1 Əgǝr bir kixi bir amanliⱪ ⱪurbanliⱪi kǝltüridiƣan bolup, buni kalilardin sunuxni halisa, u Pǝrwǝrdigarning aldiƣa ǝyibsiz bir ǝrkǝk yaki qixi ⱨaywanni kǝltürsun.

2 U ⱪurbanliⱪ ⱪilidiƣan bu ⱨaywanning bexiƣa ɵz ⱪolini ⱪoyup, andin uni uqrixix qedirining kirix eƣizi yenida boƣuzlisun. Andin keyin Ⱨarunning oƣulliri, yǝni kaⱨinlar, ⱪenini ⱪurbangaⱨning qɵrisigǝ qaqsun. ^◼   3 U bu amanliⱪ ⱪurbanliⱪidin üqǝy-baƣirlirini ⱪapliƣan yaƣ wǝ ⱪalƣan iq yeƣining ⱨǝmmisini elip, 4 ikki bɵriki wǝ ularning üstidiki ikki yanpixidiki yaƣni ajritip, jigǝrning üstidiki qawa yaƣnimu bɵrǝk bilǝn ⱪoxup kesiwelip, otta kɵydürülidiƣan ⱪurbanliⱪ süpitidǝ elip kǝlsun. 5 Ⱨarunning oƣulliri bolsa bu nǝrsilǝrni ⱪurbangaⱨning üstigǝ kǝltürüp, ot üstigǝ ⱪoyulƣan otunning üstidiki kɵydürmǝ ⱪurbanliⱪⱪa ⱪoxup kɵydürsun. Bu otta kɵydürülidiƣan, Pǝrwǝrdigarning aldiƣa hux puraⱪ kǝltüridiƣan ⱪurbanliⱪ bolidu.

6 Əgǝr bir kixi uxxaⱪ maldin Pǝrwǝrdigar üqün bir amanliⱪ ⱪurbanliⱪi kǝltürüxni halisa, u ǝyibsiz bir ǝrkǝk yaki qixi ⱨaywanni elip kǝlsun.

7 Əgǝr uning ⱪurbanliⱪi bir ⱪoy bolsa uni Pǝrwǝrdigarning aldiƣa kǝltürüp, 8 ⱪurbanliⱪ ⱪilidiƣan bu ⱨaywanning bexiƣa ɵz ⱪolini ⱪoysun, andin uni ibadǝt qedirining kirix eƣizining yenida boƣuzlisun. Andin keyin Ⱨarunning oƣulliri ⱪenini elip, ⱪurbangaⱨning qɵrisigǝ qaqsun. 9 Bu amanliⱪ ⱪurbanliⱪining yaƣliⱪ ⱪuyruⱪini omurtⱪidin pütün ajritiwelip, üqǝy-baƣirlirini ⱪapliƣan yaƣ wǝ ⱪalƣan iq yeƣinimu elip, 10 ikki bɵriki wǝ ularning üstidiki ikki yanpixidiki yaƣni ajritip, jigǝrning üstidiki qawa yaƣnimu bɵrǝk bilǝn ⱪoxup kesiwelip, Pǝrwǝrdigar üqün otta kɵydürülidiƣan ⱪurbanliⱪ süpitidǝ elip kǝlsun. 11 Kaⱨin bu nǝrsilǝrni ⱪurbangaⱨning üstidǝ kɵydürsun. Bu Pǝrwǝrdigarƣa atalƣan ta’am ⱨǝdiyǝsi bolup, otta kɵydürülidiƣan ⱪurbanliⱪ bolidu.

12 Əgǝr bir kixi bir ɵqkǝ ⱪurbanliⱪ ⱪilixni halisa, buni Pǝrwǝrdigarning aldiƣa kǝltürüp, 13 uning bexiƣa ɵz ⱪolini ⱪoyup, andin uni uqrixix qedirining aldida boƣuzlisun. Andin keyin Ⱨarunning oƣulliri ⱪenini elip ⱪurbangaⱨning qɵrisigǝ qaqsun. 14 Ⱪurbanliⱪ ⱪilƣuqi bu ⱪurbanliⱪtin üqǝy-baƣirlirini ⱪapliƣan yaƣ wǝ ⱪalƣan iq yeƣini elip, 15 ikki bɵriki wǝ ularning üstidiki ikki yanpixidiki yaƣni ajritip, jigǝrning üstidiki qawa yaƣnimu bɵrǝk bilǝn ⱪoxup kesiwelip, Pǝrwǝrdigar üqün otta kɵydürülidiƣan ⱪurbanliⱪ süpitidǝ elip kǝlsun. 16 Kaⱨin bu nǝrsilǝrni ⱪurbangaⱨning üstidǝ kɵydürsun. Bu otta kɵydürülidiƣan ta’am ⱨǝdiyǝsi bolup, hux puraⱪ kǝltüridiƣan ⱪurbanliⱪ bolidu. Yaƣning ⱨǝmmisi Pǝrwǝrdigar üqündur. 17 Silǝr turidiƣan ⱨǝmmǝ jayliringlarda yaƣ wǝ ⱪan yemǝslikinglar kerǝk. Bu silǝr üqün nǝsildin nǝsilgǝ mǝnggülük ⱪanun-bǝlgilimǝ bolidu›».