaⱨta kɵydürsun. Bu tǝriⱪidǝ kaⱨin uning üqün kǝfarǝt kǝltürsǝ, u gunaⱨ uningdin kǝqürülidu.

27 Əgǝr awam hǝlⱪtin biri bilmǝstin Pǝrwǝrdigarning ǝmrliridin birigǝ hilapliⱪ ⱪilip mǝn’i ⱪilinƣan ix ⱪilip selip, gunaⱨkar bolƣan bolsa, 28 wǝ ⱪilƣan gunaⱨi uningƣa bildürülsǝ, ɵzi ⱪilƣan gunaⱨi üqün ⱪurbanliⱪ ⱪilixⱪa bir ǝyibsiz qixi oƣlaⱪ kǝltürsun. 29 U gunaⱨ ⱪurbanliⱪi bolidiƣan ⱨaywanning bexiƣa ɵz ⱪolini ⱪoyup, andin gunaⱨ ⱪurbanliⱪi bolƣan bu ⱨaywanni kɵydürmǝ ⱪurbanliⱪ bolidiƣan ⱨaywanlarning boƣuzlinidiƣan jayiƣa elip berip boƣuzlisun. 30 Andin keyin kaⱨin uning ⱪenidin barmiⱪi bilǝn azƣinǝ elip, uni kɵydürmǝ ⱪurbanliⱪ ⱪurbangaⱨining münggüzlirigǝ sürüp ⱪoysun wǝ uning ⱪalƣan ⱨǝmmǝ ⱪenini ⱪurbangaⱨning tüwigǝ tɵksun. 31 Amanliⱪ ⱪurbanliⱪi bolidiƣan ⱨaywanning yeƣini qiⱪarƣandǝk, kaⱨin buningmu ⱨǝmmǝ yeƣini qiⱪirip, Pǝrwǝrdigarning aldiƣa hux puraⱪ kǝltürüxi üqün, uni ⱪurbangaⱨning üstidǝ kɵydürsun. Bu tǝriⱪidǝ kaⱨin uning üqün kǝfarǝt kǝltürsǝ, u gunaⱨ uningdin kǝqürülidu. 32 Əgǝr bir kixi gunaⱨ ⱪurbanliⱪi üqün bir ⱪoza kǝltürüxni halisa, ǝyibsiz bir qixi ⱪozini kǝltürsun. 33 U gunaⱨ ⱪurbanliⱪi bolƣan ⱪozining bexiƣa ɵz ⱪolini ⱪoyup, kɵydürmǝ ⱪurbanliⱪ bolidiƣan ⱨaywanlar boƣuzlinidiƣan jayƣa elip berip, uni gunaⱨ ⱪurbanliⱪi üqün boƣuzlisun. 34 Andin keyin kaⱨin gunaⱨ ⱪurbanliⱪi bolƣan ⱨaywanning ⱪenidin barmiⱪi bilǝn azƣinǝ elip, kɵydürmǝ ⱪurbanliⱪ ⱪurbangaⱨining münggüzlirigǝ sürüp ⱪoysun wǝ uning ⱪalƣan ⱨǝmmǝ ⱪenini ⱪurbangaⱨning tüwigǝ tɵksun. 35 Amanliⱪ ⱪurbanliⱪi bolidiƣan ⱪozining yeƣini qiⱪarƣandǝk kaⱨin buningmu ⱨǝmmǝ yeƣini qiⱪirip, uni ⱪurbangaⱨta Pǝrwǝrdigarƣa atalƣan otta kɵydürülidiƣan baxⱪa ⱨǝdiyǝ-ⱪurbanliⱪlar üstigǝ ⱪoyup kɵydürsun. Bu tǝriⱪidǝ kaⱨin uning ⱪilƣan gunaⱨi üqün kǝfarǝt kǝltürsǝ, u gunaⱨ uningdin kǝqürülidu.