1 Andin keyin Pǝrwǝrdigar Musaƣa: «Fir’ǝwnning aldiƣa barƣin, qünki ularning arisida bu mɵjizilik karamǝtlǝrni kɵrsitixim üqün Fir’ǝwn wǝ hizmǝtkarlirining kɵngüllirini ⱪattiⱪ ⱪilip ⱪoydum. 2 Bu arⱪiliⱪ Mǝn Misirliⱪlarni ⱪandaⱪ bir tǝrǝp ⱪilƣanliⱪim wǝ ularning arisida kɵrsǝtkǝn mɵjizilik karamǝtlirim toƣrisida sǝn oƣlung wǝ nǝwrǝnggǝ sɵzlǝp berǝlǝysǝn. Buning bilǝn Mening Pǝrwǝrdigar ikǝnlikimni bilisilǝr» dedi. 3 Musa wǝ Ⱨarun Fir’ǝwnning aldiƣa berip, uningƣa: «Ibraniylarning Hudasi Pǝrwǝrdigar mundaⱪ dǝydu: ‹Ⱪaqanƣiqǝ sǝn Manga boysunuxtin bax tartisǝn? Manga ibadǝt ⱪilixi üqün hǝlⱪimni ⱪoyup bǝrgin. 4 Əgǝr sǝn hǝlⱪimni ⱪoyup bǝrmisǝng, mana, Mǝn ǝtǝ sening zeminingƣa qekǝtkǝ ǝwǝtimǝn. 5 Ular yǝr yüzi kɵrünmigüdǝk dǝrijidǝ zeminni ⱪaplap, silǝrning mɵldürdin aman ⱪalƣan nǝrsiliringlarni wǝ dalalarda ɵskǝn ⱨǝmmǝ dǝrǝhliringlarnimu yǝp ketidu. 6 Ɵyliring, pütün hizmǝtkarliringning ɵyliri wǝ ⱨǝmmǝ Misirliⱪlarning ɵylirimu ular bilǝn tolidu. Mundaⱪ wǝⱪǝni ata-bowiliringmu yǝr yüzidǝ pǝyda bolƣandin tartip bu waⱪitⱪiqǝ kɵrüp baⱪmiƣan›» dedi wǝ kǝynigǝ burulup Fir’ǝwnning aldidin qiⱪip kǝtti. 7 Andin Fir’ǝwnning hizmǝtkarliri uningƣa: «Ⱪaqanƣiqǝ bu kixi bizgǝ tuzaⱪ bolidu? Ɵz Hudasi Pǝrwǝrdigarƣa ibadǝt ⱪilixliri üqün bu adǝmlǝrni ⱪoyup bǝrgin. Misirning harab boluwatⱪanliⱪini tehiqǝ kɵrmidingmu?» dedi. 8 Xuning bilǝn Fir’ǝwn Musa wǝ Ⱨarunni qaⱪirtip, ularƣa: «Hudayinglar Pǝrwǝrdigarƣa ibadǝt ⱪilix üqün beringlar. Lekin baridiƣanlar kim bolidu?» dǝp soridi. 9 Musa jawab berip: «Yaxlirimiz wǝ ⱪeri-qɵrilirimiz, oƣul-ⱪizlirimiz wǝ ⱪoy-kalilirimizni elip ⱨǝmmimiz barimiz, qünki Pǝrwǝrdigarning ⱨeytini ɵtküzüximiz kerǝk» dedi. 10 U ularƣa: «Pǝrwǝrdigar silǝrni saⱪlisun, mǝn silǝrni bala-qaⱪanglar bilǝn ⱪoxup ⱪoyup bǝrsǝm! Mana, niyitinglar yaman! 11 Yaⱪ, ⱨǝrgiz undaⱪ bolmaydu! Pǝrwǝrdigarƣa ibadǝt ⱪilixⱪa pǝⱪǝt ǝr kixilǝr barsun. Silǝrning tǝlipinglar xu ǝmǝsmidi?» dedi. Andin ular Fir’ǝwnning aldidin ⱪoƣlap qiⱪirildi.

12 Andin keyin Pǝrwǝrdigar Musaƣa: «Misir zeminining üstigǝ ⱪolungni uzatⱪin. Xundaⱪ ⱪilsang, qekǝtkilǝr Misir zeminini besip, mɵldürdin aman ⱪalƣan yǝrdiki ɵsümlüklǝrning ⱨǝmmisini yǝp ketidu» dedi.

13 Musa ɵz ⱨasisini Misir zeminining üstigǝ uzatti. Pǝrwǝrdigar u küni wǝ keqisi zemin üstigǝ xǝrⱪ xamili qiⱪardi. Ətisi tang atⱪanda xǝrⱪ xamili qekǝtkilǝrni elip kǝldi. 14 Qekǝtkilǝr pütün Misir zeminiƣa yeyilip, Misir zeminining ⱨǝmmǝ yerigǝ ⱪondi. Uningdin ilgiri undaⱪ qekǝtkǝ apiti bolup baⱪmiƣanidi, bundin keyinmu uningdǝk bolmaydu. 15 Ular pütün zeminni ⱪaplap yǝr yüzini ⱪarangƣulaxturuwǝtti. Mɵldürdin aman ⱪalƣan yǝrdiki ⱨǝmmǝ ɵsümlüklǝr wǝ dǝrǝhlǝrning ⱨǝmmǝ mewisini yǝp kǝtti. Xundaⱪki, pütün Misir zeminida dǝrǝhlǝrdǝ wǝ daladiki giyaⱨlarda ⱨeq yexilliⱪ ⱪalmidi. 16 Fir’ǝwn Musa wǝ Ⱨarunni qaⱪirtip, ularƣa: «Mǝn ⱨǝm Hudayinglar Pǝrwǝrdigarƣa, ⱨǝm silǝrgǝ ⱪarxi gunaⱨ ⱪildim. 17 Əmdi muxu bir ⱪetim gunaⱨimdin ɵtüp, Hudayinglar Pǝrwǝrdigardin: ‹Fir’ǝwnni bu ɵlümdin ⱪutⱪuzƣaysǝn› dǝp tilǝnglar» dedi. 18 Xuning bilǝn Musa Fir’ǝwnning aldidin qiⱪip, Pǝrwǝrdigarƣa yalwurup du’a ⱪildi. 19 Pǝrwǝrdigar ƣǝrb tǝrǝptin bir xamalni burap, uni ⱪattiⱪ boranƣa aylandurdi. U boran qekǝtkilǝrni uqurup ketip, Ⱪizil dengizƣa elip berip taxlidi. Pütün Misir zeminida bir talmu qekǝtkǝ ⱪalmidi. 20 Lekin Pǝrwǝrdigar Fir’ǝwnning kɵnglini ⱪattiⱪ ⱪilip ⱪoyƣini üqün u Bǝni Isra’ilni ⱪoyup bǝrmidi.

21 Andin keyin Pǝrwǝrdigar Musaƣa: «Ⱪolungni asmanƣa kɵtürgin. Xundaⱪ ⱪilsang, ⱨes ⱪilƣudǝk zulmǝt ⱪarangƣuluⱪ Misir zeminini ⱪaplaydu» dedi. 22 Musa ɵz ⱪolini asmanƣa kɵtürüxi bilǝn, zülmǝt ⱪarangƣuluⱪ Misir zeminini besip, uni üq küngiqǝ ⱪaplap turdi. 23 Üq küngiqǝ ular bir-birini kɵrǝlmidi wǝ ⱨeqkim ɵz jayidin ⱪopup qiⱪalmidi. Lekin ⱨǝmmǝ Bǝni Isra’ilning turƣan yǝrliridǝ yoruⱪluⱪ bar idi. 24 Fir’ǝwn Musani qaⱪirtip: «Silǝr berip, Pǝrwǝrdigarƣa ibadǝt ⱪilinglar. Pǝⱪǝt ⱪoy-kalanglar bu yǝrdǝ ⱪelixi kerǝk. Bala-qaⱪiliringlarnimu elip barsanglar bolidu» dedi. 25 Lekin Musa: «Pǝrwǝrdigar Hudayimizƣa ⱪurbanliⱪ ⱪilix üqün soyum ⱪurbanliⱪ wǝ kɵydürmǝ ⱪurbanliⱪ ⱨaywanlirini bizgǝ tapxurup berixing lazim bolidu. 26 Ɵz qarwa mallirimiznimu elip beriximiz kerǝk. Ⱨeqbir tuyaⱪmu bu yǝrdǝ ⱪalmisun. Qünki Pǝrwǝrdigar Hudayimizƣa ⱪurbanliⱪ ⱪilidiƣinimizni bulardin alimiz. U yǝrgǝ yetip barmiƣuqǝ Pǝrwǝrdigarƣa nemǝ ⱪurbanliⱪ ⱪilidiƣinimizni bilmǝymiz» dedi. 27 Lekin Pǝrwǝrdigar Fir’ǝwnning kɵnglini ⱪattiⱪ ⱪilip ⱪoyƣini üqün, u ularni ⱪoyup berixni halimidi. 28 Fir’ǝwn Musaƣa: «Yoⱪal kɵzümdin! Ikkinqi manga kɵrüngüqi bolma! Qünki sǝn mening yüzümni yǝnǝ kɵrgǝn kündǝ ɵlisǝn» dedi. 29 Musa uningƣa: «Rast eytting, mǝn sening yüzüngni yǝnǝ kɵrmǝymǝn» dedi.