1 Andin keyin Pǝrwǝrdigar Musaƣa: «Yǝnǝ bir apǝtni Fir’ǝwn wǝ Misirning üstigǝ ǝwǝtimǝn. Andin keyin u silǝrni bu yǝrdin ketixkǝ ⱪoyup beridu. U silǝrni ⱪoyup bǝrginidǝ silǝrni bu yǝrdin tamamǝn ⱨǝydǝp qiⱪiridu. 2 Əmdi sǝn hǝlⱪⱪǝ: ‹Mǝyli ǝr kixi yaki ayal bolsun, ⱨǝrbiringlar ɵz ⱪoxnanglardin altun-kümüx buyumlarni sorap elinglar› degin» dedi. 3 Pǝrwǝrdigar hǝlⱪni Misirliⱪlarning kɵzidǝ iltipatⱪa erixtürdi. Musa bolsa Misir zeminida Fir’ǝwnning hizmǝtkarlirining wǝ hǝlⱪning nǝziridǝ uluƣ adǝm idi. 4 Musa yǝnǝ sɵz ⱪilip: «Pǝrwǝrdigar mundaⱪ dǝydu: ‹Mǝn yerim keqidǝ Misirni kezip qiⱪimǝn. 5 Xu waⱪitta tǝhttǝ olturƣan Fir’ǝwnning tunji oƣlidin tartip yarƣunqaⱪta un tartidiƣan dedǝkning tunji oƣliƣiqǝ bolƣan Misirdiki barliⱪ tunji oƣullar, xundaⱪla ⱨǝmmǝ qarwa mallarning tunjilirimu ɵlidu. 6 Bu sǝwǝbtin pütün Misir zeminida uningdin ilgiri bolup baⱪmiƣan wǝ bundin keyinmu bolmaydiƣan qong pǝryad kɵtürülidu. 7 Lekin Bǝni Isra’ilning iqidin, mǝyli adǝm yaki ⱨaywanƣa bolsun, ⱨeqbirigǝ ⱨǝtta bir itmu ⱪawap ⱪoymaydu. Silǝr buni kɵrüp Pǝrwǝrdigarning Isra’ilni Misirliⱪlardin pǝrⱪlǝndürgǝnlikini bilisilǝr›. 8 Andin ⱨǝmmǝ hizmǝtkarliring aldimƣa kelip, aldimda tǝzim ⱪilip: ‹Ɵzüng wǝ sanga ǝgǝxkǝn ⱨǝmmǝ hǝlⱪ qiⱪip ketinglar› deyixidu. Andin keyin mǝn bu yǝrdin qiⱪip ketimǝn» dǝp ⱪattiⱪ ƣǝzǝplinip Fir’ǝwnning aldidin qiⱪip kǝtti.

9 Pǝrwǝrdigar Musaƣa: «Misirda kɵrsitidiƣan mɵjizilirimning tehimu kɵp boluxi üqün, Fir’ǝwn silǝrgǝ ⱪulaⱪ salmaydu» dedi. 10 Musa wǝ Ⱨarun bu mɵjizilǝrning ⱨǝmmisini Fir’ǝwnning aldida kɵrsǝtti. Lekin Pǝrwǝrdigar Fir’ǝwnning kɵnglini ⱪattiⱪ ⱪilip ⱪoyƣini üqün Bǝni Isra’ilning ɵz zeminidin ketixigǝ yol ⱪoymidi.