1 Pǝrwǝrdigar Musaƣa: «Sǝn awwalⱪisidǝk ɵzüng üqün taxtin ikki tahta yonup yasiƣin. Mǝn bu tahtilarƣa sǝn ilgiri qeⱪiwǝtkǝn tahtilardiki sɵzlǝrni yezip ⱪoyimǝn. 2 Ətigǝngiqǝ tǝyyar bolup, sǝⱨǝrdǝ Sinay teƣiƣa qiⱪip, u yǝrdǝ taƣning qoⱪⱪisida Mening aldimda ⱨazir bolƣin. 3 Lekin ⱨeq kixi sǝn bilǝn billǝ qiⱪmisun wǝ taƣning ⱨeqⱪandaⱪ yeridǝ baxⱪa kixi kɵrünmisun. Ⱪoy-kalimu taƣⱪa yeⱪin otlimisun» dedi.

4 Musa taxtin awwalⱪisidǝk ikki tahtini yonup, ǝtisi sǝⱨǝr ⱪopup bu ikki tax tahtisini ⱪoliƣa elip, Pǝrwǝrdigarning buyruⱪi boyiqǝ Sinay teƣiƣa qiⱪti.

5 Pǝrwǝrdigar bulut tüwrükidǝ qüxüp, u yǝrgǝ Musaning yeniƣa kelip, «Yaⱨwǝⱨ» degǝn namini jakarlidi. 6 Pǝrwǝrdigar u yǝrdǝ uning aldidin ɵtüp: «Pǝrwǝrdigar, Pǝrwǝrdigar, rǝⱨimdil wǝ xǝpⱪǝtlik, asan ƣǝzǝplǝnmǝydiƣan Huda, mǝrⱨǝmiti wǝ wapadarliⱪi kǝngdur. ^◼   7 U mingliƣanlarƣa meⱨir-xǝpⱪǝt kɵrsǝtküqi, yamanliⱪ, asiyliⱪ wǝ gunaⱨlarni kǝqürgüqidur. Lekin gunaⱨkarlarni ⱨǝrgiz jazasiz ⱪoymaydu, bǝlki baliliri wǝ nǝwrilirigǝ, ⱨǝtta üqinqi-tɵtinqi nǝsligiqǝ ata-bowiliri ⱪilƣan gunaⱨlirining aⱪiwitini kǝltüridu» dǝp jakarlidi.

8 Xuning bilǝn Musa dǝrⱨal yǝrgǝ bax ⱪoyup sǝjdǝ ⱪilip: 9 «Əy Rǝbbim, ǝgǝr mǝn nǝziringdǝ iltipat tapⱪan bolsam, Sǝn, ǝy Rǝbbim, Sǝndin ɵtünǝyki, biz bilǝn billǝ barƣaysǝn. Bu hǝlⱪning boyni ⱪattiⱪ bolsimu, Sǝn Ɵzüng hata wǝ gunaⱨlirimizni kǝqürgǝysǝn. Bizni Ɵz mirasing boluxⱪa ⱪobul ⱪilƣaysǝn» dedi. 10 Xuning bilǝn Pǝrwǝrdigar mundaⱪ dedi: «Mana, Mǝn bir ǝⱨdǝ tüzimǝn. Sening ⱨǝmmǝ hǝlⱪingning aldida ⱨeqbir yǝrdǝ wǝ ⱨeqbir hǝlⱪning arisida kɵrülmigǝn mɵjizilǝrni kɵrsitimǝn. Sǝn arisida bolƣan hǝlⱪning ⱨǝmmisi Pǝrwǝrdigarning karamǝt ixini kɵridu, qünki Mening silǝrgǝ ⱪilidiƣinim ⱨǝywǝtlik ix bolidu. 11 Mǝn bügün silǝrgǝ beridiƣan ǝmrlirimgǝ ǝmǝl ⱪilinglar. Mana, Mǝn Amoriylar, Kǝn’aniylar, Hittiylar, Pǝrizziylǝr, Hiwwiylar wǝ Yǝbusiylarni silǝrning aldinglardin ⱨǝydǝp qiⱪirimǝn. 12 Əmdi eⱨtiyat ⱪilinglarki, silǝr baridiƣan zeminning hǝlⱪi bilǝn ǝⱨdǝ tüzmǝnglar. Qünki bu silǝrgǝ tuzaⱪ boluxi mumkin. 13 Xuning üqün silǝr ularning ⱪurbangaⱨlirini yiⱪitip, but tüwrüklirini sundurup Axera mǝbudilirini qeⱪiwetinglar. ^◼   14 ‹Ⱪizƣanƣuqi› dǝp nami bolƣan Pǝrwǝrdigar ⱪizƣinidiƣan Huda bolƣini üqün, baxⱪa ⱨeqⱪandaⱪ ilaⱨⱪa sǝjdǝ ⱪilmanglar. 15 U zeminning hǝlⱪi bilǝn ⱨeq ǝⱨdimu tüzmǝnglar. Bolmisa, ular ɵz ilaⱨlirining kǝynidin yürüp, buzuⱪqiliⱪ ⱪilip, ɵz ilaⱨliri üqün ⱪurbanliⱪ ɵtküzgǝndǝ silǝrni qaⱪiridiƣan bolidu wǝ xuning bilǝn silǝr ularning ⱪurbanliⱪliridin yǝydiƣan bolup ketisilǝr. 16 Buningdin baxⱪa, silǝr ularning ⱪizlirini oƣulliringlar üqün hotunluⱪⱪa elip bǝrsǝnglar, bu ⱪizliri ɵz ilaⱨlirining kǝynidin yürüp buzuⱪqiliⱪ ⱪilip, silǝrning oƣulliringlarnimu ɵz ilaⱨlirining arⱪisidin mangƣuzup buzuⱪqiliⱪ ⱪilduridu.

17 Ɵzünglar üqün oyma butlar yasimanglar.

18 Petir nan ⱨeytini ɵtküzünglar. Abib eyida Misir zeminidin qiⱪⱪininglar üqün Mening buyruƣinimdǝk Abib eyining bekitilgǝn waⱪtida yǝttǝ kün petir nan yǝnglar.

19 Baliyatⱪuni aqⱪanning ⱨǝmmisi manga mǝnsuptur. Qarwa malliringning iqidin mǝyli kala, mǝyli ⱪoy bolsun, tunji bolup tuƣulƣan ǝrkǝklǝrning ⱨǝmmisi Manga mǝnsup bolidu. 20 Lekin exǝklǝrning tunji tǝhǝylirining orniƣa ⱪoy bǝrmǝk lazim bolidu. Əgǝr orniƣa ⱪoy bǝrmisǝng, uning boynini sunduruwǝtkin. Pütün tünji tuƣulƣan oƣulliringning orniƣa bǝdǝl tɵlǝp bǝrgin. Ⱨeqkim Mening aldimƣa ⱪuruⱪ ⱪol kǝlmisun.

21 Sǝn altǝ kün ix ⱪilƣin, lekin yǝttinqi küni, mǝyli ⱨǝydǝx waⱪti bolsun, mǝyli orma waⱪti bolsun, aram alƣin.

22 Tunji pixⱪan buƣday ormisi waⱪtida Ⱨǝptilǝr ⱨeytini ɵtküzgünglar wǝ yilning ahirida Ⱨosul yiƣix ⱨeytini ɵtküzünglar. ^◼  

23 Silǝrning ⱨǝmmǝ ǝr kixiliringlar yilda üq ⱪetim Isra’ilning Hudasi bolƣan Rǝb Pǝrwǝrdigarning aldiƣa ⱨazir bolsun. 24 Mǝn hǝlⱪlǝrni aldinglardin ⱨǝydiwetip, zemininglarni kengǝytimǝn. Sǝn yilda üq ⱪetim Pǝrwǝrdigar Hudayinglarning aldiƣa ⱨazir bolux üqün qiⱪsanglar, ⱨeqkim zemininglarƣa kɵz tikǝlmǝydu.

25 Manga kǝltüridiƣan ⱪurbanliⱪning ⱪenini, boldurulƣan hemirdin pixurulƣan nan bilǝn billǝ sunmiƣin wǝ Ɵtüp ketix ⱨeytining ⱪurbanliⱪidin ⱨeqnemini ǝtisigǝ ⱪaldurmiƣin.

26 Yeringning tunji pixⱪan zira’ǝtlirining esilini Pǝrwǝrdigar Hudayingning bǝytigǝ elip kǝlgin. Oƣlaⱪni anisining sütidǝ pixurmiƣin».

27 Pǝrwǝrdigar Musaƣa: «Bu sɵzlǝrni ɵzüng üqün yeziwalƣin, qünki bu sɵzlǝrni asas ⱪilip Mǝn sǝn wǝ Isra’il bilǝn ǝⱨdǝ tüzdüm» dedi. 28 Musa u yǝrdǝ Pǝrwǝrdigarning ⱨuzurida ⱪiriⱪ keqǝ-kündüz, nan yemǝy, su iqmǝy turdi. U yǝrdǝ Pǝrwǝrdigar tahtilarƣa ǝⱨdining sɵzliri bolƣan on ǝmrni yazdi.

29 Musa ikki xaⱨadǝt tahtisini ⱪoliƣa elip Sinay teƣidin qüxti. U ɵz qirayining Pǝrwǝrdigar bilǝn sɵzlǝxkini üqün parⱪirap kǝtkǝnlikini bilmǝytti. 30 Əmma Ⱨarun wǝ Bǝni Isra’ilning ⱨǝmmisi Musaning qirayining parⱪirap turƣinini kɵrüp, uningƣa yeⱪin berixtin ⱪorⱪti. 31 Lekin Musa ularni qaⱪirƣanda, Ⱨarun wǝ jama’ǝtning ⱨǝmmǝ baxliⱪliri uning aldiƣa kǝldi. Musa ularƣa sɵz ⱪildi. 32 Andin keyin Bǝni Isra’ilning ⱨǝmmisi yeⱪin kǝldi. Musa Pǝrwǝrdigar Sinay teƣida uningƣa sɵz ⱪilƣinida bǝrgǝn ⱨǝmmǝ ǝmrlǝrni ularƣa tapilidi. 33 Musa ularƣa sɵzlǝp bolƣandin keyin yüzigǝ yaƣliⱪ tartiwaldi. 34 Musa ⱨǝr ⱪetim Pǝrwǝrdigar bilǝn sɵzlixix üqün Uning ⱨuzuriƣa barƣanda, u yǝrdin yenip qiⱪⱪanƣa ⱪǝdǝr yaƣliⱪni eliwetǝtti. Yenip qiⱪⱪanda Pǝrwǝrdigar tǝripidin uningƣa berilgǝn buyruⱪlarni Bǝni Isra’ilƣa yǝtküzǝtti. 35 Bǝni Isra’il Musaning qirayining parⱪirap turƣinini kɵrǝtti. Xunga Musa, Pǝrwǝrdigar bilǝn sɵzlǝxkili Uning ⱨuzuriƣa barƣuqǝ, tǝkrar yüzigǝ yaƣliⱪ tartiwalatti.