1 Musa Bǝni Isra’ilning pütün jama’itini yiƣip ularƣa mundaⱪ dedi: «Pǝrwǝrdigar silǝrgǝ ⱪilixni buyruƣan ǝmrlǝr xuki: 2 Altǝ kün iqidǝ ix ⱪilinsun, lekin yǝttinqi küni silǝr üqün muⱪǝddǝs kün bolup, Pǝrwǝrdigarƣa atalƣan aram alidiƣan xabat künidur. Kimki u kündǝ bir ix ⱪilsa, ɵltürülsun. 3 Silǝr mǝyli ⱪǝyǝrdǝ olturunglar, xabat küni ot yaⱪmanglar».

4 Musa Bǝni Isra’ilning pütün jama’itigǝ yǝnǝ mundaⱪ dedi: «Pǝrwǝrdigar buyrup eytⱪan ǝmr xuki: 5 Silǝr ɵz melinglardin Pǝrwǝrdigar üqün ⱨǝdiyǝ kǝltürünglar. Qin kɵnglidin berixni haliƣanlarning ⱨǝmmisi Pǝrwǝrdigar üqün ⱨǝdiyǝ elip kǝlsun. Ular altun, kümüx, mis, 6 kɵk, sɵsün wǝ toⱪ ⱪizil rǝnglik yip, aⱪ kǝndir yip, ɵqkǝ yungi, 7 ⱪizil boyalƣan ⱪoqⱪar terisi, delfin terisi, akatsiyǝ yaƣiqi, 8 qiraƣ üqün yaƣ, mǝsiⱨlǝx yeƣiƣa wǝ huxbuy isriⱪⱪa ixlitilidiƣan dora-dǝrmǝklǝr, 9 ⱨeⱪiⱪ taxliri wǝ efod wǝ kɵkrǝklikkǝ ⱪoyulidiƣan baxⱪa esil taxlarni kǝltürsun. 10 Aranglardiki ⱨǝmmǝ ⱨünǝrwǝn ustilar kelip, Pǝrwǝrdigar buyruƣanning ⱨǝmmisini yasisun: 11 ibadǝt qediri wǝ uning yopuⱪi, ilmǝkliri, tahtayliri, ottura yaƣaq baldaⱪliri, tüwrükliri wǝ putliri, 12 sanduⱪ wǝ uning kɵtürüx hadiliri, mǝrⱨǝmǝt tǝhti wǝ uning aldiƣa kirixni tosup turidiƣan ayrima pǝrdǝ, 13 xirǝ wǝ uning kɵtürüx hadiliri, ⱨǝmmǝ ⱪaqa-ⱪuqiliri wǝ Hudaƣa atalƣan nanlar, 14 qiraƣdan wǝ uning ǝswabliri, qiraƣliri wǝ qiraƣ yeƣi, 15 huxbuygaⱨ wǝ uning kɵtürüx hadiliri, mǝsiⱨlǝx yeƣi wǝ huxbuy isriⱪ, ibadǝt qedirining kirix eƣizidiki pǝrdǝ, 16 kɵydürmǝ ⱪurbanliⱪ ⱪurbangaⱨi wǝ uning mis xalasini, kɵtürüx hadiliri wǝ ⱨǝmmǝ ǝswab-jabduⱪliri, das wǝ uning tǝgliki, 17 ⱨoylining pǝrdiliri wǝ uning tüwrükliri wǝ putliri, ⱨoylining dǝrwazisidiki pǝrdǝ, 18 ibadǝt qedirining ⱪozuⱪliri, ⱨoylining ⱪozuⱪliri wǝ taniliri, 19 muⱪǝddǝs jayning hizmiti üqün lazim bolidiƣan kiyimlǝr, yǝni kaⱨin Ⱨarunning muⱪǝddǝs kiyimi wǝ uning oƣullirining kaⱨinliⱪ kiyimlirini tǝyyarlisun». 20 Bǝni Isra’ilning pütün jama’iti Musaning yenidin qiⱪip kǝtti.

21 Andin keyin kɵngli tartⱪanlar wǝ roⱨidin riƣbǝtlǝngǝnlǝrning ⱨǝmmisi ⱪaytip kelip, uqrixix qedirining yasilixi üqün wǝ uning ⱨǝmmǝ ixi wǝ muⱪǝddǝs kiyimlǝr üqün Pǝrwǝrdigarƣa ⱨǝdiyǝ kǝltürdi. 22 Qin kɵnglidin berixni haliƣan ǝr wǝ ayallar kelip, ⱨǝdiyǝ kǝltürdi. Ular bilǝzük, zirǝ, üzük, zunnar ⱪatarliⱪ altun buyumlarni elip kǝldi. Pǝrwǝrdigar üqün altun ⱨǝdiyǝ bǝrmǝkqi bolƣanlarning ⱨǝmmisi altun elip kǝldi. 23 Kɵk, sɵsün, toⱪ ⱪizil rǝnglik yip wǝ aⱪ kǝndir yip, ɵqkǝ yungi, ⱪizil boyalƣan ⱪoqⱪar terisi wǝ delfin terisi barlar ularni elip kǝldi. 24 Kümüx yaki mistin ⱨǝdiyǝ kǝltürǝlǝydiƣanlar uni Pǝrwǝrdigarƣa ⱨǝdiyǝ ⱪilip kǝltürdi. Muⱪǝddǝs jayning ixliriƣa yariƣudǝk akatsiyǝ yaƣiqi barlarmu uni elip kǝldi.

25 Ⱨǝmmǝ ⱪoli qewǝr ayallar ɵz ⱪolliri bilǝn qaⱪ egirip, ɵzliri egirgǝn kɵk, sɵsün, toⱪ ⱪizil rǝnglik yip wǝ aⱪ kǝndir yip kǝltürdi. 26 Kɵngli tartⱪan qewǝr ayallarning ⱨǝmmisi ɵqkǝ yungi egirdi.

27 Jama’ǝtning baxliⱪliri bolsa, efod wǝ kɵkrǝklikkǝ ornitilidiƣan ⱨeⱪiⱪ texi wǝ baxⱪa esil taxlar, 28 dora-dǝrmǝklǝr wǝ qiraƣⱪa, mǝsiⱨlǝxkǝ wǝ huxbuy isriⱪⱪa ixlitilidiƣan yaƣ kǝltürdi.

29 Bu tǝriⱪidǝ Bǝni Isra’ilning iqidin Pǝrwǝrdigar Musa arⱪiliⱪ buyruƣan ixliri üqün, kɵngli tartⱪan ǝr-ayallarning ⱨǝmmisi Pǝrwǝrdigarƣa ɵz ihtiyari bilǝn ⱨǝdiyǝ elip kǝldi.

30 Musa Bǝni Isra’ilƣa mundaⱪ dedi: «Mana, Pǝrwǝrdigar Yǝⱨuda ⱪǝbilisidin Hurning nǝwrisi, Urining oƣli Bezalǝlni ismini atap qaⱪirip, 31 uni Hudaning Roⱨi bilǝn toldurup, uningƣa ⱨekmǝt, ǝⱪil-parasǝt wǝ bilim ata ⱪilip, ⱨǝr hil ⱨünǝrgǝ maⱨir ⱪildi. 32 U altun, kümüx wǝ mistin yasilidiƣan buyumlarni layiⱨilǝp, 33 taxlarni oyup ornitix, yaƣaqⱪa nǝⱪix oyux wǝ ⱨünǝr-sǝn’ǝt buyumlirini yasaxⱪa maⱨir boldi. 34 Pǝrwǝrdigar uning kɵngligǝ wǝ Dan ⱪǝbilisidin Aⱨisamaⱪning oƣli Oⱨoliyabning kɵngligimu, baxkilarƣa ⱨünǝr ɵgitixni selip, 35 ularning kɵngüllirini ⱨekmǝt bilǝn toldurup, ularni ⱨǝr hil nǝⱪⱪax-oymiqiliⱪⱪa, kɵk, sɵsün, toⱪ ⱪizil rǝnglik yip wǝ aⱪ kǝndir yip bilǝn kǝxtǝ tikix wǝ rǝht toⱪuxⱪa maⱨir ⱪildi. Ular ⱨǝr hil ⱨünǝr-sǝn’ǝt ixliri ⱪilalaydiƣan wǝ ijadiy layiⱨilǝrni oylap qiⱪalaydiƣan adǝmlǝr.