1 Pǝrwǝrdigar Musaƣa sɵz ⱪilip: 2 «Mǝyli insanning bolsun yaki ⱨaywanning bolsun, Bǝni Isra’ilning arisida tuƣulup baliyatⱪuni aqⱪan ⱨǝr tunji ǝrkǝkni Manga atanglar, qünki u Manga mǝnsuptur» dedi. ^◼   3 Musa hǝlⱪⱪǝ: «Silǝr Misirdin qiⱪip, u ⱪulluⱪ ɵyidin kǝtkǝn bu künni esinglarda tutunglar, qünki Pǝrwǝrdigar silǝrni u yǝrdin ⱪudrǝtlik ⱪoli bilǝn elip qiⱪti. Xuning üqün ⱨeq boldurulƣan hemirdin pixurulƣan nan yeyilmisun. 4 Abib eyining bu küni qiⱪidiƣan boldunglar. 5 Əmdi Pǝrwǝrdigar silǝrgǝ berixkǝ ata-bowiliringlarƣa ⱪǝsǝm ⱪilƣan, süt bilǝn ⱨǝsǝl eⱪip turidiƣan zeminƣa, yǝni Kǝn’aniylar, Hittiylar, Amoriylar, Hiwwiylar wǝ Yǝbusiylarning zeminiƣa silǝrni elip barƣinida muxu ayda bu murasimni ɵtküzisilǝr. 6 Yǝttǝ küngiqǝ petir nan yǝp, yǝttinqi küni Pǝrwǝrdigarning ⱨeytini ɵtküzisilǝr. 7 Yǝttǝ kün petir nan yeyilsun. Boldurulƣan hemirdin pixurulƣan nan aranglarda tepilmisun. Pütün zeminingda ⱨeq hemirturuq tepilmisun. 8 U kündǝ sǝn ɵz oƣlungƣa: ‹Misirdin qiⱪⱪinimda Pǝrwǝrdigar manga kɵrsǝtkǝn iltipatini ǝslǝx üqün buni ⱪilimǝn› dǝp eytip bǝrgin. 9 Pǝrwǝrdigarning ⱪanunining aƣzinglarda turuxi üqün, bu bǝlgilimǝ ⱪolungƣa ⱪoyulƣan bir bǝlgǝ wǝ kɵzliring otturisida turƣan bir yadikar bolsun. Qünki Pǝrwǝrdigar silǝrni ⱪudrǝtlik ⱪoli bilǝn Misirdin elip qiⱪti. ^◼   10 Əmdi bekitilgǝn waⱪitta yilmu-yil bu bǝlgilimigǝ ri’ayǝ ⱪilinglar. 11 Pǝrwǝrdigar silǝrgǝ wǝ ata-bowiliringlarƣa ⱪǝsǝm ⱪilƣinidǝk silǝrni Kǝn’aniylarning zeminiƣa elip berip, uni silǝrgǝ bǝrgǝndin keyin, 12 baliyatⱪuni aqⱪan ⱨǝmmisini Pǝrwǝrdigarƣa atixing kerǝk, xundaⱪla qarwa malliringning ⱨǝmmǝ tunji ǝrkǝklirimu Pǝrwǝrdigarƣa mǝnsup bolsun. 13 Əmma exǝklǝrning ⱨǝmmǝ tunjilirining orniƣa birdin ⱪoza berisǝn. Əgǝr uning orniƣa bir nǝrsǝ bǝrmisǝng, uning boynini sunduruwǝtkin. Əmma insanning ⱨǝmmǝ tunjiliri orniƣa bǝdǝl tɵlixing kerǝk. 14 Keyinki künlǝrdǝ oƣlung sǝndin: ‹Buning mǝnisi nemidur?› dǝp sorisa, sǝn uningƣa jawab berip: ‹Pǝrwǝrdigar ⱪudrǝtlik ⱪoli bilǝn bizni Misirdin elip qiⱪip, u ⱪulluⱪ ɵyidin azad ⱪilip ⱪoydi. 15 Qünki Fir’ǝwn ⱪattiⱪ jaⱨilliⱪ ⱪilip, bizni ⱪoyup bǝrgili unimiƣanda, Pǝrwǝrdigar Misir zeminidiki, mǝyli insanning bolsun yaki malning bolsun, ularning ⱨǝmmǝ tunjilirini ɵltürdi. Xuning üqün mǝn qarwa malning baliyatⱪuni aqⱪan ⱨǝmmǝ tunjilirini Pǝrwǝrdigarƣa ⱪurbanliⱪ ⱪilimǝn wǝ oƣullirimning ⱨǝmmǝ tunjiliri üqün bǝdǝl tɵlǝp berimǝn› dǝp eytⱪin. 16 Bu bǝlgilimǝ ⱪolungda bir ǝslǝtmidǝk bolup tursun, pexanǝngdǝ bir bǝlgidǝk bolsun. Qünki Pǝrwǝrdigar ⱪudrǝtlik ⱪoli bilǝn bizni Misirdin elip qiⱪti» dedi.

17 Fir’ǝwn hǝlⱪni ⱪoyup bǝrgǝndin keyin, Filistiniylǝrning zeminidin ɵtidiƣan yol yeⱪinraⱪ bolsimu, Huda, hǝlⱪ jǝnggǝ uqriƣinida, ⱪorⱪup puxayman ⱪilip, Misirƣa ⱪaytip kǝtmisun dǝp, ularni u yol bilǝn baxlimidi. 18 Xu sǝwǝbtin Huda hǝlⱪni Ⱪizil dengiz tǝrǝptiki qɵlning yoli bilǝn baxlap bardi. Bǝni Isra’il Misirdin qiⱪⱪinida ⱪorallinip jǝnggǝ tǝyyar bolup mangdi. 19 Musa Yüsüpning sɵngǝklirinimu billǝ elip kǝtti. Qünki Yüsüp Bǝni Isra’ilƣa: «Huda qoⱪum silǝrni yoⱪlap kelidu. U qaƣda mening sɵngǝklirimni bu yǝrdin billǝ elip ketinglar» dǝp ularni ⱪǝsǝm ⱪildurƣanidi. 20 Andin ular Sukkottin qiⱪip, qɵlning qetidiki Etamda qedir-bargaⱨ tikti. 21 Pǝrwǝrdigar kündüzi bir bulut tüwrükidǝ ularƣa yol kɵrsitip, keqisi ot tüwrükidǝ ularƣa yoruⱪluⱪ berip aldida mangdi. Xu sǝwǝbtin ular keqǝ-kündüz mangalaytti. 22 Bulut tüwrüki kündüzi wǝ ot tüwrüki keqisi hǝlⱪtin ayrilmay, aldida mangatti.