1 Pǝrwǝrdigarning buyruⱪi boyiqǝ muⱪǝddǝs jayning ⱨǝmmǝ ixlirini toƣra ⱪilix üqün Pǝrwǝrdigar ⱨekmǝt wǝ ǝⱪil-parasǝt ata ⱪilƣan barqǝ baxⱪa ⱨünǝrwǝnlǝrmu, Bezalǝl wǝ Oⱨoliyabⱪa ⱪoxulup bu ixni ⱪilsun». 2 Musa, Bezalǝl wǝ Oⱨoliyabni, xundaⱪla Pǝrwǝrdigar ⱨekmǝt bilǝn kɵngüllirini toldurƣan ⱨǝmmǝ ⱨünǝrwǝnlǝrni wǝ bu ixni ⱪilixⱪa kɵngli tartⱪanlarning ⱨǝmmisini qaⱪirip yiƣdi.

3 Ular kelip, muⱪǝddǝs jayni yasax üqün Bǝni Isra’il elip kǝlgǝn ⱨǝmmǝ ⱨǝdiyǝlǝrni Musadin tapxuruwaldi. Hǝlⱪ bolsa ⱨǝr ǝttigǝnliki Musaƣa ɵz ihtiyari bilǝn ⱨǝdiyǝ kǝltürüp turatti. 4 Muⱪǝddǝs jayning ⱨǝmmǝ ixlirini ⱪiliwatⱪan ustilarning ⱨǝmmisi ixini tohtitip, 5 Musaning aldiƣa kelip: «Hǝlⱪ elip kǝlgǝn nǝrsilǝr Pǝrwǝrdigar bizgǝ ⱪilixni buyruƣan ixni pütküzüxkǝ lazim bolƣinidin exip kǝtti» deyixti. 6 Musa buyrup, bargaⱨta: «Əmdi ⱨeq ǝr yaki ayal yǝnǝ muⱪǝddǝs jay üqün ⱨǝdiyǝ tǝyyarlimisun» dǝp jakarlatti. Buning bilǝn hǝlⱪ ⱨǝdiyǝlǝr elip kelixtin tohtitildi. 7 Qünki yiƣⱪan nǝrsilǝr ⱪilinidiƣan ix üqün yetip axⱪudǝk idi.

8 Yasax ixini ⱪiliwatⱪan maⱨir ustilar ibadǝt qedirining on pǝrdisini tallanƣan aⱪ kǝndir yiptin wǝ kɵk, sɵsün wǝ toⱪ ⱪizil rǝnglik yiptin nǝpis toⱪulƣan rǝhttin yasap, usta ⱨünǝrwǝnning ⱪoli bilǝn uningƣa kerublarning süritini kǝxtilǝp qiⱪti. 9 Ⱨǝrbir pǝrdining uzunluⱪi yigirmǝ sǝkkiz gǝz, kǝngliki tɵt gǝz idi. Ⱨǝmmǝ pǝrdilǝr ohxax ɵlqǝmdǝ idi. 10 Bu pǝrdilǝrning bǝxi bir-birigǝ ulandi, ⱪalƣan bǝx pǝrdimu bir-birigǝ ulandi. 11 Ulaxⱪan birinqi pǝrdining ǝng qetidiki parqisining tutixidiƣan yan tǝripigǝ kɵk rǝnglik izmǝ ⱪadilip, ikkinqi ulaxⱪan pǝrdining ǝng qetidiki parqisining tutixidiƣan yan tǝripigimu izmǝ ⱪadaldi. 12 Bir pǝrdining yan tǝripigǝ ǝllik izmǝ, yǝnǝ bir pǝrdining ǝng qetidiki parqisining tutixidiƣan yan tǝripigǝ ǝllik izmǝ ⱪadaldi. Bu izmilǝr bir-birining udulida ornitildi. 13 Ibadǝt qediri bir pütün bolsun dǝp altundin ǝllik ilmǝk yasaldi wǝ pǝrdilǝr bu ilmǝklǝr bilǝn bir-birigǝ tutaxturuldi.

14 Ibadǝt qedirini yepix üqün ɵqkǝ yungidin yopuⱪlar yasaldi. Xundaⱪ yupuⱪlardin on bir danǝ yasaldi. 15 Ⱨǝrbir yopuⱪning uzunluⱪi ottuz gǝz, kǝngliki tɵt gǝz idi. On bir yopuⱪning ⱨǝmmisi ohxax ɵlqǝmdǝ idi. 16 Bu yopuⱪlarning bǝxi bir ⱪilinip ulandi. Ⱪalƣan altǝ yopuⱪmu bir ⱪilinip ulandi. 17 Ulaxⱪan birinqi yopuⱪning qetidiki parqisining yan tǝripigǝ ǝllik izmǝ, ikkinqi ulaxⱪan yopuⱪning qetidiki parqisining yan tǝripigimu ǝllik izmǝ ⱪadaldi. 18 Ikki ulaxⱪan yopuⱪni bir-birigǝ ulap bir pütün ⱪilix üqün, mistin ǝllik ilmǝk yasaldi.

19 Buningdin baxⱪa, qedirni ⱪaplax üqün ⱪizil boyalƣan ⱪoqⱪar terisidin bir yopuⱪ wǝ yǝnǝ uning üstigǝ ⱪoyulidiƣan delfin terisidin bir yopuⱪ yasaldi.

20 Ibadǝt qedirining tahtayliri akatsiyǝ yaƣiqidin yasilip tiklǝndi. 21 Ⱨǝr tahtayning uzunluⱪi on gǝz, kǝngliki bir yerim gǝz idi. 22 Ⱨǝrbir tahtayning ikki uliƣuqi bar bolup, ⱨǝr ikki tahtay xular bilǝn bir-birigǝ tutaxti. Ibadǝt qedirining ⱨǝmmǝ tahtayliri xundaⱪ yasaldi. 23 Ibadǝt qedirining tahtayliri mundaⱪ ⱪilindi: yigirmisi jǝnubⱪa ⱪarap jǝnub tǝripigǝ ornitildi. 24 Bu yigirmǝ tahtayning tegigǝ kümüxtin ⱪiriⱪ put yasaldi. Ⱨǝrbir tahtayning astiƣa ikki uliƣuq üqün ikkidin put ornitildi. 25 Xuningdǝk ibadǝt qedirining yǝnǝ bir tǝripigǝ, yǝni ximal tǝripigǝ yigirmǝ tahtay ornitildi. 26 Bular üqünmu kümüxtin ⱪiriⱪ put yasaldi. Ⱨǝrbir tahtayning tegigǝ ikkidin put orunlaxturuldi. 27 Ibadǝt qedirining kǝyni tǝripigǝ, yǝni ƣǝrbkǝ ⱪaraydiƣan tǝripigǝ, altǝ tahtay ⱪoyuldi. 28 Ibadǝt qedirining kǝyni tǝripidiki ikki bulungƣa ikki tahtay yasaldi. 29 Bularning ⱨǝrbiri astidin üstigiqǝ ⱪoxulup birlǝxtürüldi. Ularning uqi bir ⱨalⱪa bilǝn tutaxturuldi. Ikkisi xundaⱪ ⱪilinip, ikki bulungƣa ⱪoyuldi. 30 Bu tǝriⱪidǝ sǝkkiz tahtay boldi. Ⱨǝrbir tahtayning tegigǝ ikkidin put ⱨesabida jǝm’iy on altǝ danǝ kümüx put boldi. 31 Buningdin baxⱪa, akatsiyǝ yaƣiqidin yaƣaq baldaⱪlar yasaldi. Ibadǝt qedirining bir tǝripidiki tahtaylar üqün bǝx baldaⱪ, 32 ibadǝt qedirining yǝnǝ bir tǝripidiki tahtaylar üqünmu bǝx danǝ baldaⱪ wǝ ibadǝt qedirining kǝyni tǝripidiki ƣǝrb tǝripidiki tahtaylar üqünmu bǝx danǝ baldaⱪ tǝyyarlandi. 33 Tahtaylarning otturisida turidiƣan ottura baldaⱪ bir qetidin yǝnǝ bir qetigǝ yǝtküzülüp yasaldi. 34 Tahtaylar altun bilǝn ⱪaplandi. Baldaⱪlar ɵtküzülidiƣan ⱨalⱪilar altundin yasaldi. Baldaⱪlarmu altun bilǝn ⱪaplandi.

35 Kɵk, sɵsün, toⱪ ⱪizil rǝnglik yip wǝ aⱪ kǝndir yiptin nǝpis toⱪulƣan bir ayrima pǝrdǝ yasaldi. Uningƣa usta ⱨünǝrwǝnning ⱪoli bilǝn kerublarning süriti kǝxtilǝndi. 36 Uni esix üqün akatsiyǝ yaƣiqidin tɵt tüwrük yasilip, altun bilǝn ⱪaplandi. Ularning ilmǝkliri altundin yasaldi. Bu tüwrüklǝr üqün kümüxtin tɵt danǝ put ⱪuyulup yasaldi.

37 Qedirning kirix eƣizi üqün kɵk, sɵsün, toⱪ ⱪizil rǝnglik yip wǝ aⱪ kǝndir yiptin nǝpis toⱪulƣan wǝ kǝxtilǝngǝn bir pǝrdǝ yasaldi. 38 Bu pǝrdǝ üqün bǝx tüwrük wǝ ularning ilmǝkliri yasaldi. Tüwrüklǝrning baxliri wǝ ularning ulax tayaⱪliri altun bilǝn ⱪaplandi. Tüwrüklǝrning tegigǝ ⱪoyulidiƣan bǝx danǝ put mistin yasaldi.