1 Pǝrwǝrdigar Misir zeminida Musa wǝ Ⱨarunƣa mundaⱪ dedi: 2 «Ayliringlar iqidǝ bu ay silǝr üqün yilning bexi dǝp ⱨesablinip, yilning birinqi eyi bolsun. 3 Əmdi Isra’ilning pütün jama’itigǝ mundaⱪ dǝnglar: ‹Bu ayning oninqi küni atiliringlarning a’ililiri boyiqǝ ⱨǝrbir kixi bir ⱪoza alsun. Xundaⱪki, ⱨǝrbir a’iligǝ bir ⱪoza elip ⱪoyulsun. 4 Əgǝr bir kiqik a’iligǝ bir ⱪoza kɵp bolsa, ɵy igisi wǝ yenidiki ⱪoxnisi birlixip kixilǝrning saniƣa ⱪarap bir ⱪoza alsun. Ⱨǝrbir kixining yemikini ⱨesablap ⱪozini ⱨazirlanglar. 5 Silǝr tallaydiƣan ⱪoza, ⱪoy yaki ɵqkǝ padiliridin tallinip, bir yaxliⱪ ǝyibsiz ǝrkǝk bolsun. 6 Uni bu ayning on tɵtinqi künigiqǝ saⱪlanglar. Isra’ilning pütün jama’iti xu küni ahximi uni soyup, 7 uning ⱪenidin elip, uni yegǝn ɵyning ixikining bexi wǝ ikki tǝripidiki kexikigǝ sürkǝp ⱪoysun. 8 Ular xu keqisi gɵxini kawap ⱪilip, petir nan wǝ aqqiⱪ kɵktat bilǝn ⱪoxup yesun. 9 Lekin buningdin ⱨeqnemini ham yaki suda pixurup ǝmǝs, bǝlki uni bax, put wǝ üqǝy-baƣirliri bilǝn otta kawap ⱪilip yǝnglar. 10 Uning ⱨeqnemisini ǝtisi sǝⱨǝrgiqǝ ⱪaldurmanglar. Əgǝr bir nemisi ǝtisi sǝⱨǝrgiqǝ exip ⱪalƣan bolsa, uni otⱪa selip kɵydürüwetinglar. 11 Uni yegǝn waⱪtinglarda bǝlliringlarni baƣlap, putliringlarƣa qoruⱪ kiyip, ⱪolliringlarda ⱨasa tutup, uni aldiraxliⱪ bilǝn yǝnglar. Bu Pǝrwǝrdigarning Ɵtüp ketix ⱪozisidur. ^◼   12 Qünki Mǝn u keqisi Misir zeminini kezip, mǝyli insan bolsun, mǝyli ⱨaywan bolsun, u yǝrdiki ⱨǝmmǝ tunjilarni ɵltürimǝn. Mǝn Misirning ⱨǝmmǝ ilahlirining üstidin ⱨɵküm qiⱪirimǝn. Mǝn Pǝrwǝrdigardurmǝn. 13 Əmma bu ⱪan, silǝr turuwatⱪan ɵylǝrdǝ silǝrgǝ ⱪutulux yǝtküzidiƣan bǝlgǝ bolidu, qünki ⱪanni kɵrsǝm, silǝrdin ɵtüp ketimǝn. Bu tǝriⱪidǝ Misir zeminini urƣinimda, ⱨalakǝt elip kelidiƣan apǝt silǝrgǝ tǝgmǝydu. 14 U kün silǝrgǝ bir hatirǝ küni bolidu. Silǝr u kündǝ Pǝrwǝrdigar üqün ⱨeyt ɵtküzünglar. Nǝsildin nǝsilgǝ bu ⱨeyt ɵtküzüx bǝlgilimisigǝ ri’ayǝ ⱪilinglar. 15 Yǝttǝ kün petir nan yǝnglar. Birinqi kündin tartip ɵyliringlardin hemirturuqni qiⱪiriwetinglar. Qünki kimki birinqi kündin tartip yǝttinqi küngiqǝ boldurulƣan hemirdin pixurulƣan nan yesǝ, Bǝni Isra’ildin yulup taxlinidu. 16 Birinqi küni bir muⱪǝddǝs mǝjlis ɵtküzülsun, yǝttinqi künimu xundaⱪ bir muⱪǝddǝs mǝjlis ɵtküzülsun. Bu ikki kündǝ ⱨeq ix ⱪilinmisun. Pǝⱪǝt ⱨǝr adǝm yǝydiƣan tamiⱪinila tǝyyarlisa bolidu. 17 Mǝn xu küni ⱪoxunliringlarni Misir zeminidin qiⱪarƣinim üqün, silǝr nǝsildin nǝsilgǝ xu künni ⱨeyt küni ⱪilip, Petir nan ⱨeyti ɵtküzünglar. Bu mǝnggülük bǝlgilimǝ bolsun. 18 Birinqi ayning on tɵtinqi küni ahxamdin tartip, xu ayning yigirmǝ birinqi küni ahxamƣiqǝ petir nan yǝnglar. 19 Yǝttǝ kün iqidǝ ɵyliringlarda ⱨeq hemirturuq bolmisun. Qünki mǝyli yat kixi yaki yǝrlik kixi bolsun, ɵrligǝn bir nemini yegǝn ⱨǝrbir kixi Isra’ilning jama’itidin yulup taxlinidu. 20 Silǝr ⱨeq hemirturuq selinƣan nǝrsini yemǝnglar, turidiƣan ⱨǝmmǝ jayliringlarda petir nan yǝnglar›».

21 Musa Isra’ilning ⱨǝmmǝ aⱪsaⱪallirini qaⱪirip ularƣa mundaⱪ dedi: «Berip, a’ililiringlar boyiqǝ ɵzünglar üqün bir ⱪozini elip, Ɵtüp ketix ⱨeytining ⱪurbanliⱪi süpitidǝ soyunglar. 22 Andin bir tutam zupa elip, uni jawurdiki ⱪanƣa qilap, ⱪanni ixikning bexi wǝ ikki tǝripidiki kexikigǝ sürkǝnglar. Silǝrdin ⱨeqbiri ǝtisi sǝⱨǝrgiqǝ ɵz ɵyining ixikidin qiⱪmisun. ^◼   23 Qünki Pǝrwǝrdigar Misirni urux üqün zeminni kezip ɵtidu. Lekin U ixikning bexi wǝ ikki kexikidiki ⱪanni kɵrgǝndǝ, Pǝrwǝrdigar xu ixikning aldidin ɵtüp ketip, ⱨalak ⱪilƣuqining ɵyliringlarƣa kirip, silǝrni urup ɵltürüxigǝ yol ⱪoymaydu. 24 Silǝr bu bǝlgilmigǝ ǝmǝl ⱪilinglar. Bu ɵzünglar wǝ baliliringlar üqün mǝnggülük bǝlgilimǝ bolidu. 25 Pǝrwǝrdigar Ɵz wǝdisi boyiqǝ silǝrgǝ beridiƣan zeminƣa kirgininglarda bu ⱨeyt murasimini izqil dawamlaxturunglar. 26 Əgǝr baliliringlar silǝrdin: ‹Bu murasiminglarning mǝnisi nemǝ?› dǝp sorisa: 27 ‹Misirni urƣinida bizning ɵylirimizni saⱪlap, Misirda Bǝni Isra’ilning ɵyliridin ɵtüp kǝtkǝn Pǝrwǝrdigarƣa atalƣan Ɵtüp ketix ⱪurbanliⱪi bolidu› dǝnglar». Hǝlⱪ xuni anglap, engixip sǝjdǝ ⱪildi. 28 Andin Bǝni Isra’il berip, Pǝrwǝrdigar Musa wǝ Ⱨarunƣa ⱪandaⱪ buyruƣan bolsa, xundaⱪ ⱪildi.

29 Yerim keqisi Pǝrwǝrdigar tǝhttǝ olturƣan Fir’ǝwnning tunjisidin tartip, zindanda yatⱪan mǝⱨbusning tunjisiƣiqǝ, Misir zeminidiki ⱨǝmmǝ tunjilarni ɵltürdi, xundaⱪla qarwa malning tunji tuƣulƣanliriningmu ⱨǝmmisini ɵltürdi.

30 Buning bilǝn Fir’ǝwn ɵzi, uning ⱨǝmmǝ hizmǝtkarliri wǝ Misirliⱪlarning ⱨǝmmisi keqidǝ ornidin turuxti. Ɵlüm bolmiƣan ⱨeq ɵy ⱪalmiƣaqⱪa, Misirda ⱪattiⱪ yiƣa-zar kɵtürüldi. 31 Fir’ǝwn keqisi Musa wǝ Ⱨarunni qaⱪirtip: «Silǝr Bǝni Isra’il bilǝn billǝ mening hǝlⱪimning arisidin qiⱪip, eytⱪininglardǝk berip, Pǝrwǝrdigarƣa ibadǝt ⱪilinglar. 32 Degininglardǝk ⱪoy-kaliliringlarnimu elip ketinglar. Mangimu hǝyrlik du’a oⱪunglar» dedi. 33 Misirliⱪlar hǝlⱪni zemindin tez qiⱪiriwetix üqün ularni aldiritip: «Ⱨǝmmimiz ɵlüp ketimiz» deyixti. 34 Hǝlⱪ tehi ɵrlimigǝn hemirlirini tǝngnilǝrgǝ selip, tǝngnilǝrni kiyim-keqǝklirigǝ yɵgǝp, mürilirigǝ elip kɵtürüp mengixti. 35 Bǝni Isra’il Musa buyruƣandǝk ⱪilip, Misirliⱪlardin altun-kümüx buyumlar wǝ kiyim-keqǝklǝrni soriƣanidi. 36 Pǝrwǝrdigar hǝlⱪni Misirliⱪlarning kɵzidǝ iltipatⱪa erixtürgini üqün Misirliⱪlar ularƣa soriƣinini bǝrdi. Bu tǝriⱪidǝ ular Misirliⱪlardin olja elip kǝtti.

37 Bǝni Isra’il, balilarni ⱨesabⱪa almiƣanda, altǝ yüz mingqǝ ǝrkǝk bolup, Ramsǝstin qiⱪip Sukkotⱪiqǝ piyadǝ bardi. 38 Qong bir arilax guruⱨmu ularƣa ⱪoxulup mangdi wǝ naⱨayiti kɵp qarwa mal, ⱪoy-kala padilirimu ular bilǝn billǝ qiⱪti. 39 Misirdin elip kǝlgǝn hemirdin ular petir nan pixurup ⱪoydi. Qünki ular Misirda bir dǝmmu turalmay ⱨǝydǝlgini üqün, hemir boldurulmiƣanidi. Ular ɵzliri üqün ozuⱪ-tülük tǝyyarlaxⱪa ülgürǝlmigǝnidi. 40 Bǝni Isra’ilning Misirda turƣan waⱪti tɵt yüz ottuz yil idi. 41 Bu tɵt yüz ottuz yil toxⱪan küni Pǝrwǝrdigarning ⱨǝmmǝ ⱪoxunliri Misir zeminidin qiⱪip kǝtti. ^◼   42 Pǝrwǝrdigar ularni bu keqǝ Misir zeminidin qiⱪarƣini üqün, bu keqǝ Pǝrwǝrdigarƣa atap ɵtküzüx kerǝk bolƣan ⱨeyt bolidu. Nǝsildin nǝsilgǝ ⱨǝmmǝ Bǝni Isra’il xu keqini Pǝrwǝrdigarƣa atalƣan tünǝx keqisi dǝp tutup, oyƣaⱪ turuxi kerǝk.

43 Pǝrwǝrdigar Musa wǝ Ⱨarunƣa: «Ɵtüp ketix ⱨeytining toƣrisidiki bǝlgilimǝ xu bolsunki, ⱨeqbir yat yurtluⱪ adǝm uningdin yemisun. 44 Lekin birining pulƣa elinƣan ⱪuli bolsa, sǝn uni hǝtnǝ ⱪilƣandin keyin, andin buningdin yesun. 45 Əmma musapir wǝ mǝdikar buningdin yemisun. 46 Ⱪozining gɵxidin ⱨeqnemǝ taxⱪiriƣa qiⱪirilmisun, xu birla ɵydǝ yeyilsun wǝ uning ⱨeqbir sɵngiki sundurulmisun. 47 Isra’ilning pütün jama’iti buningƣa ri’ayǝ ⱪilsun. 48 Əgǝr aranglarda turuwatⱪan bir musapir Pǝrwǝrdigarning Ɵtüp ketix ⱨeytini ɵtküzüxni halisa, uning ⱨǝmmǝ ǝrkǝkliri hǝtnǝ ⱪilinsun. Andin u kelip ⱨeytni ɵtküzüp, yǝrlik kixi bolup ⱨesablansun. Lekin ⱨeqbir hǝtnisiz adǝm Ɵtüp ketix ⱨeytining ⱪurbanliⱪidin yemisun. ^◼   49 Yǝrlik kixi wǝ aranglarda turuwatⱪan musapir üqün ohxax ⱪa’idǝ bolsun» dedi. 50 Bǝni Isra’ilning ⱨǝmmisi Pǝrwǝrdigar Musa wǝ Ⱨarunƣa ⱪandaⱪ buyruƣan bolsa, xundaⱪ ⱪildi. 51 Dǝl xu küni Pǝrwǝrdigar Bǝni Isra’ilni ularning ⱪoxunliri boyiqǝ Misir zeminidin qiⱪardi. ^◼