1 Pǝrwǝrdigar Musaƣa: 2 «Sǝn Bǝni Isra’ilƣa: ‹Silǝr burulup, Migdol bilǝn dengizning otturisidiki Piⱨahirotning yenida, Ba’al-Zefonning udulida dengiz boyida qedir-bargaⱨ tikinglar› degin. 3 Xuning bilǝn Fir’ǝwn: ‹Bǝni Isra’il zeminda tenǝp yürüp eziⱪip ⱪaldi. Qɵl ularni ⱪorxiwaldi› dǝp hiyal ⱪilsun. 4 Fir’ǝwn ularning kǝynidin ⱪoƣlap qiⱪsun dǝp, Mǝn uning kɵnglini ⱪattiⱪ ⱪilip ⱪoyimǝn. Misirliⱪlarning Mening Pǝrwǝrdigar ikǝnlikimni bilixi üqün Fir’ǝwn wǝ pütün ⱪoxunining üstidǝ uluƣluⱪumni ayan ⱪilimǝn» dedi. Bǝni Isra’il xundaⱪ ⱪildi.

5 «U hǝlⱪ ⱪeqip kǝtti» dǝp Misirning padixaⱨiƣa hǝwǝr berilginidǝ, Fir’ǝwn wǝ hizmǝtkarlirining hǝlⱪⱪǝ ⱪarxi niyiti buzulup: «Bǝni Isra’ilni nemixⱪa hizmitimizdin ⱪutulup ketixigǝ yol ⱪoyduⱪ?» deyixti. 6 Xuning bilǝn u ⱨarwisini ⱪoxturup, ⱪoxunini elip yolƣa qiⱪti. 7 U altǝ yüz hillanƣan jǝng ⱨarwisi, xundaⱪla pütün Misirdiki jǝng ⱨarwilirini yiƣdurup, ularning ⱨǝmmisigǝ sǝrdarlarni olturƣuzup mangdi. 8 Pǝrwǝrdigar Misirning padixaⱨi Fir’ǝwnning kɵnglini ⱪattiⱪ ⱪilip ⱪoyƣini üqün, u Bǝni Isra’ilning kǝynidin ⱪoƣlidi. Bǝni Isra’il bolsa baturluⱪ bilǝn qiⱪip kǝtkǝnidi. ^◼   9 Misirliⱪlar, yǝni Fir’ǝwnning ⱨǝmmǝ at ⱨarwisi, atliⱪliri wǝ ⱪoxuni ularning kǝynidin ⱪoƣlap, dengiz boyidiki qedir-bargaⱨ tikkǝn jayda ularƣa yetixti. U yǝr Piⱨahirotning yenida, Ba’al-Zefonning udulida idi. 10 Fir’ǝwn yeⱪinlaxⱪanda, Bǝni Isra’il bexini kɵtürüp ⱪarisa, mana, Misirliⱪlar ularning arⱪisidin ⱪoƣlap keliwatatti! Buni kɵrgǝn Bǝni Isra’il ⱪattiⱪ ⱪorⱪup ketip, Pǝrwǝrdigarƣa pǝryad ⱪildi. 11 Ular Musaƣa: «Misirda gɵristan yoⱪtǝk Sǝn bizni qɵldǝ ɵlüx üqün bu yǝrgǝ elip kǝldingmu? Bizni Misirdin elip qiⱪip bu bizgǝ nemǝ ⱪilƣining? 12 Misirda turƣanda sanga: ‹Bizni tinq ⱪoyƣin, Misirliⱪlarƣa ⱪul bolup hizmǝt ⱪilayli› demigǝnmiduⱪ? Misirliⱪlarƣa ⱪul bolux qɵldǝ ɵlginimizdin yahxi» dedi. 13 Lekin Musa hǝlⱪⱪǝ: «Ⱪorⱪmay qing turunglar! Bügün Pǝrwǝrdigarning silǝrni ⱪutⱪuzuxini kɵrisilǝr. Qünki silǝr bügün kɵrgǝn Misirliⱪlarni ⱨǝrgiz yǝnǝ kɵrmǝysilǝr. 14 Pǝrwǝrdigar silǝr üqün jǝng ⱪilidu. Lekin silǝr xük turunglar» dedi.

15 Pǝrwǝrdigar Musaƣa: «Nemixⱪa Manga pǝryad ⱪilisǝn? Bǝni Isra’ilƣa: ‹Alƣa ilgirilǝnglar› dǝp eytⱪin. 16 Andin sǝn ⱨasangni kɵtürüp ⱪolungni dengiz tǝrǝpkǝ uzitip, uni ikkigǝ bɵlgin. Xundaⱪki, Bǝni Isra’il dengizning otturisidiki ⱪuruⱪ yǝrdin mengip ɵtüp kǝtsun. 17 Mana, Mǝn Ɵzüm, ularni ⱪoƣlisun dǝp, Misirliⱪlarning kɵngüllirini ⱪattiⱪ ⱪilip, Fir’ǝwn wǝ pütün ⱪoxuni, uning jǝng ⱨarwiliri wǝ atliⱪliri arⱪiliⱪ uluƣluⱪumni ayan ⱪilimǝn. 18 Mǝn uluƣluⱪumni Fir’ǝwn wǝ uning jǝng ⱨarwiliri wǝ atliⱪliri arⱪiliⱪ ayan ⱪilƣinimda, Misirliⱪlar Mening Pǝrwǝrdigar ikǝnlikimni bilidu» dedi. 19 Isra’ilning ⱪoxunining aldida mengiwatⱪan Hudaning Pǝrixtisi ǝmdi ularning kǝynigǝ ɵtti, ularning aldida mangƣan bulut tüwrükimu ularning kǝynigǝ yɵtkilip, 20 Misirliⱪlarning ⱪoxuni bilǝn Isra’ilning ⱪoxunining otturisiƣa berip tohtidi. Bu bulut bir tǝrǝpkǝ ⱪarangƣuluⱪ qüxürüp, yǝnǝ bir tǝrǝpni yorutti. Buning bilǝn pütün keqǝ ikki ⱪoxun bir-birigǝ yeⱪin kelǝlmidi. 21 Musa ⱪolini dengiz tǝrǝpkǝ uzatti. Pǝrwǝrdigar pütün keqǝ xǝrⱪ tǝrǝptin ⱪattiⱪ bir xamal qiⱪirip, dengizning süyini kǝynigǝ yandurux bilǝn dengizni ⱪuruⱪ yǝr ⱪildi. Xundaⱪ ⱪilip, su ikkigǝ bɵlündi. 22 Bu tǝriⱪidǝ Bǝni Isra’il dengizning otturisidiki ⱪuruⱪ yǝrdin mengip ɵtüp kǝtti. Sular bolsa ularning ong wǝ sol yenida tamdǝk kɵtürülüp, tohtap turƣanidi. 23 Misirliⱪlar bolsa ularni ⱪoƣlap, Fir’ǝwnning atliri, jǝng ⱨarwiliri wǝ atliⱪlirining ⱨǝmmisi ularning kǝynidin dengizning otturisiƣiqǝ bardi. 24 Lekin tang atⱪanda Pǝrwǝrdigar ot wǝ bulut tüwrüki iqidin Misirliⱪlarning ⱪoxuniƣa ⱪarap, Misirliⱪlar arisiƣa bir ⱪalaymiⱪanqiliⱪ selip, 25 ⱨarwilirining qaⱪlirini qiⱪiriwetip, ularning mengixini müxkül ⱪildi. Misirliⱪlar: «Yürünglar, Isra’ildin ⱪaqayli. Qünki Pǝrwǝrdigar ular üqün Misirliⱪlarƣa ⱪarxi jǝng ⱪiliwatidu» deyixti. 26 Pǝrwǝrdigar Musaƣa: «Sular yenip Misirliⱪlar wǝ ularning jǝng ⱨarwiliri wǝ atliⱪlirining üstigǝ aⱪsun dǝp, ⱪolungni dengizning üstigǝ uzatⱪin» dedi. 27 Musa ⱪolini dengizning üstigǝ uzatti. Xuning bilǝn tang atⱪanda dengizning süyi yǝnǝ ɵz ⱨaliƣa yenip kǝldi. Ⱪaqⱪan Misirliⱪlar uningƣa uqriƣanda Pǝrwǝrdigar Misirliⱪlarni dengizning otturisida mollaⱪ atⱪuzdi. 28 Su ⱪaytip kelip, Isra’ilni ⱪoƣlap dengizƣa kirgǝn Fir’ǝwnning jǝng ⱨarwiliri wǝ atliⱪlarni, dǝrwǝⱪǝ pütün ⱪoxunlirini ƣǝrⱪ ⱪildi. Ularning iqidin birimu saⱪ ⱪalmidi. 29 Lekin Bǝni Isra’il dengizning otturisidin ⱪuruⱪ yǝrdin mengip qiⱪip kǝtti. Su ularning ong yeni wǝ sol yenida tamdǝk kɵtürülüp tohtap turƣanidi. 30 Bu tǝriⱪidǝ Pǝrwǝrdigar u küni Bǝni Isra’ilni Misirliⱪlarning ⱪolidin ⱪutⱪuzdi. Isra’iliylar dengiz boyida Misirliⱪlarning jǝsǝtlirini kɵrdi. 31 Isra’il Pǝrwǝrdigarning Misirliⱪlarni uluƣ ⱪudriti bilǝn urƣinini kɵrüp, Pǝrwǝrdigardin ⱪorⱪup, Pǝrwǝrdigar wǝ uning hizmǝtkari Musaƣa ixǝndi.